មន្ត្រីគណបក្សប្រជាជន៖ បាតុកម្មគណបក្សសង្គ្រោះជាតិដើម្បីបុគ្គលបក្សផ្ទាល់ខ្លួនតែប៉ុណ្ណោះ
ភ្លាមៗក្រោយការធ្វើបាតុកម្មអហិង្សារបស់គណបក្សសង្គ្រោះជាតិចប់នៅព្រឹកថ្ងៃសៅរ៍នេះ មន្ត្រីជាន់ខ្ពស់គណបក្សប្រជាជនកម្ពុជា បានហៅការធ្វើបាតុកម្មនេះថា ជាការផ្តល់ផលចំណេញទៅដល់បុគ្គលគណបក្សសង្គ្រោះជាតិដែលមានលោក សម រង្ស៊ី និងលោក កឹម សុខា តែប៉ុណ្ណោះ។ ការអត្ថាធិប្បាយនេះបានធ្វើឡើង ខណៈដែលគណបក្សសង្គ្រោះជាតិនៅតែទាមទារបង្កើតគណៈកម្មការចម្រុះឯករាជ្យ នៅមុនការប្រកាសលទ្ធផលជាផ្លូវការ ដែលត្រូវធ្វើឡើងដោយគ្មានការប្រែប្រួលនៅថ្ងៃស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
បើតាមលោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា ការធ្វើមហាបាតុកម្មរបស់គណបក្សសង្គ្រោះជាតិ ដើម្បីទាមទារបង្កើតគណៈកម្មការចម្រុះឯករាជ្យ ធ្វើការស៊ើបអង្កេត និងដោះស្រាយភាពមិនប្រក្រតីនៃការបោះឆ្នោត ជាការផ្តល់ផលចំណេញដល់បុគ្គលគណបក្សលោក សម រង្ស៊ី និង លោក កឹម សុខា តែប៉ុណ្ណោះ។
លោក ជាម យៀប បញ្ជាក់ថា ការធ្វើបាតុកម្មវាមិនមែនជាមធ្យោបាយ ដែលស្តែងឲ្យឃើញ សម្រាប់ការដោះស្រាយលទ្ធផលបោះឆ្នោតនោះទេ ពីព្រោះ រាល់បញ្ហាដែលបានកើតឡើងត្រូវបានប្រគល់សិទ្ធិទៅឲ្យគ.ជ.ប និងក្រុមប្រឹក្សាធម្មនុញ្ញជាអ្នកដោះស្រាយ។ ជាការដោះស្រាយ និងសម្រេចដោយផ្អែកលើរដ្ឋធម្មនុញ្ញទាំងស្រុង។ ដូច្នេះ ការទាមទារបង្កើតគណៈកម្មការចម្រុះឯករាជ្យនោះ វាជាការខុសច្បាប់ និងមិនគោរពតាមច្បាប់រដ្ឋធម្មនុញ្ញ។
គួររំលឹកថា ក្នុងមហាបាតុកម្មនៅព្រឹកថ្ងៃសៅរ៍ លោកសម រង្ស៊ី បានប្រកាសសុំការយល់ព្រមពីក្រុមបាតុករ ឲ្យមានការពន្យារពេលប្រកាសលទ្ធផលបោះឆ្នោតរបស់គ.ជ.ប។ ជាការពន្យារពេលដែលប្រធានគណបក្សប្រឆាំងរូបនេះអះអាងថា ដើម្បីបង្កើតគណៈកម្មការចម្រុះឯករាជ្យមួយធ្វើការស៊ើបអង្កេត និងដោះស្រាយភាពមិនប្រក្រតីនៃការបោះឆ្នោត ក្នុងអាណត្តិទី៥ ប្រយោជន៏ដើម្បីប្រជាពលរដ្ឋម្ចាស់ឆ្នោតទទួលបានយុត្តិធម៌ពិតប្រាកដពីការបោះឆ្នោតនេះ។ ប្រធានគណបក្សប្រឆាំងរូបនេះបានអះអាងថា នឹងបន្តធ្វើមហាបាតុកម្មបើគ.ជ.ប នៅតែរឹងទទឹងប្រកាសលទ្ធផល នៅថ្ងៃស្អែកនេះ។
ប៉ុន្តែលោក ជាម យៀប បានហៅការទាមទារពន្យារពេលប្រកាសលទ្ធផលបោះឆ្នោត និងការបន្តធ្វើមហាបាតុកម្មនៅទូទាំងប្រទេសរបស់គណបក្សសង្គ្រោះជាតិ ថាមិនបានថ្លឹងថ្លែងពីផលចំណេញ និងការខាតបង់ឲ្យបានច្បាស់លាស់នោះទេ។ លោកថា វាជារឿងឥតប្រយោជន៏ ដែលធ្វើឡើងដើម្បីផលប្រយោជន៏ផ្ទាល់ខ្លួនរបស់គណបក្ស ខណៈដែលពេលវេលានៅសល់មិនដល់១០ម៉ោងផងនោះ លទ្ធផលឆ្នោតនឹងត្រូវប្រកាសជាផ្លូវការនោះ។
ចំណែកលោកឧត្តមសេនីយ៏ឯក ខៀវ សុភ័គ មន្ត្រីនាំពាក្យក្រសួងមហាផ្ទៃ បានវាយតម្លៃថា ការធ្វើមហាបាតុកម្មរបស់គណបក្សសង្គ្រោះជាតិ បានប្រព្រឹត្តទៅបានល្អដោយមិនមានអំពើហិង្សាណាមួយកើតឡើងរវាងក្រុមសមត្ថកិច្ច និងក្រុមបាតុករនោះទេ បើទោះបីជាគណបក្សនេះមិនបានគោរពចំនួនអ្នកចូលរួមតាមការកំណត់ក៏ដោយ។
ដោយឡែកលោក កែម ឡី អ្នកវិភាគនយោបាយឯករាជ្យ បានកោតសរសើរចំពោះបាតុកម្មអហិង្សារបស់គណបក្សសង្គ្រោះជាតិកាលពីព្រឹកមិញ ដែលមិនមានការប៉ះទង្គិចបង្កទៅជាអំពើហិង្សា។ សម្រាប់អ្នកវិភាគឯករាជ្យរូបនេះ វាជាសញ្ញាដែលបង្ហាញពីដំណើរការឆ្ពោះទៅរកលទ្ធិប្រជាធិបតេយ្យតាមបែបអហិង្សា ហើយវាក៏ជាសញ្ញាមួយប្រាប់ទៅដល់អ្នកដឹកនាំកុំឲ្យមានការភ័យខ្លាចចំពោះបាតុកម្មអហិង្សាបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ