រដ្ឋមន្ត្រីក្រសួងអប់រំ៖ បច្ចុប្បន្នជំនាញ ដែលទីផ្សារត្រូវការគឺជំនាញបច្ចេកទេស
លោករដ្ឋមន្ត្រីក្រសួងអប់រំបានថ្លែងប្រាប់អ្នកសារព័ត៌មាននៅព្រឹកនេះថា បច្ចុប្បន្ននេះជំនាញ ដែលទីផ្សារការងារត្រូវការគឺជាជំនាញបច្ចេកទេស ដែលជំនាញទាំងនោះមានដូចជា ជំនាញកុំព្យូទ័រ វិស្វករជាដើម។ ការលើកឡើងរបស់រដ្ឋមន្ត្រីធ្វើឡើងក្នុងឱកាសសិក្ខាសាលាតម្រង់ទិសមុខជំនាញថ្នាក់ឧត្តមសិក្សាសម្រាប់សិស្សជាប់បាក់ឌុបនៅមជ្ឈមណ្ឌលសហប្រតិបត្តិការកម្ពុជា-ជប៉ុន។
ចុះផ្សាយនៅថ្ងៃ៖
ស្តាប់ - ០២:១៣
លោកហង្ស ជួនណារ៉ុនថាបច្ចុប្បន្ននេះជំនាញ ដែលទីផ្សារការងារត្រូវការ គឺជំនាញបច្ចេកទេស។ ឧទាហរណ៍ ជំនាញកុំព្យូទ័រ វិស្វករជាដើម។ ប៉ុន្តែមានជំនាញផ្សេងទៀត ថ្វីត្បិតតែមិនមែនជាជំនាញបច្ចេកទេស ប៉ុន្តែយុវជនត្រូវចេះឲ្យច្បាស់។ លោកបញ្ជាក់ថា សំខាន់បំផុតគឺចេះឲ្យច្បាស់ អាចរកការងារធ្វើបានហើយ។ បើចេះមិនច្បាស់ទេ ជំនាញអ្វីក៏ពិបាករកការងារធ្វើដែរ។
ឆ្លើយនឹងសំនួរ ហេតុអ្វីបានជាយុវជនកម្ពុជាមួយចំនួនមិនមានការងារធ្វើ លោកហង្ស ជួនណារ៉ុនរដ្ឋមន្រ្តីក្រសួងអប់រំ យុវជន និងកីឡាបានលើកឡើងថា ដោយសារតែយុវជនមិនដឹងពីទីផ្សារពលកម្មនៅពេលរៀន។ លោកបន្ថែមថាអញ្ចឹងយុវជនទើបបញ្ចប់បាក់ឌុប ត្រូវចេះស្រាវជ្រាវខ្លូនឯង ចេះស្វែងយល់ពីខ្លួនឯង ហើយចេះស្តាប់គេ! បន្ទាប់មកទៀតត្រូវចេះជ្រើសរើសជំនាញដែលទីផ្សារត្រូវការ។
រដ្ឋមន្ត្រីរូបនេះបញ្ជាក់យ៉ាងដូច្នេះថា យុវជនមិនមែនរៀន ទៅតាមតែចំណង់ចំណូលចិត្តទេ វាក៏តម្រូវទៅតាមទីផ្សារពលកម្មដែរ។ អញ្ចឹងប្រសិនបើការបណ្តុះបណ្តាល ទៅលើមុខជំនាញណាមួយច្រើនពេកនឹងធ្វើឲ្យប៉ះពាល់ទីផ្សារការងារ។ លោកកត់សម្គាល់ថាការរើសជំនាញនេះគឺសំខាន់ណាស់។
លោកជាង សុខានាយកប្រតិបត្តិអង្គការកម្មវិធីអភិវឌ្ឍន៍ធនធានយុវជន (YRDP) បានថ្លែងថា កម្ពុជានៅមានភាពស្រពេចស្រពិលពីទីផ្សារការងារក្នុងពេលបច្ចុប្បន្ន និងនៅពេលខាងមុខ។ លោកបញ្ជាក់ថាការចាប់យកជំនាញអ្វីមួយ យុវជនមិនត្រូវសម្លឹងមើលតែទៅលើទីផ្សារការងារមួយមុខទេ ប៉ុន្តែយុវជនគួរតែពិនិត្យមើលខ្លួនឯង ថាតើខ្លួនមានចំណាប់អារម្មណ៍ ឬពូកែនឹងជំនាញអ្វី? ព្រោះភាពពូកែរបស់គាត់ នឹងអាចជួយឲ្យគាត់រៀនសូត្រក្នុងវិស័យនោះបានលឿន។
លោកបន្ថែមថាបើយុវជនជ្រើសរើសជំនាញសិក្សាទៅតាមតែតម្រូវការទីផ្សារការងារ នោះនឹងធ្វើឲ្យមានភាពប្រឈមមួយចំនួនកើតឡើង។
យោងតាមរបាយការណ៍ស្រាវជ្រាវរបស់YRDP ចេញផ្សាយកាលពីខែធ្នូ ឆ្នាំ២០១៥ បានឲ្យដឹងថាយុវជនដែលបានចូលរៀនក្នុងសកលវិទ្យាល័យមានចំនួនចន្លោះពី៤ម៉ឺននាក់ ដល់៥ម៉ឺននាក់ ហើយមាននិស្សិតប្រមាណ២ម៉ឺន៩ពាន់នាក់ ដល់៣ម៉ឺន៣ពាន់នាក់ បានបញ្ចប់ការសិក្សានៅសកលវិទ្យាល័យ ហើយបានចូលបំពេញការងារជារៀងរាល់ឆ្នាំ។ របាយការណ៍ដដែលក៏បានបង្ហាញថា ច្រើនជាងពាក់កណ្តាល នៃអ្នកដែលបានចុះឈ្មោះចូលរៀនថ្នាក់បរិញ្ញាបត្របានជ្រើសរើសជំនាញ ពាណិជ្ជកម្ម សេដ្ឋកិច្ច និងរដ្ឋបាល ហើយមានតែ៤ភាគរយប៉ុណ្ណោះ ដែលបានជ្រើសរើសផ្នែកកសិកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ