រដ្ឋាភិបាលចិន៖ អតិរេកពាណិជ្ជកម្មក្នុងខែមករាកើន៨៨% ស្មើនឹង៣៦៧ពាន់លានយ័ន
ពាណិជ្ជកម្មរបស់ចិននៅខែមករា ឆ្នាំ២០១៥ ចំណេញច្រើនជាងខែមករាឆ្នាំមុន ដល់ទៅ៨៨ភាគរយ ឬស្មើនឹង៣៦៧ពាន់លានយ័ន ពេលដែលការនាំចូលថយចុះកាន់តែលឿនជាងការនាំចេញ។ នេះបើយោងតាមទិន្នន័យផ្លូវការផ្សាយនៅថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០១:៣១
អគ្គនាយកដ្ឋានគយចិនបានឱ្យដឹងតាមរយៈវ៉េបសាយត៍របស់ខ្លួនថា ការនាំទំនិញចេញពីមហាអំណាចសេដ្ឋកិច្ចពិភពលោកទី២នេះ ធ្លាក់ចុះ៣,២ភាគរយ ពោលគឺស្មើនឹង១,២៣ទ្វេពាន់លានយ័ន បើប្រៀបធៀបទៅនឹងខែមករាឆ្នាំមុន រីឯការនាំទំនិញចូលមកវិញគឺតិចជាងខែមករាឆ្នាំ២០១៤ ចំនួន ១៩,៧ភាគរយ ឬស្មើនឹង៨៦០ពាន់លានយ័ន។
ស្ថិតិថ្មីបំផុតនេះផ្សាយចេញមកបន្ទាប់ពីអតិរេកពាណិជ្ជកម្មរបស់ចិនលោតឡើង៤៧,២ភាគរយក្នុងឆ្នាំ២០១៤ ពោលគឺស្មើនឹង៣៨២,៤៦ពាន់លានដុល្លារ ដែលជាតម្លៃមិនធ្លាប់មាន។ គ្រាន់តែក្នុងខែធ្នូប៉ុណ្ណោះ អតិរេកពាណិជ្ជកម្មស្ទើរតែកើនទ្វេដងរហូតដល់៤៩,៦ពាន់លានដុល្លារទៅហើយ ទោះបីជាកំណើននេះតិចជាងខែវិច្ឆិកាដែលមាន៥៤,៤៧ពាន់លានដុល្លារក្តី។
ផលចំណេញពាណិជ្ជកម្មដ៏សម្បើមរបស់ចិនធ្លាប់ជាប្រភពនៃការមិនចុះសម្រុងគ្នារវាងរដ្ឋាភិបាលទីក្រុងប៉េកាំង និងរដ្ឋាភិបាលទីក្រុងវ៉ាស៊ីនតោន ពេលចិនដែលជាក្បាលម៉ាស៊ីនផលិតកម្មរបស់ពិភពលោក លក់ទំនិញកម្មន្តសាលយ៉ាងពោរពាស ហើយបំណុលអាមេរិកកើនឡើង។ ប៉ុន្តែភាពរកាំរកូសរវាងមហាអំណាចសេដ្ឋកិច្ចទាំងពីរបានធូរស្រាលមកវិញក្នុងប៉ុន្មានឆ្នាំចុងក្រោយនេះ។
កាលពីខែមុន ទិន្នន័យផ្លូវការចង្អុលបង្ហាញឱ្យឃើញថា សេដ្ឋកិច្ចចិនបានកើន៧,៤ភាគរយនៅឆ្នាំ២០១៤។ នោះជាកំណើនទាបបំផុតក្នុងរយៈពេលជិត២៥ឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ