កូនជនកុម្មុយនិស្តដ៏ល្បីម្នាក់ជាប់ទោសពីបទប្រឆាំងនយោបាយរដ្ឋាភិបាល
ជាសកម្មជនការពារសិទ្ធិមនុស្ស និងបរិស្ថាន និងជាកូនប្រុសរបស់សកម្មជនកុម្មុយនិស្តស្និទ្ធនឹងមេបក្ស ហូ ជីមិញ លោក គូ ហ៊ុយ ហា វូ (Cu Huy Ha Vu) ត្រូវបានតុលាការប្រជាជនក្រុងហាណូយកាត់ទោសឲ្យជាប់ពន្ធនាគារ ៧ ឆ្នាំពីបទ បាន “ឃោសនានយោបាយប្រឆាំងនឹងរដ្ឋអំណាច” វៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
អាយុ ៥៣ឆ្នាំ លោក គូ ហ៊ុយ ហា វូ (Cu Huy Ha Vu) និតិបណ្ឌិតពីប្រទេសបារាំង ត្រូវទទួលទោស ជាប់ពន្ធនាគារ៧ឆ្នាំ ព្រោះតែលោកបានថ្លែងទៅកាន់សារព័ត៌មានអន្តរជាតិ និងតាមអ៊ិនធឺណែត អំពាវនាវឲ្យមានរបបពហុបក្សនៅក្នុងប្រទេសវៀតណាម។
សម្រាប់តុលាការក្រុងហាណូយ ដែលបានបើកសវនាការតែមួយព្រឹក និងផ្តល់សាលក្រមភ្លាមនៅថ្ងៃចន្ទទី ៤មេសានេះ ឥរិយាបថរបស់លោក វូ អាចនឹងធ្វើឲ្យសង្គមវៀតណាមទទួលរងការខូចខាត។ សំណេរ និងប្រសាសន៍របស់គាត់មានលក្ខណៈមួលបង្កាច់ បង្ខូចឈ្មោះរដ្ឋបាល និងគណបក្សកុម្មុយនិស្ត ដែលកំពុងកាន់អំណាច និងបំរើផលប្រយោជន៍ ដល់ជនមួយក្តាប់តូចប៉ុណ្ណោះ។
សវនាការលោកវូ បានប្រព្រឹត្តទៅក្រោមការការពារ យ៉ាងហ្មត់ចត់បំផុត មានទាំងប៉ូលិសប្រឆាំងភេរវកម្ម ប៉ូលិសក្នុងឯកសណ្ឋាន ប៉ូលិសស្លៀកពាក់ស៊ីវិល និងក្រុមអ្នកពន្លត់អគ្គិភ័យ ព្រោះជាសំណុំរឿងដែលទទួលបានការគាំទ្រពីប្រជាជនយ៉ាងខ្លាំងមិនធ្លាប់មាន។ ម្យ៉ាងទៀតមកពីលោក វូ ជាកូនប្រុសរបស់ជនកុម្មុយនិស្ត លោក គូហ៊ុយគឹង (Cu Huy Can) ស្និទ្ធនឹងលោក ហូ ជីមិញ។
ឪពុកលោកវូ លោក គូហ៊ុយគឹង គឺជាកវីកុម្មុយនិស្តដ៏ល្បីល្បាញ ជាជនកុម្មុយនិស្តដ៏សកម្ម និងជាអតីតសមាជិករដ្ឋាភិបាលបដិវត្តបណ្តោះអាសន្នដំបូង ក្នុងឆ្នាំ១៩៤៥ ដែលបង្កើតឡើងដោយលោក ហូជីមិញ។ លោក ហូ ជីមិញ ដែលជាស្ថាបនិកគណបក្សកុម្មុយនិស្តវៀតណាម និងវៀតណាមទំនើបបច្ចុប្បន្ន។ កំណាព្យដែលមានក្នុងកម្មវិធីសិក្សានៅតាមសាលារៀន ភាគច្រើនជាស្នាដៃនិពន្ធរបស់លោក Cu Huy Can៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ