កងទ័ពស៊ីរីនិងក្រុមឧទ្ទាមប្រយុទ្ធគ្នាជាថ្មី ក្រោយបទឈប់បាញ់មនុស្សធម៌ផុតកំណត់
បទឈប់បាញ់មនុស្សធម៌៣ថ្ងៃ នៅទីក្រុងអាឡិប ប្រទេសស៊ីរី បានផុតកំណត់ នៅម៉ោង៧យប់ថ្ងៃសៅរ៍ម្សិលមិញ។ កងទ័ពស៊ីរី និងក្រុមឧទ្ទាមបានវាយប្រហារគ្នាជាថ្មី ហើយរឹតតែខ្លាំងក្លាទៀត នៅថ្ងៃអាទិត្យនេះ។ បទឈប់បាញ់មនុស្សធម៌ដែលរុស្ស៊ីនិងកងទ័ពស៊ីរី ដាក់ចេញ៣ថ្ងៃ ផុតទៅហើយនេះ មិនបានជួយអោយអង្គការសហប្រជាជាតិអាចជម្លៀសអ្នករបួសចេញពីតំបន់ គ្រប់គ្រងដោយក្រុមឧទ្ទាមទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
បទឈប់បាញ់មនុស្សធម៌ដាក់ចេញដោយរុស្ស៊ី និងកងទ័ពស៊ីរី បានផុតកំណត់យប់ថ្ងៃសៅរ៍ម្សិលមិញ។ មិនបានប៉ុន្មានផង ក្រុមឧទ្ទាមនិងកងទ័ពស៊ីរីបានបើកការវាយប្រហារគ្នា ជាបន្តធ្វើអោយមានមនុស្សរងរបួសជាថ្មី។
ថ្ងៃអាទិត្យនេះ យន្តហោះរុស្ស៊ីនិងស៊ីរីបានទំលាក់គ្រាប់បែកទៅលើទីតាំងក្រុមឧទ្ទាមនៅភាគខាងលិចក្រុងអាឡិប ភាគខាងជើងអាឡិប និងនៅតំបន់ដាច់ស្រយាល ឆ្ពោះទៅខាងព្រំដែនតួកគី។ម្សិលមិញ ក្រុមឧទ្ទាមបានសុំអោយប្រជាជនចៀសនៅក្បែរអគាររដ្ឋាភិបាល ហើយបានប្រកាសថានឹងវាយលុកទ្រង់ទ្រាយធំ ដើម្បីបំបែកការឡោមព័ទ្ធរបស់កងទ័ព នៅភាគខាងកើតអាឡិប។
ជាការកត់សម្គាល់ បទឈប់បាញ់ឯកតោភាគីរបស់រុស្ស៊ីនិងទាហានស៊ីរី ដែលផុតកំណត់ យប់ថ្ងៃសៅរ៍ម្សិលមិញ ផុយស្រួយខ្លាំងណាស់។ អង្គការសហប្រជាជាតិមិនអាចជម្លៀសអ្នករបួស២០០នាក់ចេញពីតំបន់គ្រប់គ្រងដោយក្រុមឧទ្ទាមទេ។ អង្គការសហប្រជាជាតិលើកឡើងថា សុវត្ថិភាពសន្តិសុខនៅមិនទាន់មានគ្រប់គ្រាន់។ ប្រជាជននៅតំបន់ក្រុមឧទ្ទាមមិនហ៊ានចេញទៅតាមច្រកផ្លូវ ដែលកងទ័ពស៊ីរី ត្រួសត្រាយអោយពួកគេភៀសខ្លួន។ ការទំលាក់គ្រាប់បែកពីសំណាក់កងទ័ពស៊ីរីនិងរុស្ស៊ី១ខែមកនេះ បានសម្លាប់មនុស្ស៥០០នាក់ និងបង្ករបួស២០០០នាក់។
រុស្ស៊ីបានចោទក្រុមឧទ្ទាមថា ហាមឃាត់មិនអោយប្រជាជនចេញពីដែនដីខ្លួន។ រុស្ស៊ីចោទទៀតថា ក្នុងពេលមានបទឈប់បាញ់៣ថ្ងៃនេះ ក្រុមឧទ្ទាមបានសំងំរៀបចំការវាយលុកទ្រង់ទ្រាយធំ។ នៅក្រុងម៉ូស្គូ អ្នកនាំពាក្យរបស់លោកពូទីន បានគូសបញ្ជាក់ឡើងវិញ ពីជំហររុស្ស៊ីក្នុងការគាំទ្រលោកអាសាដ និងការរំដោះស៊ីរី ពីដៃក្រុមជីហាត។
ដោយឡែក ក្រុមប្រឹក្សាសន្តិសុខអង្គការសហប្រជាជាតិបានទទួលរបាយការណ៍មួយស្តីពីការប្រើប្រាស់អាវុធគីមី របស់កងទ័ពស៊ីរី នៅខែត្រអ៊ីតលីប ក្នុងខែមិនា ឆ្នាំ២០១៥។ បារាំងបានទាមទារអោយមាន សេចក្តីសម្រេចចិត្ត ថ្កោលទោសការប្រើប្រាស់អាវុធគីមី នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ