បទឧទ្ទេសនាមនៅក្នុងរដ្ឋសភារបស់នាយករដ្ឋមន្ត្រីពីបញ្ហាព្រំដែនត្រូវបានបោះពុម្ពជាសៀវភៅនិងចំលងជាខ្សែអាត់
នៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានប្រកាសថា បទឧទ្ទេសនាមរបស់លោកលើបញ្ហាព្រំដែនកម្ពុជា-វៀតណាម នៅក្នុងរដ្ឋសភា កាលពីថ្ងៃទី៩ ខែសីហា រយៈពេលជាង ៥ ម៉ោង នឹងត្រូវបោះពុម្ព ជាសៀវភៅ ព្រមទាំងចងក្រង ជាខ្សែអាត់ ដើម្បីទុកជាឯកសារ។សម្រង់ឯកសារនោះ នឹងត្រូវចែកចាយ ដើម្បីទុកផ្សព្វផ្សាយ នៅពេលបានការលើកឡើងករណីព្រំដែនដ៏ចម្រូងចម្រាស់រវាងកម្ពុជា និងវៀតណាម។
ចុះផ្សាយនៅថ្ងៃ៖
ស្តាប់ - ០៣:២១
ក្នុងពិធីចែកសញ្ញាប័ត្រ ដល់និស្សិតបញ្ចប់ការសិក្សា នៅព្រឹកមិញ លោកនាយករដ្ឋមន្ត្រី ហ៊ុន សែន បានប្រកាសថា នៅពេលនេះ សៀវភៅក៏ត្រូវចេញផ្សាយ ហើយខ្សែអាត់ ជា ឌីវីឌី ឬកាសែត ថេប ក៏ត្រូវបានរៀបចំរួចហើយ អំពីបទអន្តរាគមន៍ជាង ៥ ម៉ោង របស់លោក នៅក្នុងរដ្ឋសភា ពាក់ព័ន្ធនឹងបញ្ហាព្រំដែនកម្ពុជា-វៀតណាម។ ការចងក្រងដូច្នេះ ត្រូវបានលោកនាយករដ្ឋមន្ត្រី បញ្ជាក់ថា សម្រាប់ផ្សព្វផ្សាយ នៅពេលមានការលើកឡើងករណីព្រំដែនដ៏រស៊ើបនោះ។
លោកនាយករដ្ឋមន្ត្រី ក៏បានប្រកាសថា រដ្ឋាភិបាលបានបោះពុម្ព ចេញជាសៀវភៅ ទាំងភាសាខ្មែរ និងទាំងភាសាអង់គ្លេសនូវអត្ថបទឧទ្ទេសនាមនោះ ដើម្បីយកទៅធ្វើជាមូលដ្ឋាន។
កាលពីថ្ងៃ៩សីហា សប្តាហ៍មុន លោកនាយករដ្ឋមន្ត្រី ហ៊ុន សែន បានចំណាយពេលវេលាជាង ៥ ម៉ោង ដើម្បីពន្យល់បំភ្លឺដល់រដ្ឋសភា អំពីបញ្ហាព្រំដែនដ៏ចម្រូងចម្រាសរវាងកម្ពុជា និងវៀតណាម។ លោកនាយករដ្ឋមន្ត្រី ហ៊ុនសែន បានលើកឡើងថា អ្វីដែលរដ្ឋាភិបាលរបស់លោកបានធ្វើបច្ចុប្បន្ន គឺផ្អែកទៅលើផ្លូវច្បាប់ និងអ្វីដែលបន្សល់ទុកពីសម័យសង្គមរាស្ត្រនិយមរបស់សម្តេចឪ នរោត្តម សីហនុ ប៉ុណ្ណោះ។ លោកនាយករដ្ឋមន្ត្រី ក៏បានប្រកាសធានា ចំពោះមុខរដ្ឋសភា និងចំពោះប្រជាជនកម្ពុជាថា កម្ពុជាមិនមានបាត់បង់ទឹកដី ទាំងដែនគោក ឬដែនសមុទ្រ ដោយសារការបោះបង្គោលព្រំដែនកម្ពុជា-វៀតណាមដ៏ចម្រូងចម្រាស់នោះទេ។
ទោះបីជាយ៉ាងនេះក្តី ក្នុងកិច្ចប្រជុំរដ្ឋសភា កាលពីសប្តាហ៍មុន លោកនាយករដ្ឋមន្ត្រី ហ៊ុនសែន បានលើកឡើងពីភាពចាំបាច់ ដែលត្រូវធ្វើការដោះដូរដីភូមិ តាមព្រំដែន រវាងប្រទេសកម្ពុជា និងវៀតណាម ដោយសារតែផ្អែកទៅលើការកាន់កាប់ជាក់ស្តែងរបស់ប្រជាជនកម្ពុជា និងវៀតណាម។
ផែនការដោះដូរភូមិនោះ ហើយដែលនាំឲ្យសកម្មជនព្រំដែន និងគណបក្សប្រឆាំង នៅតែមានមន្ទិលសង្ស័យ ពីការខាតបង់ទឹកដីកម្ពុជា ទៅប្រទេសវៀតណាម ត្បិតអីលោកនាយករដ្ឋមន្ត្រី បានបកស្រាយថា ការបោះបង្គោលព្រំដែនគោក ដែលគ្រោងនឹងបញ្ចប់នៅបំណាច់ឆ្នាំ២០១២ គឺវៀតណាម បានបោះចូលទឹកដីកម្ពុជា ហើយកម្ពុជាបានបោះចូលវៀតណាម ដោយទូទាត់ទៅ វៀតណាមត្រូវសងមកកម្ពុជានូវផ្ទៃដីជាង ១.០០០ ហិកតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ