មូលហេតុការធ្លាក់យន្តហោះAH5017 នៅមិនទាន់ដឹងច្បាស់ដោយសារប្រអប់ខ្មៅមានការខូចខាត
ពីរសប្តាហ៍កន្លងមកហើយបន្ទាប់ពីយន្តហោះAH5017 របស់ក្រុមហ៊ុនអាកាសចរណ៍អាល់ហ្សេរីបានធ្លាក់នៅប្រទេសម៉ាលី។ ថ្វីត្បិតតែប្រអប់ខ្មៅទាំងពីរត្រូវបានគេរកឃើញ ប៉ុន្តែគេនៅមិនទាន់អាចសន្និដ្ឋានពីមូលហេតុពិតប្រាកដដែលបណ្តាលឲ្យយន្តហោះធ្លាក់ទេ ដោយសារតែប្រអប់ខ្មៅទីពីរដែលថតសំឡេងឆ្លើយឆ្លងនៅក្នុងពេលហោះហើរ បានរងនូវការខូចខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅរសៀលថ្ងៃព្រហស្បតិ៍ទី៧សីហានេះ អ្នកតំណាងការិយាល័យស៊ើបអង្កេតនិងវិភាគទៅលើគ្រោះថ្នាក់ធ្លាក់យន្តហោះរបស់ក្រុមហ៊ុនអាកាសចរណ៍អាល់ហ្សេរីដែលបានធ្លាក់នៅប្រទេសម៉ាលី បានធ្វើសន្និសីទកាសែតមួយនៅក្រុងបួកហ៊្សេ ប្រទេសបារាំង។ នាយកការិយាល័យស៊ើបអង្កេតនេះបានឲ្យដឹងថា ប្រអប់ខ្មៅទីពីរដែលផ្ទុកសម្លេងឆ្លងឆ្លើយរបស់អាកាសយានិក បានរងការខូចខាត ហើយមិនអាចផ្តល់ពត៌មានអ្វីបានទេនាពេលនេះ។ អ្នកបច្ចេកទេសកំពុងតែខិតខំរកគ្រប់មធ្យោបាយ ដើម្បីទាញយកសម្លេងដែលថត ហើយគេរំពឹងថានឹងអាចទាញយកសម្លេងដែលនៅក្នុងនោះបានរួចរាល់ នៅពាក់កណ្តាលខែកញ្ញាខាងមុខ។
ទោះជាយ៉ាងណាលោកប្រធានការិយាល័យស៊ើបអង្កេតគ្រោះថ្នាក់យន្តហោះនេះ បានធ្វើការសន្និដ្ឋានជាបឋមថា បើយោងទៅតាមតួលេខនៃការហោះហើរយន្តហោះទំនងមិនបានផ្ទុះនៅពេលកំពុងហោះហើរនោះទេ។ លោកក៏បានសង្កត់ធ្ងន់ថា ពេលនេះគេនៅមិនទាន់មានពត៌មានច្បាស់លាស់ ដែលអាចឈានទៅដល់ការសន្និដ្ឋានជាផ្លូវការទេ។ គេត្រូវរងចាំទទួលលទ្ធផលនៃការទាញយកសម្លេងឆ្លងឆ្លើយដែលមានក្នុងប្រអប់ខ្មៅទីពីរ។
សូមបញ្ជាក់ថា ជាទូទៅតាមបទដ្នានអាកាសចរណ៍អន្តរជាតិ គ្រប់យន្តហោះទាំងអស់ត្រួវមានប្រអប់ខ្មៅ២។ ប្រអប់ទីមួយមានទួនាទីថតទុក រាល់តួលេខនៃការហោះហើររបស់យន្តហោះ ដូចជារយៈចំងាយ រយៈកម្ពស់ និងល្បឿនយន្តហោះជាដើម។ ចំណែកប្រអប់ខ្មៅទីពីរមានទួនាទីថតសម្លេងទាំងអស់ ដែលមាននៅក្នុងយន្តហោះ ទាំងសម្លេងឆ្លើយឆ្លងរបស់អាកាសយានិក និងសម្លេងប្រកាសផ្សេងៗក្នុងពេលហោះហើរ។ សម្លេងឆ្លើយឆ្លងរបស់អាកាសយានិកក្នុងបន្ទប់បើកបរយន្តហោះ អាចផ្តល់ពត៌មានច្បាស់លាស់ស្តីពីហេតុការណ៍ដែលកើតមានឡើង បណ្តាលឲ្យយន្តហោះធ្លាក់។
យន្តហោះ AH5017របស់ក្រុមហ៊ុនអាកាសចរណ៍អាល់ហ្សេរីបានធ្លាក់នៅក្នុងប្រទេសម៉ាលី កាលពីថ្ងៃទី២៤កក្កដា។ យន្តហោះនោះជាប្រភេទយន្តហោះMD-83 ដែលមានផ្ទុកមនុស្សចំនួន១១៦នាក់។ ភ្លាមៗក្រោយហេតុការណ៍ ប្រទេសម៉ាលីបានប្រគល់ការស៊ើបអង្កេតលើគ្រោះថ្នាក់នេះទៅឲ្យការិយាល័យស៊ើបអង្កេតរបស់បារាំង ដែលត្រូវគេទទួលស្គាល់ថាមានអ្នកជំនាញ និងបច្ចេកទេសច្បាស់លាស់ ក្នុងការស៊ើបអង្កេត និងវិភាគរកមូលហេតុនៃការធ្លាក់យន្តហោះ។ តាមការសន្និដ្ឋានបឋម យន្តហោះទំនងជាបានឆ្លងកាត់តំបន់ដែលមានខ្យល់ព្យុះ និងភ្លៀងខ្លាំង ដែលបណ្តាលឲ្យល្បឿនយន្តហោះចុះថយជាគំហុក មុននិងត្រូវខ្យល់ព្យុះវាយទំលាក់ដល់ដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ