លោកស៊ី ជីនពីង៖ចិនគាំទ្រដំណើរការចរចាសន្តិភាពនៅភូមា
ថ្ងៃសុក្រ១៩សីហា ក្នុងពេលទទួលជួបលោកស្រីអ៊ុងសាន ស៊ូជី ប្រធានាធិបតីចិន ស៊ី ជីនពីង បានប្រកាសគាំទ្រដំណើរការសន្តិភាពនៅភូមា។ ការគាំទ្ររបស់ចិន បានបំពេញបំណង រដ្ឋាភិបាលភូមាថ្មី ដែលប្តេជ្ញាកសាងសន្តិភាព ដើម្បីអភិវឌ្ឈន៍ប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ក្នុងពេលទទួលជួបលោកស្រីអ៊ុងសាន ស៊ូជី ជារដ្ឋមន្ត្រីការបរទេសភូមា ដែលបានមកទស្សនកិច្ចនៅចិន ប្រធានាធិបតីចិន ស៊ី ជីនពីង បានប្រកាសគាំទ្រដំណើរការសន្តិភាពភូមា ដោយសន្យាធ្វើការជាមួយភូមា ដើម្បីរក្សាសន្តិភាព និងស្ថិរភាពនៅតាមព្រំដែន។
ភូមាមានជាតិពិន្ធុ១៣០រស់នៅ។ ក្រោយភូមាទទួលបានឯករាជ្យពីអង់គ្លេស ឆ្នាំ១៩៤៨ ក្រុមប្រដាប់អាវុធជាច្រើនបានងើបបះបោរចង់ផ្តាច់ខ្លួនពីភូមា។ នៅតាមព្រំដែន ពិសេសនៅតំបន់កូងកាង ភាគឥសាន ក្រុមឧទ្ទាមបានប្រយុទ្ធជាមួយ កងទ័ពភូមា ធ្វើអោយប្រជាជនរាប់សិបពាន់នាក់ ភៀសខ្លួនទៅចិន កាលពីដើមឆ្នាំ២០១៥។ ដោយឡែក នៅតាមព្រំដែន ក៏សំបូរសកម្មភាពជួញដូរគ្រឿងញៀន គ្រឿងសព្វាវុធ និងត្បូងថ្មមានតម្លៃផងដែរ។
ប្រធានាធិបតីចិន ស៊ី ជីនពីង បានសន្យាគាំទ្រដំណើរការចរចាសន្តិភាពភូមា ជាប្រទេសជាប់របងជាមួយចិន។ ការគាំទ្រនេះ ក៏អាចមានទិសដៅជំរុញអោយភូមាព្រមសង់ទំនប់វារីអគ្គិសនី មីតសូន បំពេញតំរូវការប្រើប្រាស់នៅចិនដែរ។ ចិនចេញថ្លៃសាងសង់ទំនប់នេះ ក្នុងតម្លៃ៣៦០០លានដុល្លារ។
ភូមាបានផ្អាកគម្រោងសាងសង់នេះ តាំងពិឆ្នាំ ២០១១ តាំងពីក្នុងអាណត្តិលោកថេន សេន ដោយសារប្រជាជនភូមាជំទាស់គម្រោង។ ចិនបានដាក់សម្ពាធរដ្ឋាភិបាលថ្មីរបស់លោកស្រីស៊ូជី ចំពោះគម្រោងនេះ។ ពេលនេះ ភូមាមិនទាន់ឆ្លើយថា យ៉ាងណាចំពោះទំនប់វារីអគ្គិសនីចិនទេ។ លោកស្រីស៊ូជី គ្រាន់តែគូសបញ្ជាក់ថា រដ្ឋាភិបាលលោកស្រីបានបង្កើតគណៈកម្មការស៊ើបអង្កេតមួយឡើង ដើម្បីត្រួតពិនិត្យគម្រោងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ