តំណាងរាស្ត្រគណបក្សប្រឆាំងកោះហៅមន្ត្រីជាន់ខ្ពស់រដ្ឋាភិបាលបីរូបមកឆ្លើយបំភ្លឺនៅរដ្ឋសភា
អ្នកតំណាងរាស្ត្រគណបក្សប្រឆាំងបានដាក់លិខិតចំនួនបីជូនទៅលោកនាយករដ្ឋមន្ត្រីហ៊ុន សែន តាមរយៈ លោកហេង សំរិន ប្រធានរដ្ឋសភាដើម្បីឲ្យធ្វើការកោះហៅមន្ត្រីជាន់ខ្ពស់របស់រដ្ឋាភិបាលបាលចំនួនបីរូប ឲ្យចូលខ្លួនមកឆ្លើយបំភ្លឺនៅរដ្ឋសភាជាបន្ទាន់ ទាក់ទិនទៅនិងភាពមិនប្រក្រតីមួយចំនួនដែលបានកើតឡើងក្នុងស្ថាប័នទាំងនោះ។ មន្ត្រីជាន់ខ្ពស់ចំនួនបីរូបដែលត្រូវកោះហៅឲ្យចូលខ្លួនមកបភ្លឺនោះមានដូចជាលោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ លោកស៊ុយ សែម រដ្ឋមន្ត្រីក្រសួងឧស្សាហកម្មរ៉ែនិងថាមពល និងលោកឌិត មន្ទី ប្រធានតុលាការកំពូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
អ្នកតំណាងរាស្ត្រគណបក្សប្រឆាំងបានដាក់លិខិតជាផ្លូវការហើយ ទៅលោកនាយករដ្ឋមន្ត្រីហ៊ុន សែន តាមរយៈប្រធានរដ្ឋសភាដើម្បីស្នើសុំ ឲ្យកោះហៅមន្ត្រីរដ្ឋាភិបាលជាន់ខ្ពស់ចំនួនបីរូប ដើម្បីឲ្យចូលខ្លួនបំភ្លឺផ្ទាល់មាត់នៅរដ្ឋសភាជុំវិញភាពមិនប្រក្រតីមួយចំនួន ដែលបានកើតឡើងនៅក្នុងពេលកន្លងមក។
នៅក្នុងលិខិតចំចួនបីដាច់ដោយឡែកពីគ្នាដែលលោកសុន ឆ័យ អ្នកតំណាងរាស្ត្រគណបក្សសមរង្ស៊ីបានផ្ញើរជូនលោកនាយករដ្ឋមន្ត្រីហ៊ុន សែន តាមរយៈលោកហេង សំរិនប្រធានរដ្ឋសភា កាលពីថ្ងៃទី២៨ ខែធ្នូ នោះមានដូច ជាស្នើសុំលោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃឲ្យចូលខ្លួនមកបំភ្លឺផ្ទាល់មាត់នៅឯរដ្ឋសភាទាក់ទិនទៅនិងភាពមិនប្រក្រតីដូចជា ការយឺតយ៉ាវនិងការយកកម្រៃលើសកំណត់ក្នុងការផ្តល់អត្តសញ្ញាណប័ណ្ណដល់ពលរដ្ឋខ្មែរ។ ការយកកម្រៃលើសការកំណត់ហួសហេតុក្នុងការធ្វើលិខិតឆ្លងដែនជូនពលរដ្ឋខ្មែរទៅធ្វើការនៅបរទេស។ អំពើរពុករលួយក្នុងវិស័យចារចរណ៍ មានការយកលុយខុសច្បាប់ពីរដ្ឋដឹកញ្ជូននិងអ្នកបើកបរយានយន្តផ្សេងទៀតនិងការគ្រប់គ្រងជនអន្តោប្រវេសន៍ខុសច្បាប់នៅក្នុងព្រះរាជណាចក្រកម្ពុជា។
រីឯលិខិតផ្សេងមួយទៀតផ្ញើរជូនលោកស៊ុយ សែម រដ្ឋមន្ត្រីក្រសួងឧស្សាហកម្មរ៉ែនិងថាមពលឲ្យមកឆ្លើយបំភ្លឺផ្ទាល់មាត់នៅរដ្ឋសភាទាក់ទិនទៅនិងករណីមិនប្រក្រតីជាច្រើនកើតមានក្រោមការទទួលខុសត្រូវរបស់លោក ដូចជាការផ្តល់អាជ្ញាប័ណ្ណនិងសិទ្ធធ្វើអាជីវកម្មរ៉ែក្នុងព្រះរាជណាចក្រកម្ពុជា ការផ្តល់អាជ្ញាប័ណ្ណនិងសិទ្ធិធ្វើអាជីវកម្មនៃកាផលិតនិងចែកចាយអគ្គីសនី ការសម្រេចលើការសាងសង់អគ្គីសនីជាមួយក្រុមហ៊ុន ការផ្តល់អាជ្ញាប័ណ្ណសាងសង់និងកិច្ចសន្យា។
លិខិតកោះហៅលោក ឌិត មន្ទីប្រធានតុលាការកំពូល ឲ្យចូលខ្លួនមកបំភ្លឺនៅរដ្ឋសភាជុំវិញការសម្រេចរបស់តុលាការខេត្តស្វាយរៀងដែលបានលើកលែងការចោទប្រកាន់អតីតអភិបាលក្រុងបាវិតលោកឈូក បណ្ឌិតដែលបានបាញ់កម្មការិនីបីនាក់ឲ្យរងរបួស ការដាក់ទោសលោកម៉ម សូណង់ដូ ពលរដ្ឋមួយចំនួននៅក្នុងភូមិប្រម៉ា ខេត្តក្រចេះ និងកាសដាក់ទៅពលរដ្ឋបឹងកក់។
នៅក្នុងលិខិតទាំងបីដែលបានដាក់ជូន តាមរយៈលោកហេង សំរិនប្រធានរដ្ឋសភា គឺស្នើសុំឲ្យចួលខ្លួនមកបំភ្លឺនៅព្រឹកថ្ងៃព្រហស្បត្តិ៍នៅសប្តាហ៍ណាមួយក៍បានក្នុងខែមករាឆ្នាំ ២០១៣ ខាងមុខជាកំហិត។
ឆ្លើយតបទៅនឹងការលើកឡើងរបស់ តំណាងរាស្ត្ររបស់គណបក្សប្រឆាំងសមរង្ស៊ីនោះ លោក ស្មានទៀត តំណាងរាស្ត្រគណបក្សប្រជាជនកម្ពុជា បានលើកឡើងថា វាជាសិទ្ធិរបស់គាត់ក្នុងការកោះហៅមន្ត្រីរដ្ឋាភិបាលឲ្យមកបំភ្លឺនៅចំពោះមុខរដ្ឋសភា។ ហើយជាធម្មតាប្រធានរដ្ឋសភាលោកតែងតែពិនិត្យមើលរាល់ការស្នើសុំនោះ ប្រសិនបើធ្វើទៅតាមនិតិវិធី ប្រធានរដ្ឋសភានឹងមិនជំទាស់នោះទេ។
ទាក់ទងនឹងការឆ្លើយបំភ្លឺតាមការស្នើសុំរបស់តំណាងរាស្ត្រគណបក្សប្រឆាំងនៅក្នុងរដ្ឋសភានោះ កាលពីដើមខែ សីហា ឆ្នាំ២០១២ កន្លងមក លោកនាយករដ្ឋមន្ត្រី ហ៊ុន សែន ក៍បានឡើងឆ្លើយនឹងសំណួររបស់លោក សុន ឆ័យ ជាប្រវត្តិសាស្ត្រផងដែរ ដើម្បីបង្ហាញពីការទទួលខុសត្រូវក្នុងនាមជាអ្នកដឹកនាំ។ តាមការកត់សម្គាល់របស់អ្នកតំណាងរាស្ត្របានឲ្យដឹងថា នៅឆ្នាំ២០១២ មន្ត្រីរដ្ឋាភិបាលកម្ពុជា បានចូលឆ្លើយសំណួររបស់អ្នកតំណាងរាស្ត្របានចំនួនក្រោម ៣០% ដោយភាគច្រើន ឆ្លើយតាមរយៈលិខិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ