បក្សប្រជាជនកម្ពុជា និងបក្សសង្គ្រោះជាតិព្រមដឹកដៃគ្នាបន្តចរចា នៅថ្ងៃទី១៧មីនា
នៅថ្ងៃសុក្រទី១៤ មីនានេះ គណបក្សប្រជាជនកម្ពុជា បានឆ្លើយតបលិខិតទៅកាន់គណបក្សសង្គ្រោះជាតិដែលជាដៃគូរចរចារបស់ខ្លួនវិញហើយ។ ជាការឆ្លើយតបដែលបានឯកភាពយកប្រធានបទ កែទម្រង់ស្ថាប័នរៀបចំការបោះឆ្នោត បញ្ចូលទៅក្នុងរបៀបវារៈនៃកិច្ចប្រជុំថ្ងៃទី១៧ មីនាខាងមុខ។ ចម្លើយនេះត្រូវបានគណបក្សសង្គ្រោះជាតិទទួលយក និងយល់ព្រមចូលតុចរចាជាថ្មីបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៤
ទីបំផុតទៅដៃគូជម្លោះទាំងពីរបានយល់ព្រមបន្តការចរចាជាមួយគ្នា នៅថ្ងៃទី១៧ មីនាសប្តាហ៍ក្រោយហើយ បន្ទាប់ពីមានការគម្រាមទាត់ចោលតុចរចា និងធ្វើបាតុកម្មពីគណបក្សប្រឆាំង។ គណបក្សប្រឆាំងដែលបានចោទបក្សកាន់អំណាចថា មិនព្រមលើកយករបៀបវារៈនៃកំណែទម្រង់គណៈកម្មាធិការជាតិរៀបចំការបោះឆ្នោត ដាក់លើតុចរចា។
ក្នុងលិខិតឆ្លើយតបទៅកាន់គណបក្សសង្គ្រោះជាតិ ដែលត្រូវបានផ្សព្វផ្សាយក្នុងគេហទំព័រគណបក្សប្រជាជនកម្ពុជា នៅថ្ងៃសុក្រនេះ លោក ប៊ិន ឈិន ប្រធានក្រុមចរចាមកពីគណបក្សកាន់អំណាចបានយល់ព្រមឯកភាពយកប្រធានបទ កែទម្រង់ស្ថាប័នរៀបចំការបោះឆ្នោត បញ្ចូលទៅក្នុងក្របខណ្ឌកំណែទម្រង់ការបោះឆ្នោត។
លោក ប៊ិន ឈិន បានបញ្ជាក់ថា ដើម្បីឱ្យការសិក្សានិងរៀបចំក្របខណ្ឌកំណែទម្រង់ការបោះឆ្នោតនាពេលខាងមុខ គណបក្សប្រជាជនកម្ពុជា សម្តែងសុទិដ្ឋិនិយមបន្តការពិភាក្សាតាមស្មារតីនៃកិច្ចប្រជុំថ្ងៃទី១០ មីនា កន្លងទៅ។ កិច្ចប្រជុំថ្ងៃទី១០ មីនាដែលគណបក្សទាំងពីរមិនបានចេញសេចក្តីថ្លែងការណ៍រួមនោះទេ ដោយសារតែប្រកាន់យករបៀបវារៈពីរដាច់ដោយឡែកពីគ្នា។
លោក ម៉ៅ មុនីវណ្ណ សមាជិកនៃគណៈកម្មការចរចារបស់គណបក្សសង្គ្រោះជាតិ បានប្រាប់វិទ្យុបារាំងអន្តរជាតិនៅថ្ងៃសុក្រនេះថា គណបក្សសង្គ្រោះជាតិនឹងវិលចូលតុចរចាជាមួយគណបក្សប្រជាជនកម្ពុជានៅថ្ងៃ១៧ សប្តាហ៍ក្រោយនេះ។
សូមរំលឹកថា ក្រោយកិច្ចប្រជុំដែលមិនទទួលបានលទ្ធផលផ្លែផ្កានោះ ប្រធានគណបក្សសង្គ្រោះជាតិ លោក សម រង្ស៊ី បានប្រកាសផ្តាច់ផ្លូវចរចាជាមួយបក្សកាន់អំណាចរបស់លោក នាយករដ្ឋមន្ត្រីហ៊ុន សែន ហើយប្រកាសឱ្យសកម្មជនរបស់ខ្លួនត្រៀមធ្វើបាតុកម្មទ្រង់ទ្រាយធំ។
សូមបញ្ជាក់ថា កាលពីថ្ងៃពុធទី១៣ មីនា លោក សុន ឆ័យ ប្រធានក្រុមចរចានៃគណបក្សសង្គ្រោះជាតិបានសរសេរលិខិត ផ្ញើទៅកាន់គណបក្សប្រជាជនដើម្បីស្នើសុំឱ្យបក្សកាន់អំណាចបញ្ជាក់ពីគោលជំហរថា តើរបៀបវារៈស្តីពីកំណែទម្រង់ស្ថាប័នរៀបចំការបោះឆ្នោតនឹងត្រូវលើកដាក់លើតុចរចាសម្រាប់ថ្ងៃទី១៧មីនា ឬយ៉ាងណា?
ក្នុងលិខិតដែលផ្ញើជូនលោក ប៊ិន ឈិន ប្រធានក្រុមចរចានៃបក្សប្រជាជនកម្ពុជា លោក សុន ឆ័យ បានបញ្ជាក់ថា ប្រធានបទពាក់ព័ន្ធនឹងការកែទម្រង់ស្ថាប័នរៀបចំការបោះឆ្នោត ឱ្យទៅជាស្ថាប័នរដ្ឋធម្មនុញ្ញដែលឯករាជ្យ នឹងមានការជ្រើសតាំងក្បាលម៉ាស៊ីនដឹកនាំដោយសំឡេងពីរភាគបី នៃសមាជិកសភាទាំងមូល។ លោក សុន ឆ័យ សង្កត់ធ្ងន់ថា ប្រការនេះ គឺមានលក្ខណៈចាំបាច់អាទិភាព សម្រាប់ការងារកែទម្រង់ការបោះឆ្នោតដែលមិនអាចរំលងបាន។
ប៉ុន្តែយ៉ាងណាក៏ដោយ ក្នុងលិខិតដែលចុះហត្ថលេខាដោយ លោកប៊ិន ឈិន គណបក្សប្រជាជនកម្ពុជា បានបញ្ជាក់ថា ប្រធានបទកំណែទម្រង់ស្ថាប័នរៀបចំការបោះឆ្នោត និងអព្យាក្រិតភាព និងសុចរិតភាពនៃសង្គមស៊ីវិល ក្នុងការបោះឆ្នោតនោះ នៅមិនទាន់បានសម្រេចដាក់បញ្ចូលទៅក្នុងក្របខណ្ឌកំណែទម្រង់នៃការបោះឆ្នោតនៅឡើយទេ។
បើទោះបីជាបែបណាក៏ដោយ ការដែលគណបក្សប្រជាជនកម្ពុជា និងគណបក្សសង្គ្រោះជាតិ យល់ព្រមបន្តការចរចាជាមួយគ្នា នៅថ្ងៃទី១៧មីនាដើមសប្តាហ៍ គឺជារឿងគួរឱ្យលើកទឹកចិត្ត ហើយពលរដ្ឋពលកម្ពុជាទាំងមូល កំពុងទន្ទឹងរង់ចាំលទ្ធផលជាផ្លែផ្កា ពីគណបក្សនយោបាយទាំងពីរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ