ទិវាពិភពលោកប្រឆាំងអំពើហឹង្សាលើស្ត្រី
ថ្ងៃ ២៥វិច្ឆិកានេះ ជាថ្ងៃដ៏សំខាន់សំរាប់ស្ត្រីគ្រប់រូបលើពិភពលោក -ព្រោះជាថ្ងៃដែលប្រទេសទាំងអស់លើពិភពលោក បា្ររព្ធនូវទិវាពិភពលោកប្រយុទ្ធប្រឆាំងទល់នឹងអំពើហិង្សាលើ ស្ត្រី។ ស្ត្រីនិងកុមារី រាប់លាននាក់ នៅលើពិភពលោក បានទទួលរងគ្រោះ ឥតល្ហែពីសំណាក់បុរសដូចជាការវាយដំធ្វើទុក្ខបុកម្នេញលើរាងកាយ និងការរំលោភបំពានផ្លូវភេទជាដើម រហូតដល់ធ្វើឃាតទៀតផង។
ចុះផ្សាយនៅថ្ងៃ៖
ស្តាប់ - ០២:៣២
ថ្វីត្បិតតែរដ្ឋាភិបាលស្ថាប័នសិទ្ឋិមនុស្ស រឺក៏អង្គការនានានៅលើពិភពលោកប្រឹងបង្កើតច្បាប់សព្វបែបយ៉ាងដើម្បីការពារសិទ្ឋស្ត្រីនិងធានាអោយបាននូវសិទ្ធិស្មើគ្នារវាងស្ត្រីនិងបុរស ក៏ស្ត្រីរាប់លាននាក់នៅតែទទួលរងនូវអំពើហឹង្សាជារឿយៗ។
នៅតាមបណ្តាប្រទេសមួយចំនួននៅទ្វីបអាហ្វ្រិច ដូចជា ប្រទេសសេណេហ្កាល់ ហ្កាណា អេហ្ស៊ីប រឺក៏នៅទ្វីបអាស៊ី ដូចជាឥណ្ឌា រឺអាហ្កានីស្ថានជាដើមនោះ ស្ថានភាពស្ត្រីភាគច្រើននៅមានការលំបាកនៅឡើយ។ គេកត់សំគាល់ឃើញមានអំពើហឹង្សាចំពោះស្ត្រីច្រើនជាងគេនៅទ្វីបអាហ្វ្រិច។ នៅទីនោះ ប្រទេសខ្លះនៅប្រកាន់ទំនៀមទំលាប់ចាស់ៗដូចជាការវះកាត់ប្រដាប់ភេទក្មេងស្រីដើម្បីការពារព្រហ្មចារីយ៍ រឺក៏ការបង្ខំអោយស្ត្រីមិនទាន់គ្រប់អាយុរៀបការជាដើម។ ទំនៀមទំលាប់ទាំងនេះ ជាការរំលោភលើច្បាប់ទាំងស្រុង។
ថ្វីត្បិតតែអំពើហឹង្សាកើតចេញពីទំនៀមទំលាប់នេះបានថយចុះ មនុស្សភាគច្រើននៅ អាហ្វ្រិចនៅតែយល់ថា ការវះកាត់ប្រដាប់ភេទស្ត្រី និងការរៀបការមុនអាយុគ្មានអ្វីខុសប្លែកពីភាពធម្មតានោះទេ។
ចំពោះប្រទេសឥណ្ឌា គេប្រហែលជាគិតថា ជាប្រទេសមួយផ្តល់សិទ្ឋពេញលេញដល់ស្ត្រីគ្រប់រូប ព្រោះគេឃើញមានវត្តមានរបស់ស្ត្រីច្រើនរូបនៅក្នុងវិស័យនយោបាយ។ ប៉ុន្តែនេះជាការបំភ័ន្តភ្នែកតែប៉ុណ្ណោះ ព្រោះថាស្ត្រីឥណ្ឌា នៅតែជាជនរងគ្រោះដដែលនៅក្នុងក្រសែភ្នែករបស់សង្គមមនុស្សដែលផ្តល់អាទិភាពនិងអំណាចដល់បុរស។
នៅប្រទេសអាហ្កានីស្ថាន ថ្វីត្បិតតែរបបតាលីបង់បានដួលរលំអស់រយៈពេល១១ឆ្នាំមកហើយក៏ដោយ ក៏សង្គមអាហ្កានីស្ថាននៅតែរក្សាទុកនូវលក្ខណៈអភិរក្សនិយមរបស់ខ្លួនដដែល។ នេះជាហេតុផលដែលបង្កអោយស្ត្រីភាគច្រើននៅតែទទួលរងនូវអំពើហឹង្សា ព្រោះតែសង្គមមិនទទួលស្គាល់លក្ខន្តិកៈរបស់ខ្លួន។
ទោះជាយ៉ាងណា រដ្ឋាភិបាលអង្គការសិទ្ឋមនុស្ស និងអង្គការក្រៅរដ្ឋាភិបាលនានា នៅតែបន្តការផ្សព្វផ្សាយលើកតំកើងស្ត្រី និងថ្កោលទោសនូវអំពើហឹង្សាលើស្ត្រីជាដរាប។
រដ្ឋាភិបាលប្រទេសស៊ីលី បានប្រឹងបង្កើនការ ផ្សព្វផ្សាយនូវតំលែស្ត្រីដល់ជនគ្រប់រូបពិសេសដល់យុវវ័យនៅតាមសាលា រឺនៅតាមបណ្តាញសង្គមនានា ដោយអំពាវនាវអោយធ្វើការប្រឆាំង រាល់ទង្វើ រឺអាកប្បកិរិយាត្រួតត្រាលើស្ត្រី។
គេសង្កេតឃើញ ស្ត្រីភាគច្រើន ចាប់ផ្តើមយល់ពីតំលែនែសិទ្ធិរបស់ខ្លួន។ យោងតាមសមាគមស្ត្រីនានានៅប្រទេសអាល់ហ្សេរី ជារៀងរាល់ឆ្នាំ មានស្ត្រីប្រហែលជាងមួយម៉ឺននាក់ បានធ្វើការតវ៉ាប្តឹងផ្តល់ នៅពេលដែលខ្លួនទទួលរងនូវអំពើហឹង្សា។ នេះជាជោគជ័យមួយសំរាប់ស្ត្រីគ្រប់រូបនៅទីនោះ ក៏ដូចជាស្ត្រីដទៃទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ