ជប៉ុនកោះហៅទូតចិន ដើម្បីតវ៉ារឿងយន្តហោះចម្បាំងចិនហោះកៀកយន្តហោះជប៉ុន
នៅថ្ងៃព្រហស្បតិ៍ម្សិលមិញនេះ នៅទីក្រុងតូក្យូ អាជ្ញាធរជប៉ុនបានកោះហៅតំណាងស្ថានទូតចិនឲ្យចូលជួប ក្នុងគោលបំណងសាកសួរ អំពីការដែលយន្តហោះប្រដេញរបស់ចិនបានហោះកៀកជិត ដ៍គួរឲ្យគ្រោះថ្នាក់បំផុត ជាមួយនឹងយន្តហោះអង្កេតការណ៍របស់ជប៉ុន។ ហេតុការណ៍នេះ បានកើតមានឡើងកាលពីថ្ងៃពុធ នៅពេលដែលយន្តហោះប្រដេញរបស់ចិនពីរគ្រឿង បានហោះកៀកចម្ងាយប្រមាណជា ៣០មែត្រប៉ុណ្ណោះ ពីយន្តហោះអង្កេតការណ៍របស់ជប៉ុន នៅតាមព្រំដែនអាកាសរវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
យោងតាមសម្តីរបស់ អ្នកនាំពាក្យរដ្ឋាភិបាលជប៉ុន ប្រទេសជប៉ុនបានចាត់ទុកថា ការដែលយន្តហោះប្រដេញរបស់ចិនហោះប្រកៀកជាមួយនឹងយន្តហោះអង្កេតការណ៍ជប៉ុន គឺជាទង្វើមួយដែលអាចបង្កឲ្យមានគ្រោះថ្នាក់ ហើយមិនគួរឲ្យអត់ឱនបាននោះទេ។ ប្រឈមមុខនឹងការចោទប្រកាន់នេះ អាជ្ញាធរចិនបានឆ្លើយតបទៅវិញ ដោយបានទម្លាក់កំហុសទៅលើអាកាសយានិកជប៉ុន ហើយថាជប៉ុនបានកុហកទាំងស្រុង។ តាមការរាយការណ៍របស់ក្រសួងការពារជាតិចិន យន្តហោះប្រដេញរបស់ចិនបានធ្វើការហោះហើរ យ៉ាងត្រឹមត្រូវ ផ្ទុយទៅវិញ អ្នកបើកបរយន្តហោះជប៉ុនទេ ដែលបានធ្វើការហោះហើរបង្ករឿង។ តាមសម្តីអ្នកនាំពាក្យក្រសួងការបរទេសចិន ជប៉ុនបានប្រឌិតរឿង កុហកគេឯងទាំងស្រុងក្នុងរឿងនេះ។
គួររំលឹកផងដែរថា ហេតុការណ៍ប្រហាក់ប្រហែលគ្នានេះ ធ្លាប់បានកើតមានរួចមកហើយ កាលពីចុងខែឧសភាថ្មីៗនេះ។ កាលនោះមានយន្តហោះប្រដេញចិន២គ្រឿងដែរ បានហោះប្រកៀកនឹងយន្តហោះអង្កេតការណ៍របស់ជប៉ុនចម្ងាយប្រមាណ៣០ និង ៥០មែត្រ។ ហេតុការណ៍នោះបានត្រូវអាជ្ញាធរចិនច្រានចោល ហើយបានទាមទារឲ្យជប៉ុន គោរពនូវសិទ្ធដោយស្របច្បាប់របស់យន្តហោះចិន ដែលបានធ្វើការហ្វឹកហាត់សម រួមគ្នាជាមួយយន្តហោះរុស្សី។
ទំនាក់ទំនងរវាងចិននិងជប៉ុន ដែលជាមហាអំណាចសេដ្ឋកិច្ចអាស៊ីដ៏ធំទាំងពីរ បានទទួលរងនូវភាពល្អក់កករ និងតានតឹងជាងពីរឆ្នាំមកហើយ ដោយសារប្រទេសទាំងពីរដណ្តើមគ្នាកាន់កាប់ប្រជុំកោះ ស៊ិនកាគុ ដែលបច្ចុប្បន្នប្រជុំកោះនេះស្ថិតក្រោមការគ្រប់គ្រងរបស់ជប៉ុន។
ប្រទេសទាំងពីរកំពុងតែស្វែងរកការគាំទ្ររៀងៗខ្លួន ពីមជ្ឈដ្ឋានអន្តរជាតិក្នុងការទាមទាររបស់ខ្លួន។ ហេតុការណ៍លើកនេះកើតឡើងចំពេលដែលជប៉ុនបានជួបប្រជុំជាមួយអូស្ត្រាលី ក្នុងគោលបំណងពិភាក្សាអំពីយុទ្ធសាស្រ្តក្នុងការការពារតំបន់អាស៊ីប៉ាស៊ីហ្វិកពីការឈ្លានពានណាមួយ។ ជប៉ុនក៏បានដើរតួនាទីជាប្រទេសបង្អែកផងដែរ សម្រាប់ប្រទេសមួយចំនូនដែលកន្លងមក មានទំនាស់ដែនដីជាមួយចិន ជាអាថទិ៍ប្រទេសវៀតណាម និង ហ្វីលីពីន។ វាជាសំណាងល្អណាស់ ដែលការប៉ះទង្គិចលើកនេះវាមិនបណ្តាលឲ្យមានគ្រោះថ្នាក់ធ្លាក់យន្តហោះរបស់ភាគីទាំងពីរ។ បើប្រសិនជាយន្តហោះទាំងសងខាងបានប៉ះទង្គិចគ្នា បង្កឲ្យមានគ្រោះថ្នាក់វិញនោះ យោធាចិននិងជប៉ុន ប្រាកដជាយកលេសនេះ ប្រកាសសង្គ្រាមដាក់គ្នាជាមិនខាន ប្រៀបដូចជារងើកភ្លើង ដែលត្រៀមចាំតែខ្យល់បក់និងអាលឆាបឆេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ