ដំណើរការកំទេចអាវុធគីមីស៊ីរី ជួបភាពយឺតយ៉ាវ
នៅថ្ងៃសៅរ៍ម្សិលមិញនេះ អង្គការទទួលបន្ទុកហាមឃាត់អាវុធគីមី ហៅកាត់ថា OIAC បានប្រកាសថា ដំណើរការកំទេចអាវុធគីមីស៊ីរី ជួបភាពយឺតយ៉ាវ។ មូលហេតុគឺដោយសារតែ បញ្ហាសន្តិសុខ និងបញ្ហាឧតុនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
យោងតាមគំរោងអង្គការទទួលបន្ទុកហាមឃាត់អាវុធគីមី OIAC ការកំទេចអាវុធគីមីស៊ីរី ត្រូវធ្វើអោយបានចប់សព្វគ្រប់ នៅថ្ងៃ៣០ធ្នូ ឆ្នាំ២០១៤។ ប៉ុន្តែ នៅថ្ងៃសៅរ៍ម្សិលមិញ លោក ហ្វ្រង់ ក្រាវីនខ្លឺ ប្រធានអង្គការ OIAC បានប្រកាសថា ដំណើរការកំទេចអាវុធគីមីស៊ីរីនេះ ជួបភាពយឺតយ៉ាវ។ បញ្ហាសន្តិសុខ និងឧតុនិយម គឺជាមូលហេតុចំបងនៃភាពយឺតយ៉ាវនេះ។
សម្ភារៈគីមី ដែលជាសម្ភារៈបង្កគ្រោះថ្នាក់នោះ កំពុងតែត្រូវបានដឹកជញ្ជូនចេញពីទឹកដីស៊ីរី យកទៅកំទេចនៅក្នុងដែនទឹកអន្តរជាតិ ពោលគឺការកំទេចធ្វើនៅក្រៅប្រទេសស៊ីរី។ ការកំទេចអាវុធគីមីនេះ គឺត្រូវធ្វើលើនាវាអាមេរិកមួយគ្រឿង ឈ្មោះថា MV Cap Ray។
ប៉ុន្តែ ការដឹកជញ្ជូនអាវុធគីមីដែលមានកម្រិតគ្រោះថ្នាក់ខ្ពស់ជាងគេ ចេញអោយអស់ពីស៊ីរី នៅមុនថ្ងៃ៣១ធ្នូនោះ គឺប្រហែលជាពិបាកសម្រេចទៅរួចណាស់។ ដោយសាររដូវត្រជាក់ខ្លាំងនៅស៊ីរីពេលនេះ សម្ភារៈប្រើដើម្បីដឹកឧស្ម័នជាតិពុល ជួបបញ្ហា។ សម្ភារៈទាំងនេះនៅរាត់រាយនៅទីតាំងជាង១២កន្លែង នៅក្នុងប្រទេសនៅឡើយទេ។ ជាងនេះទៀត ផ្លូវដឹកជញ្ជូន ភ្ជាប់ក្រុងដាម៉ាស ទៅឆ្នេរនៅកំពង់ផែ ឡាតាក់ខ្ចេ នៅមិនទាន់ធានាសន្តិសុខពេញលេញនៅឡើយទេ ថ្វីដ្បិតកងទ័ពប្រធានាធិបតីស៊ីរី កាន់កាប់ផ្លូវនេះក្តី។
គួរបញ្ជាក់ថា នៅកំពង់ផែឡាតាក់ខ្ចេ កប៉ាល់ដាណឺម៉ាក និងកប៉ាល់ន័រវែស នៅចាំនៅទីនោះ ដើម្បីដឹកស្តុកអាវុធគីមី។ ហើយនាវាអាមេរិកនិងចិន នឹងអមដំណើរកប៉ាល់ប្រទេសទាំងពីរ។
គួររំលឹកថា ផែនការកំទេចអាវុធគីមីស៊ិរី កើតចេញពីកិច្ចព្រមព្រៀងរវាងអាមេរិកនិងរុស្ស៊ី។ ផែនការនេះមានទិសដៅជួយស៊ីរីអោយរួចផុតពីការវាយប្រហារយោធាពីសំណាក់អាមេរិក។ អាមេរិកធ្លាប់បានចោទរដ្ឋាភិបាលស៊ីរីដឹកនាំដោយប្រធានាធិបតី បាស្ហារ អាល់ អាសាដ ថាបានប្រើអាវុធគីមីសម្លាប់មនុស្ស ក្នុងទឹកដីស៊ីរី កាលពីខែសីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ