កំណើនសេដ្ឋកិច្ចរុស្ស៊ីមានចង្វាក់ធ្លាក់ចុះអស់២ត្រីមាសជាប់
ធ្លាក់ចុះនេះគឺមកពីវិបត្តិនៅអ៊ុយក្រែននិងទណ្ឌកម្មពីខាងបស្ចិមលោក។ ស្របនឹងស្ថិតិផ្លូវការចេញផ្សាយនារសៀលថ្ងៃព្រហស្បត៏១៣វិច្ឆិកាកំណើនសេដ្ឋកិច្ចរុស្ស៊ី ក្នុងត្រីមាសទី៣ឆ្នាំនេះ បានធ្លាក់ចង្វាក់មកនៅត្រឹម ០,៧% គឺអន់ជាងក្នុងត្រីមាសទី២ ដែលបានមានកម្រិត ០,៨%គិតសម្រាប់មួយឆ្នាំ។
ចុះផ្សាយនៅថ្ងៃ៖
ស្តាប់ - ០២:១៤
ការវាយតម្លៃនេះអំពីដំណើរវិវឌ្ឍន៍នៃផលិតផលសរុបក្នុងប្រទេសធ្វើដោយ “ស្ថាប័នរដ្ឋរុស្ស៊ីខាងស្ថិតិ” ហៅកាត់ថា RosStat គឺស្របនឹងការទស្សន៍ទាយរបស់រដ្ឋាភិបាលដែលបានព្រមានទៅហើយថាខ្លួន រង់ចាំឃើញតួលេខអវិជ្ជមានទៅផងក្នុងត្រីមាសទី៤។
ប៉ុន្មានឆ្នាំចុងក្រោយកំណើនផលិតផលសរុបក្នុងប្រទេសហៅកាត់ថា GDP បានធ្លាក់ចុះយ៉ាង ជាក់ច្បាស់មែនពោលគឺបើក្នុងឆ្នាំ២០១២កំណើននេះ បានមានកម្រិតដល់៣,៤% នោះក្នុងឆ្នាំ ២០១៣ វាចុះមកនៅក្នុងកម្រិតតែ១,៣%បានន័យថាឃ្លាតឆ្ងាយពីកម្រិត៧%-៨%ដែលសម្គាល់អំណាច ពីរអាណត្តិដំបូងរបស់លោកប្រធានាធិបតីពូទីនពីឆ្នាំ២០០០ដល់២០០៨កាលដែលតម្លៃប្រេងឆៅនិងឧស្ម័នធម្មជាតិដ៏សម្បូណ៌របស់រុស្ស៊ីលក់នៅលើទីផ្សារពិភពលោកបានស្ទុះឡើងមែនទែន ហើយតែងបាននាំចំណូលយ៉ាងក្រាស់ក្រែលដល់ថវិកាជាតិ។
បញ្ហាស្រាប់តែចោទឡើងយ៉ាងធ្ងន់ នៅពីមុខរុស្ស៊ីតាំងពីខែមីនាមក ក្រោយពីរុស្ស៊ីបានភ្ជាប់ យកទឹកដឺគ្រីមេទាំងផ្តាច់វាចេញពីអ៊ុយក្រែនហើយបន្ទាប់មក គាំទ្រដល់ពួកឧទ្ទាមផ្តាច់ទឹកដីដែលរុស្ស៊ីនិយម នៅប៉ែកខាងកើតអ៊ុយក្រែនទាល់តែបង្កឡើងជាវិបត្តិក្នុងប្រទេសនោះ ហើយញ៉ាំងបស្ចិមលោក ដែលស្ថិតនៅខាងអំណាចក្រុងគៀវឲ្យដាក់ទណ្ឌកម្មគ្រប់ជ្រុងជ្រោយទល់នឹងរុស្ស៊ីតែម្តង។
រដ្ឋាភិបាលរុស្ស៊ីសង្ឃឹមថា ទទួលឲ្យបាននូវកំណើនសេដ្ឋកិច្ចសម្រាប់ឆ្នាំនេះគឺ០,៥% និង១,០% សម្រាប់ឆ្នាំក្រោយ។ ប៉ុន្តែធនាគារកណ្តាលក្នុងរបាយការណ៍ចេញសប្តាហ៏នេះប្រមាណថាកំណើននេះ នឺងអាចត្រឹមតែ០,៣%សម្រាប់ឆ្នាំនេះនិង ០% ទេតើសម្រាប់ឆ្នាំក្រោយ។ វិបត្តិអ៊ុយក្រែន ស្រាប់តែឈានមកដល់គឺនៅចំពេលដែលចំណូលបានមកពីការលក់ប្រេងនិងឧស្ម័ន ជាប្រភពជាប្រពៃណី សម្រាប់កំណើនសេដ្ឋកិច្ចរុស្ស៊ីចាប់រីងស្ងួតទៅ។
មិនតែប៉ុណ្ណោះ ធនាគារកណ្តាលព្យាករថា លំហូរដើមទុនចេញពីរុស្ស៊ីក្នុងឆ្នាំនេះ អាចឡើងដល់ទំហំ ១២៨.០០លានដុល្លារដោយមកពីអត្រាប្រាក់រូប្លចេះតែចុះថ្លៃ គិតតាំងពីដើមឆ្នាំនេះមកវា ស្រាលទម្ងន់វា អស់១/៤ទៅហើយទល់នឹងប្រាក់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ