ការរំខានពិធីជួបជុំ៖ សមាជិកព្រឹទ្ធសភាបក្សកាន់អំណាចនិងបក្សប្រឆាំងប៉ះសម្តីគ្នា
សមាជិកព្រឹទ្ធសភាគណបក្សសម រង្ស៊ី បានចេញសេចក្តីថ្លែងការណ៍មួយកាលពីថ្ងៃទី ១៧មីនា ដោយចោទប្រកាន់គណបក្សកាន់អំណាចថាបានរំលោភរដ្ឋធម្មនុញ្ញស្តីពីសិទ្ធិជួបជុំនិងសម្តែងមតិរបស់ពលរដ្ឋ។ ការចោទប្រកាន់នេះបានធ្វើឡើងបន្ទាប់ពីមានការរំខានវេទិកាជួបជុំរបស់គណបក្សសង្គ្រោះជាតិក្នុងខេត្តតាកែវកាលពីថ្ងៃទី១៥មីនា។ ប៉ុន្តែ សមាជិកព្រឹទ្ធសភាគណបក្សប្រជាជនកម្ពុជាបានបដិសេធការចោទប្រកាន់ដោយចាត់ទុកថាជាការចោទដោយគ្មានមូលដ្ឋាននិងមិនអាចទទួលយកបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅក្នុងសេចក្តីថ្លែងការណ៍កាលពីថ្ងៃទី ១៧ មីនា សមាជិកព្រឹទ្ធសភាគណបក្សសម រង្ស៊ី បានថ្កោលទោសយ៉ាងខ្លាំងនិងបានចោទគណបក្សប្រជាជនកម្ពុជាថាបានរំលោភច្បាប់។ ការចោទប្រកាន់នេះបានកើតឡើងបន្ទាប់ពីសកម្មជនគណបក្សកាន់អំណាចមួយក្រុមបានចាក់មេក្រូរំខានដល់វេទិការជួបជុំរបស់គណបក្សសង្គ្រោះជាតិនៅឯស្រុកត្រាំកក់ ខេត្តតាកែវកាលពីថ្ងៃទី ១៥ មីនា។
សមាជិកព្រឹទ្ធសភាគណបក្សសម រង្ស៊ី ក៏បានចោទគណបក្សកាន់អំណាចថាបានរំលោភមាត្រា ៤១ នៃរដ្ឋធម្មនុញ្ញ ដែលការពារសិទ្ធិជួបជុំនិងសម្តែងមតិរបស់ពលរដ្ឋ។ ប៉ុន្តែ នៅក្នុងសេចក្តីថ្លែងការណ៍ឆ្លើយតបវិញចុះថ្ងៃទី ១៧មីនាដដែល សមាជិកព្រឹទ្ធសភាគណបក្សប្រជាជនកម្ពុជាបានហៅការចោទប្រកាន់របស់បក្សប្រឆាំងថាគ្មានមូលដ្ឋាននិងមិនអាចទទួលយកបាន។ សមាជិកព្រឹទ្ធសភាបក្សកាន់អំណាចបានអះអាងថា គណបក្សរបស់ខ្លួនតែងគោរពយ៉ាងខ្ជាប់ខ្ជួននូវរដ្ឋធម្មនុញ្ញនិងច្បាប់នានារាប់ទាំងច្បាប់ស្តីពីសេរីភាពសម្តែងមតិដែលកំពុងនៅជាធរមាន។
គួរកត់សម្គាល់ថា គណបក្សសង្គ្រោះជាតិតែងតែងបរិហារអំពីការរំខានវេទិការជួបជុំរបស់ខ្លួនពីសំណាក់សកម្មជនគណបក្សកាន់អំណាចជាញឹកញាប់រយៈពេលចុងក្រោយនេះ។ ព្រឹត្តិការណ៍នេះបានកើតឡើងបន្ទាប់ពីលោកនាយករដ្ឋមន្ត្រី ហ៊ុន សែន បានអំពាវនាវឲ្យអ្នកគាំទ្រគណបក្សប្រជាជនងើបឡើងប្រឆាំងការប៉ុនប៉ងទម្លាក់រដ្ឋាភិបាលនិងបានបើកសញ្ញាភ្លើងខៀវឲ្យអ្នកគាំទ្ររដ្ឋាភិបាលអាចធ្វើបាតុកម្មដូចក្រុមប្រឆាំងដែរ។
ការប្រឈមមុខដាក់គ្នាក្នុងវេទិកាសាធារណៈតាមខេត្តរយៈពេលកន្លងទៅត្រូវបានអាជ្ញាធរគណបក្សកាន់អំណាចពន្យល់ថាកើតឡើងដោយសារឆន្ទៈរបស់ប្រជាពលរដ្ឋដែលគាំទ្រគណបក្សកាន់អំណាច។ ប៉ុន្តែ គណបក្សប្រឆាំងបានមើលឃើញបញ្ហានេះថាជាចេតនាបង្កការរំខានពីសំណាក់គណបក្សប្រជាជនកម្ពុជា។ គណបក្សសង្គ្រោះជាតិធ្លាប់បានព្រមានផ្តាច់ការចរចាប្រសិនបើការរំខាននៅតែបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ