អឺរ៉ុបចង់ពង្រឹងការត្រួតពិនិត្យអ្នកដំណើរមកពីប្រទេសមានអេបូឡា
រដ្ឋមន្ត្រីក្រសួងសុខាភិបាលអឺរ៉ុបបានកោះហៅប្រទេសជាសមាជិកទាំងអស់ឱ្យចូលប្រជុំបច្ចេកទេសនៅថ្ងៃព្រហស្បតិ៍ខាងមុខ ដើម្បីពិភាក្សារកវិធីពង្រឹងសុវត្ថិភាពផ្នែកសុខភាព ថ្នាក់អឺរ៉ុប ចំពោះអ្នកដំណើរដែលធ្វើដំណើរមកពីប្រទេសមានរោគអេបូឡា។ ក្នុងពេលជាមួយគ្នានៅប្រទេសបារាំង ប្រធានាធិបតីនិងរដ្ឋមន្ត្រីក្រសួងសុខាភិបាលក៏កំពុងជួបប្រជុំគ្នា ដោយគ្រោងនឹងសម្រេចធ្វើដូចសហរដ្ឋអាមេរិក និងអង់គ្លេស ពង្រឹងការត្រួតពិនិត្យនៅអាកាសយានដ្ឋាន។
ចុះផ្សាយនៅថ្ងៃ៖
ស្តាប់ - ០១:៥០
បារាំងកំពុងពិចារណា បញ្ជូនភ្នាក់ងារ និងសម្ភារៈបរិក្ខា រចនាសម្ព័ន្ធព្យាបាល និងថែទាំសុខភាពបន្ថែមទៀតទៅកាន់អាហ្វ្រិកខាងលិច ជាពិសេសប្រទេសហ្គីណេ ដើម្បីប្រយុទ្ធទប់ទល់នឹងជំងឺអេបូឡា ! ការត្រួតពិនិត្យសុខភាពអ្នកដំណើរដែលហោះចេញផ្ទាល់ពីហ្គីណេមកបារាំង ទំនងជានឹងអាចត្រូវពង្រឹង ប្រសិនបើស្ថានការណ៍ឈានដល់ដំណាក់កាលចាត់វិធានការ។ នេះជាសេចក្តីប្រកាសរបស់លោកស្រីរដ្ឋមន្ត្រីក្រសួងសុខាភិបាលបារាំងក្រោយពេលជួបពិគ្រោះជាមួយប្រធានាធិបតីរួច។
តាំងពីមានករណីឆ្លងមេរោគអេបូឡា(ក្រៅទ្វីបអាហ្វ្រិក) នៅក្នុងប្រទេសអេស្ប៉ាញមក សហភាពអឺរ៉ុបមានការព្រួយបារម្ភខ្លាំងខ្លាចជំងឺកំណាចមួយនេះរាតត្បាតក្នុងទ្វីប។ អង់គ្លេសបានអនុវត្តមុនគេ ដូចសហរដ្ឋអាមេរិក និងកាណាដា ពង្រឹងការត្រួតពិនិត្យសុខភាពអ្នកដំណើរនៅតាមអាកាសយានដ្ឋាន ចំណតរថភ្លើងសំខាន់ៗ តាំងពីថ្ងៃព្រហស្បតិ៍ទី ៩ តុលាមក។
ការតាមដានមើលអ្នកដំណើរអាហ្វ្រិកមកអឺរ៉ុប បានក្លាយជាប្រធានបទនៃកិច្ចប្រជុំប្រចាំសប្តាហ៍របស់គណៈកម្មការសន្តិសុខសុខាភិបាលរួចហើយ ប៉ុន្តែបន្ថែមលើនេះទៀតរដ្ឋមន្ត្រីក្រសួងសុខាភិបាលអឺរ៉ុបបានកោះហៅប្រទេសជាសមាជិកទាំងអស់ឱ្យជួបប្រជុំគ្នានៅថ្ងៃព្រហស្បតិ៍ខាងស្អែកនេះ ដើម្បីរិះរកមធ្យោបាយទប់ស្កាត់ ឬនិយាយបែបផ្សេងគឺចាត់វិធានការឱ្យស៊ីចង្វាក់គ្នា ក្នុងកំរិតអឺរ៉ុប។ ជាជំនួបប្រជុំបច្ចេកទេស ដើម្បីផ្តោះប្តូរទស្សនៈគ្នា ចំពោះចំណាត់ការរបស់ប្រទេសនីមួយៗជាសមាជិកសហភាព។
សូមបញ្ជាក់ថានៅក្នុងចំណោមប្រទេស២៧ជាសមាជិកអឺរ៉ុប មានមិនដល់ពាក់កណ្តាលទេ ដែលមានភ្ជាប់ការហោះហើរដោយផ្ទាល់ជាមួយប្រទេសនៅអាហ្វ្រិកខាងលិចដែលរងគ្រោះអេបូឡាខ្លាំង។
ដំណើរការធ្វើតេស្តស្វែងរកមេរោគអេបូឡាលើអ្នកដំណើរមកពី តំបន់គ្រោះថ្នាក់ មិនទាន់ត្រូវបានអង្គការសុខភាពលោកណែនាំឱ្យធ្វើនៅឡើយទេ គឺមានតែការអនុវត្តន៍ជាក់ស្តែង ចោះដោយត្រួសៗវាស់សីតុណ្ហភាពអ្នកដំណើរមុនពេលឡើងយន្តហោះខ្លះៗតែប៉ុណ្ណោះ។ អេបូឡា បានសម្លាប់ជីវិតមនុស្សឡើងអស់ជាងបួនពាន់នាក់ ភាគច្រើននៅតំបន់អាហ្វ្រិកខាងលិច ដូចជាហ្គីណេ សេរ៉ាឡេអូន នីហ្សេរីយ៉ា និង លីបេរីយ៉ា និងមានករណីឆ្លងក្រៅអាហ្វ្រិកពីរនាក់ ម្នាក់នៅអេស្ប៉ាញ និងម្នាក់ទៀតនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ