នៅមិនទាន់មានអ្នកណាអាចពន្យល់បានអំពីការប្រកាសលទ្ធផលបោះឆ្នោតខុសគ្នា
ចុងក្រោយនេះ គណបក្សប្រឆាំងបានប្រកាសថា ខ្លួនទទួលបានកៅអីដល់ទៅ៦៣ ខុសពីគណបក្សកាន់អំណាចដែលបានប្រកាសថា បក្សប្រឆាំងបានតែ ៥៥ កៅអី។ ចំណែកអង្គការសង្កេតការណ៍បោះឆ្នោតខុមហ្វ្រែល បានរកឃើញថា គណបក្សប្រជាជនទទួលបាន៦៧កៅអី ទល់នឹង ៥៦ របស់បក្សប្រឆាំង។ តើហេតុអ្វីបានជាសំឡេងឆ្នោតដែលទទួលបានមកពីការិយាល័យបោះឆ្នោតដូចគ្នា មានភាពខុសគ្នាបែបនេះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
គណបក្សសង្គ្រោះជាតិដែលអះអាងថា ខ្លួនទទួលបាន ៦៣កៅអីក្នុងសភានោះ កំពុងតែតវ៉ាពីលទ្ធផលនៃការបោះឆ្នោត។ គណបក្សនេះអះអាងថា បានសំអាងលើទិន្នន័យពីភ្នាក់ងារគណបក្សដែលខ្លួនបានពង្រាយគ្រប់ការ រិយាល័យបោះឆ្នោត នៅទូទាំងប្រទេស។
ប៉ុន្តែ អង្គការអង្កេតកាណ៍បោះឆ្នោត ខុមហ្វ្រែល ដែលបានធ្វើការយ៉ាងយកចិត្តទុកដាក់លើការបោះឆ្នោតបានបង្ហាញតួលេខនៃ លទ្ធផលបោះឆ្នោត ផ្ទុយពីការអះអាងរបស់គណបក្សសង្គ្រោះជាតិ។ នោះគឺ គណបក្សប្រជាជនកម្ពុជាទទួលបាន ៦៧កៅអី ទល់នឹង ៥៦ កៅអីរបស់បក្សប្រឆាំង។ លទ្ធផលនេះខុសគ្នាបន្តិចបន្តួចប៉ុណ្ណោះជាមួយ លទ្ធផលដែលប្រកាសដោយគណបក្សប្រជាជនកម្ពុជា។
លោក គល់ បញ្ញា នាយកប្រតិបត្តិនៃអង្គការខុមហ្វ្រែល បានអះអាងថា លទ្ធផលដែលបានផ្សាយកាលពីថ្ងៃទី២៩ ខែកក្កដានោះ គឺជាលទ្ធផលនៃការបូកសរុបតាមលក្ខណៈវិទ្យាសាស្ត្រ ដែលកំរិតជឿជាក់មានរហូតដល់៩៩ភាគរយ។ ទោះជាយ៉ាងណា លោកអះអាងថា នេះគ្រាន់តែជាលទ្ធផលមិនផ្លូវការតែប៉ុណ្ណោះ ហើយរាល់ការកត់ត្រាសម្រាប់ការគណនាទាំងនោះអាចមានចន្លោះប្រហោង។
ដើម្បីដោះស្រាយមន្ទិលសង្ស័យស្តីពីលទ្ធផលនៃការបោះឆ្នោតដែល គណបក្សប្រឆាំង និងគណបក្សកាន់អំណាចប្រកាសផ្សេងៗគ្នានោះ នាយកប្រតិបត្តិអង្គការ ខុមហ្វ្រែល បានពន្យល់ថា មានតែការផ្ទៀងផ្ទាត់រវាងទម្រង់ ១១០២ ដែលកត់ត្រាដោយគ.ជ.ប និងទម្រង់កត់ត្រា១១០៤ របស់គណបក្សនយោបាយ ដែលបានកត់ត្រាពីការិយាល័យបោះឆ្នោត ដើម្បីស្វែងរកការពិត។
ប៉ុន្តែ លោក ទេព នីថា អគ្គលេខាគណៈកម្មាធិការជាតិរៀបចំការបោះឆ្នោត បានឆ្លើយតបថា កិច្ចការចំពោះមុខរបស់ គ.ជ.ប គឺការត្រួតពិនិត្យលទ្ធផលបោះឆ្នោត និងដោះស្រាយពាក្យបណ្តឹងទាក់ទងនឹងការបោះឆ្នោតជាមុនសិន ដើម្បីបើកផ្លូវឱ្យគ.ជ.ប អាចឈានទៅដល់ការប្រកាសលទ្ធផលជាបណ្ណោះអាសន្ន នៅថ្ងៃទី ១០ សីហា។ ចំណែកឯការផ្ទៀងផ្ទាត់លទ្ធផលតាមសំណើរបស់សង្គមស៊ីវិល នោះនៅមិនទាន់ចាំបាច់ធ្វើពេលនេះទេ។
លោក ហង្ស ពុទ្ធា នាយកប្រតិបត្តិនៃអង្គការអង្កេតការណ៍បោះឆ្នោត ហៅកាត់ថា និកហ្វិក បានសំណូមពរថា ការប្រកាសលទ្ធផលឈ្នះរៀងខ្លួនរបស់គណបក្សនយោបាយនីមួយៗ គួរធ្វើឡើងដោយ ផ្អែកលើលក្ខណៈបច្ចេកទេសពិតៗ និងមិនមែនជាតួលេខនយោបាយដែលធ្វើឱ្យសង្គមចលាចលនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ