អាជ្ញាធរចិនចាប់ខ្លួនមនុស្ស៧នាក់ ជាប់សង្ស័យក្នុងការវាយប្រហារនៅស្ថានីយរថភ្លើងតំបន់ស៊ីនជាំង
នៅថ្ងៃសៅរ៍នេះ សារព័ត៌មានប្រចាំថ្ងៃ Global Times បានចុះផ្សាយថា កាលពីថ្ងៃ១៤ឧសភា ប៉ូលិសចិនបានចាប់ខ្លួនមនុស្ស៧នាក់ ជាប់សង្ស័យក្នុងហេតុការណ៍បំផ្ទុះគ្រាប់បែកនៅពីមុខស្ថានីយរថភ្លើង ក្រុងUrumqi តំបន់ស្វ័យតស៊ីនជាំង កាលពីថ្ងៃ៣០មេសាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
នៅថ្ងៃសៅរ៍នេះ យោងតាមសារព័ត៌មាន Global Times ប៉ូលិសចិនបានចាប់ខ្លួនមនុស្ស៧នាក់ កាលពីថ្ងៃ១៤ឧសភា ទាក់ទងនឹងហេតុការណ៍បំផ្ទុះគ្រាប់បែកនៅមុខស្ថានីយរថភ្លើងក្រុងUrumqi តំបន់ស្វ័យតស៊ីនជាំង ភាគខាងលិច។ ហេតុការណ៍នេះបានកើតឡើង កាលពីថ្ងៃ៣០មេសា។ កាលណោះ ហេតុការណ៍បំផ្ទុះគ្រាប់បែក បានសម្លាប់មនុស្ស៣នាក់ ក្នុងនោះមានជនសង្ស័យ២នាក់ផងដែរដែលត្រូវបានស្លាប់។ មនុស្ស៧៩នាក់ទៀតបានរងរបួស។ ជនសង្ស័យទាំង៧នាក់ ត្រូវប៉ូលិសចាប់ខ្លួន នៅកសិដ្ឋានមួយកន្លែង ក្នុងក្រុងចាំងឈី នៅមិនឆ្ងាយពីក្រុង Urumqi ប៉ុន្មានឡើយ។ ជនសង្ស័យទាំងនោះភាគច្រើន ជាសមាជិកក្រុមគ្រួសារជាមួយគ្នា មានបងប្អូនប្រុស២នាក់ ប្រពន្ធនិងបងប្អូនជីដូនមួយពួកគេផងដែរ។
ហេតុការណ៍បំផ្ទុះនៅក្រុង Urumqi កាលពីថ្ងៃ៣០មេសា កំពុងស្ថិតក្រោមការស៊ើបអង្កេតរបស់ប៉ូលិសនៅឡើយ។ គួររំលឹកថា ហេតុការណ៍នេះ បានកើតឡើងចំថ្ងៃចុងក្រោយនៃទស្សនកិច្ចរបស់ប្រធានាធិបតីស៊ី ជីនពីងនៅតំបន់ស៊ីនជាំង។ កាលណោះ លោកស៊ី ជីនពីងបានសុំអោយប៉ូលិសចាត់វិធានការមានប្រសិទ្ធភាពខ្ពស់ប្រឆាំងអំពើភេរវកម្ម។ តំបន់ស៊ីនជាំង ជាតំបន់សំបូរធនធានធម្មជាតិ សំបូរជនជាតិអ៊ុយហ្គួ កាន់សាសនាអ៊ីស្លាម មានដើមកំណើតមកពីតួកគីរស់នៅ។
អំពើហិង្សាក្នុងតំបន់ស៊ីនជាំង ជាង១ឆ្នាំមកនេះ បានសម្លាប់មនុស្សរាប់រយនាក់។ រដ្ឋាភិបាលចិនតែងទំលាក់កំហុសលើសកម្មជនផ្តាច់ទឹកដីនិយមអ៊ុយហ្គួ។ ជនជាតិអ៊ុយហ្គួវិញ តែងចោទរដ្ឋាភិបាលចិនថា បានធ្វើទុក្ខបុកម្នេញ គាបសង្កត់វប្បធម៌ ប្រពៃណី និងសាសនារបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ