វេទិកាម្ចាស់ឆ្នោតចាប់ផ្តើមធ្វើនៅក្នុងទីក្រុងភ្នំពេញ
វេទិកាម្ចាស់ឆ្នោតស្តីពីការផ្តល់ពិន្ទុលើលទ្ធផលនៃការ បំពេញ/អនុវត្តន៍គោលនយោបាយរបស់រដ្ឋាភិបាលនីតិកាលទី០៥ នៃរដ្ឋសភា ឆ្នាំទី១ ត្រូវបានធ្វើឡើងពេញមួយថ្ងៃ នៅថ្ងៃអង្គារ ទី ៣០ធ្នូនេះ នៅឯសាកលវិទ្យាល័យខេមរៈ ក្នុងទីក្រុងភ្នំពេញ។ វេទិកាដែលមានមនុស្សចូលរួមជាង ១០០នាក់នេះ ត្រូវបានរៀបចំឡើងដោយគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
វេទិកាម្ចាស់ឆ្នោតនេះ ត្រូវបានធ្វើឡើងជារៀងរាល់ឆ្នាំ ដើម្បីឲ្យប្រជាពលរដ្ឋដាក់ពិន្ទុ និងវាយតំលៃ ចំពោះការងាររបស់រដ្ឋាភិបាល ដែលធ្វើក្នុងឆ្នាំទី១ នៃអាណត្តិទី៥នេះ។ លោកយង់ គឹមអេង សមាជិកគណៈកម្មាធិការនាយកខុមហ្វ្រែល បានបញ្ជាក់ប្រាប់វិទ្យុបារាំងថា នៅព្រឹកមិញនេះ ប្រជាពលរដ្ឋភាគច្រើនបានដាក់ពិន្ទុតិចបំផុតដល់ ការផ្តល់សេវាសាធារណៈរបស់រដ្ឋាភិបាល។
លោកយង់ គឹមអេងបានបន្តថា សព្វថ្ងៃប្រជាពលរដ្ឋបានត្អូញត្អែរថា អ្នកផ្តល់សេវាសាធារណៈបច្ចុប្បន្នដើរតួនាទីមិនមែនជាអ្នកផ្តល់សេវាដល់ប្រជាជននោះទេ ប៉ុន្តែធ្វើជាម្ចាស់ និងអ្នកលក់សេវាទៅវិញ។ បន្ទាប់ពីសេវាសាធារណៈ ប្រជាជនក៏បានផ្តល់ពិន្ទុទាបដល់ប្រព័ន្ធយុត្តិធម៌នៅក្នុងសង្គមកម្ពុជា។ ប៉ុន្តែយ៉ាងណាក៏ដោយ ក៏ប្រជាជននាំគ្នាដាក់ពិន្ទុខ្ពស់ដល់វិស័យកីឡានៅកម្ពុជា។
លោកយង់ គឹមអេង បានសង្កេតឃើញថា តាមរយៈវេទិកានេះ រដ្ឋាភិបាលក៏បានផ្លាស់ប្តូរឥរិយាបថរបស់ខ្លួនមួយចំនួនផងដែរ ចំពោះប្រជាពលរដ្ឋ ប៉ុន្តែការផ្លាស់ប្តូរនេះ នៅមានកម្រិតនៅឡើយ។ លោកសង្ឃឹមថា រដ្ឋាភិបាល និងមន្ត្រីនៅតាមថ្នាក់មូលដ្ឋាននានា និងធ្វើការបំរើប្រជាពលរដ្ឋបានល្អប្រសើរជាមុន។
វេទិកាម្ចាស់ឆ្នោតនេះ ត្រូវបានធ្វើឡើងជាលើកដំបូងក្នុងអាណត្តិទី៤ ហើយនៅក្នុងអាណត្តិទី៥ នេះ ត្រូវបានធ្វើឡើងចំនួនពីរដោយលើកដំបូងនៅក្នុងខេត្តសៀមរាប កាលពីថ្ងៃទី ២២ធ្នូកន្លងទៅនេះ ហើយនិងលើកទីពីរ ធ្វើឡើងនៅក្នុងទីក្រុងភ្នំពេញ។ វេទិកានេះ ក៏នឹងបន្តធ្វើនៅតាមបណ្តាខេត្តដដៃ ទៀតផងដែរ។
សូមបញ្ជាក់ថាវេទិកានេះ ក៏មានការចូលរួមពីតំណាងបក្សកាន់អំណាច បក្សប្រឆាំង និងសង្គមស៊ីវិល ដើម្បីពិភាក្សាផ្តល់ជាយោបល់ និងដំណោះស្រាយជូនដល់ប្រជាពលរដ្ឋម្ចាស់ឆ្នោត និងរដ្ឋាភិបាល ដែលជាអ្នកអនុវត្តគោលនយោបាយបំរើប្រជាជន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ