តើលោកសាកូហ្ស៊ីអាចនៅមានឱកាសឈ្នះលោកហូឡង់នៅជុំទី២ដែរឬទេ?
នៅក្នុងការបោះឆ្នោតប្រធានាធិបតីបារាំង ជុំទីមួយ កាលពីថ្ងៃអាទិត្យម្សិលមិញនេះ លោកនីកូឡា សាកូហ្ស៊ី (Nicolas Sarkozy) ដែលជាប្រធានាធិបតីផុតអាណត្តិ ត្រូវចាញ់លោកហ្វ្រង់ស័រ ហូឡង់ (François Hollande) បេក្ខជនមកពីគណបក្សសង្គមនិយម ដែលជាបក្សប្រឆាំង។ បេក្ខជនទាំងពីរនឹងត្រូវប្រកួតគ្នា នៅជុំទី២ ទៀត នៅថ្ងៃទី៦ ឧសភា។ ក៏ប៉ុន្តែ ឱកាសជាប់ឆ្នោតរបស់លោកសាកូហ្ស៊ីទំនងជាមានតិច។
ចុះផ្សាយនៅថ្ងៃ៖
ស្តាប់ - ០៦:០១
លទ្ធផលផ្លូវការបង្ហាញថា លោកហូឡង់ ទទួលបានសំឡេងគាំទ្រ ២៨,៦៣% នាំមុខលោកសាកូហ្ស៊ី ២៧,១៨%។ នៅលំដាប់ទី៣ គឺគណបក្សស្តាំនិយមជ្រុល (Front National) ដែលទទួលបានសំឡេង ១៧,៩% ហើយទី៤ គឺគណបក្សឆ្វេងនិយមជ្រុល (Front de Gauche) ដែលទទួលបានសំឡេង ១១,១១% (សូមចុចត្រង់នេះ ដើម្បីមើលលទ្ធផលលម្អិត)។
ចាប់តាំងពីក្រោយសង្រ្គាមលោកលើកទី២មក នេះ គឺជាលើកដំបូងបង្អស់ ដែលប្រធានាធិបតីផុតអាណត្តិទទួលបានសំឡេងគាំទ្រតិចជាងបេក្ខជនបក្សប្រឆាំង។ វាក៏ជារឿងដ៏កម្រមួយដែរ ដែលបេក្ខជនមកពីគណបក្សសង្គមនិយម (ឆ្វេង) ទទួលបានសំឡេងគាំទ្ររហូតដល់ទៅជាង ២៨,៦៣% នៅជុំទីមួយ។ នៅឆ្នាំ១៩៨១ លោកហ្វ្រង់ស័រ មីតេរ៉ង់ ដែលបានជាប់ឆ្នោតជាប្រធានាធិបតី ទទួលបានសំឡេងមិនដល់ ២៦% ផង នៅជុំទីមួយ។
បើមើលទៅលើការបោះឆ្នោតប្រធានាធិបតីកន្លងមក គេឃើញថា បេក្ខជន ដែលនាំមុខគេ នៅជុំទី១ មិនប្រាកដថាអាចជាប់ឆ្នោតជាប្រធានាធិបតីនោះទេ។ ពេលខ្លះ គឺបេក្ខជនលេខ២ នៅជុំទី១ ដែលជាប់ឆ្នោត នៅជុំទី២ ដូចជា លោក Valéry Giscard d’Estaing នៅឆ្នាំ១៩៧៤ និងលោក Jacques Chirac នៅឆ្នាំ១៩៩៥។
គន្លឹះនៃជ័យជំនះ នៅជុំទី២ គឺការទាក់ទាញការគាំទ្រពីអ្នកបោះឆ្នោតឲ្យបេក្ខជន ដែលត្រូវជម្រុះ នៅជុំទី១។ កាលពីយប់ម្សិលមិញ ក្រោយពីដឹងលទ្ធផលជុំទី១ បេក្ខជនមកពីគណបក្ស ដែលមាននិន្នាការនយោបាយឆ្វេងនិយម បាននាំគ្នាប្រកាសគាំទ្រលោកហូឡង់ភ្លាមៗ។ បើគេបូកសំឡេងគាំទ្រលោកហូឡង់ ជាមួយសំឡេងគាំទ្របេក្ខជនឆ្វេងនិយមផ្សេងទៀត គឺមានជាង ៤៤%។ ចំណែកខាងស្តាំនិយមវិញ សំឡេងគាំទ្រលោកសាកូហ្ស៊ី បូកជាមួយគណបក្សស្តាំនិយមផ្សេងទៀត អាចមានរហូតដល់ទៅជាង ៤៦%។ ក៏ប៉ុន្តែ រហូតមកទល់ពេលនេះ នៅមិនទាន់មានបេក្ខជនស្តាំនិយមណាម្នាក់ ប្រកាសគាំទ្រលោកសាកូហ្ស៊ីនៅឡើយទេ។
ការស្ទាបស្ទង់មតិមួយ កាលពីយប់ថ្ងៃអាទិត្យម្សិលមិញ បង្ហាញថា គិតមកត្រឹមពេលនេះ អ្នកគាំទ្របេក្ខជនឆ្វេងនិយមភាគច្រើននឹងនាំគ្នាបោះឆ្នោតឲ្យលោក ហូឡង់ នៅថ្ងៃទី ៦ឧសភា។ ផ្ទុយទៅវិញ អ្នកគាំទ្របេក្ខជនស្តាំនិយមជ្រុល មិនតែប្រមាណ ៤៨% ប៉ុណ្ណោះ ដែលនឹងបោះឆ្នោតឲ្យលោកសាកូហ្ស៊ី នៅជុំទី២។ ៣១% នឹងបោះឆ្នោតឲ្យលោកហូឡង់។ ២១% ផ្សេងទៀត អនុប្បវាទ។ ចំណែកសំឡេងគាំទ្របេក្ខជនកណ្តាលនិយមវិញ ដែលមាន ៩,១៣% នឹងត្រូវបែងចែកប្រហាក់ប្រហែលគ្នាទៅលោកហូឡង់ និងលោកសាកូហ្ស៊ី។ ដោយមើលទៅតាមការគណនា ក្នុងស្ទាបស្ទង់មតិនេះ គេឃើញថា នៅជុំទី២ លោកហូឡង់អាចយកឈ្នះលោកសាកូហ្ស៊ី ដោយសំឡេង ៥៤% ទល់នឹង ៤៦%។
ដើម្បីប្រជែងយកឈ្នះលោកហូឡង់ នៅថ្ងៃទី៦ឧសភានេះ លោកសាកូហ្ស៊ីចាំបាច់ត្រូវស្វះស្វែងទាក់ទាញការគាំទ្រពីក្រុមស្តាំនិយមជ្រុលផង និងពីកណ្តាលនិយមផង ដែលជារឿងមួយស្មុគស្មាញ ពីព្រោះថា ក្រុមទាំងពីរនេះ មិនត្រឹមតែមានគោលនយោបាយខុសគ្នាប៉ុណ្ណោះទេ គឺមិនចូលចិត្តគ្នាតែម្តង ជាពិសេស ពួកអ្នកកណ្តាលនិយមស្អប់ពួកអ្នកស្តាំនិយមជ្រុល។ ដូច្នេះ បើសិនជាលោកសាកូហ្ស៊ីធ្វើតម្រូវចិត្តក្រុមមួយ គាត់អាចនឹងបាត់បង់ការគាំទ្រពីក្រុមមួយទៀត។
ដូច្នេះ បើទោះបីជាលោកសាកូហ្ស៊ីនៅមានឱកាសជាប់ឆ្នោត នៅថ្ងៃទី៦ឧសភាខាងមុខ ក៏ប៉ុន្តែ ឱកាសនេះហាក់ដូចជាមានតិចតួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ