ទីក្រុងប៉េកាំងថា រឿងហុងកុងគឺជាកិច្ចការផ្ទៃក្នុងរបស់ចិន
រដ្ឋមន្ត្រីការបរទេសអាមេរិក ចន ឃែរី (John Kerry)បានជួបសមភាគីចិន កាលពីម្សិលមិញ នៅទីក្រុងវ៉ាស៊ីនតោន ទីដែលលោក វ៉ាង យី (Wang Yi)ធ្វើទស្សនកិច្ច ដើម្បីត្រៀមរៀបចំជំនួបកំពូលរវាងប្រធានាធិបតីនៃប្រទេសមហាអំណាចទាំងពីរ នាខែវិច្ឆិកា នៅទីក្រុងប៉េកាំង។ ទស្សនកិច្ចរបស់លោក វ៉ាង យី កើតឡើងខណៈដែលបាតុកម្មនៅទីក្រុងហុងកុង កំពុងបន្ត។ អំឡុងជំនួបរវាងរដ្ឋមន្រី្តការបរទេសទាំងពីរ លោក ចន ឃែរីបានរម្លឹកអំពីជំហររបស់សហរដ្ឋអាមេរិក ដែលដៃគូសន្ទនាចិនរបស់លោក មិនពេញចិត្តឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
មិនធម្មតាទាល់តែសោះ ដែលកិច្ចសន្ទនាបានប្រព្រឹត្តទៅមិនសូវគួរសមដាក់គ្នា នៅឯក្រសួងការប្រទេសអាមេរិក។ លោក ចន ឃែរី (John Kerry) ដែលបានទទួលលោក វ៉ាង យី (Wang Yi) បានវិលមកនិយាយអំពីព្រឹត្តិការណ៍បច្ចុប្បន្នភាពនៅហុងកុង ដែលជាអតីតដែនដីអាណានិគមអង់គ្លេស។
លោក ចន ឃែរី បានបញ្ចេញទស្សនៈអំពីសេរីភាពសម្តែងមតិរបស់បាតុករ និងអំពីលទ្ធិប្រជាធិបតេយ្យ ដូច្នេះថា៖«ដូចដែលចិនដឹងហើយ យើងគាំទ្រការបោះឆ្នោតសាកលនៅហុងកុង តាមច្បាប់ជាមូលដ្ឋាន (...) ហើយយើងពិតជាសង្ឃឹមថា អាជ្ញាធរទីក្រុងហុងកុង នឹងអនុវត្តដោយម៉ឺងម៉ាត់ និងគោរពសិទ្ធិរបស់បាតុករ ដែលសម្តែងមតិរបស់ពួកគេដោយសន្តិវិធី»
រដ្ឋមន្ត្រីការបរទេសចិនគ្រហែមដាក់លោក ចន ឃែរី ដែលកំពុងនិយាយយ៉ាងខ្លី ប៉ុន្តែបែបម៉ឺងម៉ាត់ ស្តីអំពីហុងកុង ហើយនេះជាចម្លើយមិនយោគយល់របស់លោក វ៉ាង យី៖
«រដ្ឋាភិបាលចិនសូមគូសបញ្ជាក់ជាថ្មី នូវជំហររបស់ខ្លួនឱ្យច្បាស់ថា សំណុំរឿងទីក្រុងហុងកុង គឺជានយោបាយផ្ទៃក្នុងចិនសុទ្ធសាធ។ ប្រទេសទាំងឡាយត្រូវតែគោរពគោលការណ៍គ្រឹះនេះ នៅក្នុងទំនាក់ទំនងអន្តរជាតិ»។
រដ្ឋមន្ត្រីការបរទេសចិន បន្ថែមថា ពួកបាតុកររំលោភច្បាប់ ហើយថា នៅសហរដ្ឋអាមេរិក ក៏ដូចជានៅហុងកុងដែរ អាកប្បកិរិយាបែបនេះ មិនអាចអត់ឱនឱ្យបានជាដាច់ខាត។ ធ្វើគារវកិច្ចដាក់គ្នាហើយ រដ្ឋមន្ត្រីការបរទេសទាំងពីររូបចូលប្រជុំ ដោយបិទទ្វារ បាត់ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ