ក្រសួងមហាផ្ទៃនិងសង្គមស៊ីវិលចោទគ្នាទៅវិញទៅមកជុំវិញរឿងបិទអង្គការមូលនិធិកុមារកំព្រា
ក្រសួងមហាផ្ទៃនិងអង្គការសង្គមស៊ីវិលបាននិងកំពុងចោទប្រកាន់ដាក់គ្នាទៅវិញទៅមកជុំវិញរឿងបិទអង្គការមូលនិធិកុមារកំព្រាកម្ពុជានៅខេត្តសៀមរាប។ អង្គការសង្គមស៊ីវិលគ្រោងនឹងរៀបចំសន្និសីទកាសែតនៅថ្ងៃចន្ទស្អែកដើម្បីនិយាយពីបញ្ហាបិទអង្គការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ការបិទអង្គការមូលនិធិកុមារកំព្រាកម្ពុជានៅក្នុងខេត្តសៀមរាបបានក្លាយទៅជារឿងដ៏ចម្រូងចម្រាសរវាងក្រសួងមហាផ្ទៃនិងក្រុមអង្គការសង្គមស៊ីវិលមួយចំនួន។
ក្រុមអង្គការសង្គមស៊ីវិលបានចោទប្រកាន់ថា ការសម្រេចបិទអង្គការរបស់ក្រសួងមហាផ្ទៃគឺជារឿងមិនត្រឹមត្រូវប៉ុន្តែក្រសួងមហាផ្ទៃវិញបានលើកឡើងថាគឺជាការចាំបាច់ដែលត្រូវតែបិទពីព្រោះថ្នាក់ដឹកនាំអង្គការមួយចំនួន បានប្រព្រឹត្តបទល្មើសអនាចារលើកុមារ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានចោទប្រកាន់ថ្នាក់ដឹកនាំអង្គការមូលនិធិកុមារកំព្រាកម្ពុជានៅក្នុងខេត្តសៀមរាបថា បានប្រព្រឹត្តបទល្មើសរំលោភលើកុមារកំព្រាដែលខ្លួនបានបីបាច់ចិញ្ចឹម។ អ្នកនាំពាក្យរូបនេះបានបញ្ជាក់នៅថ្ងៃអាទិត្យនេះថា ប្រធានក្រុមប្រឹក្សាភិបាលរបស់អង្គការបានដេកជាមួយកុមារយ៉ាងតិចណាស់ក៏៥នាក់ដែរ។ ដូច្នេះ ក្រសួងត្រូវតែលុបអង្គការនេះចេញពីបញ្ជីនៃក្រសួងមហាផ្ទៃ។
លោក ខៀវ សុភ័គ បានអំពាវនាវអោយមហាជនវិនិច្ឆ័យលើបញ្ហានេះថា តើគួរបិទឬមិនបិទ។ បើទោះបីជាមានការបកស្រាយពន្យល់របស់តំណាងក្រសួងមហាផ្ទៃយ៉ាងណាក៏ដោយ ក៏ក្រុមអង្គការសង្គមស៊ីវិលនៅក្នុងប្រទេសកម្ពុជាមួយចំនួននិងប្រធានអង្គការមូលនិធិកុមារកំព្រាកម្ពុជានៅក្នុងខេត្តសៀមរាបបានថ្លែងជំទាស់ទៅនឹងការបិទនេះ។
លោក សន ជ័យ ប្រធានអង្គការដើម្បីតម្លាភាពនិងគណនេយ្យភាពសង្គមដែលគ្រោងនឹងរៀបចំសន្និសីទកាសែតនៅថ្ងៃចន្ទស្អែកនិយាយអំពីរឿងបិទអង្គការមូលនិធិកុមារកំព្រាកម្ពុជា បានថ្លែងការពារនៅថ្ងៃអាទិត្យនេះថា មិនមានការរំលោភលើកុមារដូចការចោទប្រកាន់ទេប៉ុន្តែគ្រាន់តែថា ជនបរទេសដែលជាប្រធានក្រុមប្រឹក្សាភិបាលរូបនោះធ្លាប់បានលេចប្រដាប់ភេទនៅពេលសម្រាន្តអស់កម្លាំងខ្លាំងពេក។ ហើយករណីនេះវាបានកើតឡើងតាំងពីឆ្នាំ២០០៧កន្លងមកពោលគឺមុនការបង្កើតអង្គការមូលនិធិកុមារកំព្រាកម្ពុជានៅឆ្នាំ២០០៩ទៅទៀត។ បើយោងតាមលោក សន ជ័យ ករណីជនបរទេសនេះគឺជារឿងដាច់ដោយឡែកពីរឿងអង្គការមូលនិធិកុមារកំព្រាកម្ពុជា។
លោក ចាន់ រស្មី ប្រធានអង្គការមូលនិធិកុមារកំព្រាកម្ពុជាដែលធ្លាប់ត្រូវបានតុលាការឃុំខ្លួនបណ្តោះអាសន្ន រួចដោះលែងអោយមានសេរីភាពឡើងវិញទាក់ទងទៅនឹងការចោទប្រកាន់ថា បាននាំក្មេងៗខុសច្បាប់នោះ បានអំពាវនាវនៅថ្ងៃនេះសូមអោយក្រសួងមហាផ្ទៃអនុញ្ញាតអោយអង្គការរបស់លោកដំណើរការឡើងវិញ។ លោកមិនបានធ្វើអ្វីខុសទេ។ លោកជាមនុស្សស្អាតស្អំ។
សូមបញ្ជាក់ថា កាលពីពេលថ្មីៗកន្លងមកនេះ សមាគមធាងត្នោតក៏ត្រូវបានក្រសួងមហាផ្ទៃផ្អាកសកម្មភាពដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ