វិបត្តិភាគខាងកើតអ៊ុយក្រែន៖ ឯណាទៅផ្លូវចេញ?
វិបត្តិនៅភាគខាងកើតអ៊ុយក្រែនដែលរងការបះបោរផ្តាច់ទឹកដីពីសំណាក់ពួកឧទ្ទាមនិយមរុស្ស៊ី បានរ៉ាំរ៉ៃអស់រយៈពេលជាច្រើនខែមកហើយ។ វិបត្តិនេះ កាន់តែរីកធំទៅៗ ដោយសាប៉ុន្មានថ្ងៃក្រោយនេះ អ៊ុយក្រែន និង អង្គការអូតង់ បានបង្ហាញភស្តុតាងបញ្ជាក់អំពីវត្តមានរបស់ទាហានរុស្ស៊ីជាច្រើនពាន់នាក់ នៅក្នុងដីអ៊ុយក្រែន ដែលកំពុងជួយប្រយុទ្ធពួកឧទ្ទាម។ ក្នុងពេលនេះ គេកំពុងតែរងចាំមើល ថាតើសហភាពអឺរ៉ុប និងអ៊ុយក្រែន នឹងចាត់វិធានការយ៉ាងណា ចំពោះទង្វើរបស់រុស្ស៊ី ដែលនៅតែប្រកែកបែបហី ថារុស្ស៊ីមិនបានបញ្ជូនទ័ពទៅជួយពួកឧទ្ទាមនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោកស្រីប្រធានាធិបតីប្រទេសលីទុយអានី បានមានប្រសាសន៍ដោយចំៗ នៅថ្ងៃសៅរ៍ម្សិលមិញថា រុស្ស៊ីកំពុងតែធ្វើសង្គ្រាមជាមួយសហភាពអឺរ៉ុប។ លោកស្រីលើកឡើងបែបនេះ ដោយសាតែប៉ុន្មានថ្ងៃចុងក្រោយនេះ ប្រទេសលោកខាងលិចទាំងអស់លែងសង្ស័យអ្វីទៀតហើយ អំពីវត្តមានរបស់ទាហានរុស្ស៊ីក្នុងទឹកដីអ៊ុយក្រែន។ រុស្ស៊ីបញ្ជូនទ័ពទៅវាយអ៊ុយក្រែន មានន័យថា រុស្ស៊ីកំពុងតែច្បាំងជាមួយសហភាពអឺរ៉ុប។ ការបញ្ជូនកម្លាំងទ័ពចូលទៅក្នុងប្រទេសមួយ ដោយគ្មានការព្រមព្រៀងពីប្រទេសម្ខាស់ផ្ទះ គឺជាការរំលោភលើច្បាប់អន្តរជាតិទាំងស្រុង។
ក្រោយការប្រជុំគណៈកម្មការសហភាពអឺរ៉ុប ដែលបានធ្វើឡើង នៅល្ងាចថ្ងៃសៅរ៍ នៅក្រុងប្រុយស៊ែលលោក José Manuel.Barroso ប្រធានគណៈកម្មការអឺរ៉ុប បានមានប្រសាសន៍ថា ប្រទេសសមាជិកសហភាពអឺរ៉ុប ត្រៀមខ្លូមរូចជាស្រេច ក្នុងការសម្រេចដាក់ទណ្ឌកម្មបន្ថែមលើរុស្ស៊ី។ លោកថែមទាំងបានទូរស័ព្ទទៅនិយាយជាមួយលោក ពូទីន ប្រធានាធិបតីរុស្ស៊ី ដើម្បីឲ្យរុស្ស៊ីបញ្ឈប់ជាបន្ទាប់ នូវការបញ្ជូនទ័ពទៅជួយពួកឧទ្ទាម បង្កអំពើហិង្សាកាន់តែខ្លាំងឡើងៗ នៅភាគខាងកើតអ៊ុយក្រែន។ លោកបន្តថា ស្ថានភាពបច្ចុប្បន្នគឺជាស្ថានភាពធ្ងន់ធ្ងរបំផុត រវាងអឺរ៉ុប និង រុស្ស៊ី។ គេត្រូវតែដោះស្រាយវាឲ្យបាន មុននឹងវាយឺតពេល។
ដោយសាតែមានជំនួយពីពួកទាហានរុស្ស៊ីនេះហើយ ទើបក្នុងពេលពីរបីថ្ងៃចុងក្រោយនេះ ពួកឧទ្ទាមបានវាយសង្គ្រប់លើទាហានរដ្ឋាភិបាលអ៊ុយក្រែន។ បើតាមសម្តីរបស់មេពួកឧទ្ទាមម្នាក់និយាយថា ពួកឧទ្ទាមបានកាន់កាប់ដែនដីចំនួន៥០ ភាគរយនៃតំបន់ ដូនែតស្ក៍។ ទាហានអ៊ុយក្រែនបានថមថយកម្លាំងជាគំហុក។ លោកប៉េត្រូ ប៉ូរ៉ូឆិនកូ បានប្រកាសសុំជំនួយយោធាពីបណ្តាប្រទេសជាមិត្ត ព្រោះស្ថានភាពកាន់តែដុនដាបទៅ។ អ៊ុយក្រែនថែមទាំងបង្ហើបឲ្យដឹងថា ខ្លួននឹងរៀបចំចូលជាសមាជិកអង្គការអូតង់ ដើម្បីឲ្យប្រទេសសម្ព័ន្ធមិត្តរបស់អូតង់ បញ្ជូនទ័ពមកជួយ។
ចំណែកនៅរុស្ស៊ីវិញ មានលិចឮ ពត៌មានថា មានក្រុមគ្រួសារទាហានរុស្ស៊ីដែលត្រូវគេបញ្ជូនទៅអ៊ុយក្រែន បានចេញមុខមកតវ៉ា សុំឲ្យបញ្ជូនទាហានទាំងនោះមកវិញ។ មានទាហានរុស្ស៊ីជាច្រើននាក់ បានស្លាប់ ហើយត្រូវគេបញ្ជូនខ្មោចមកវិញ។ តំណាងរាស្រ្តគណៈបក្សប្រឆាំងរុស្ស៊ីម្នាក់ ដែលបានស៊ើបអង្កេតរឿងនេះ ហើយបានចូលរួមបុណ្យសពរបស់ពួកទាហាន ត្រូវបានជនមិនស្គាល់មុខ វាយធ្វើបាបយ៉ាងដំណំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ