នាយករដ្ឋមន្រ្តីចិនសន្យាបង្កើនការវិនិយោគនៅអឺរ៉ុប
នៅក្នុងពេលដែលអឺរ៉ុបកំពុងធ្លាក់ក្នុងវិបត្តិសេដ្ឋកិច្ចដ៏ធ្ងន់ធ្ងរ នៅថ្ងៃពុធនេះ លោកវេន ជៀប៉ាវ នាយករដ្ឋមន្រ្តីចិន បានសន្យាថា ចិននឹងបង្កើនការវិនិយោគនៅអឺរ៉ុប ក៏ប៉ុន្តែ ទាមទារឲ្យមេដឹកនាំអឺរ៉ុបចាត់វិធានការដោះស្រាយវិបត្តិប្រាក់បំណុលរបស់ខ្លួន។ លោកវេន ជៀប៉ាវក៏បានសន្យាផងដែរថា ចិននឹងដាក់ចេញយុទ្ធសាស្រ្ត ដើម្បីបង្កើនតម្រូវការទីផ្សារក្នុងស្រុក។
ចុះផ្សាយនៅថ្ងៃ៖
ស្តាប់ - ០១:៣៣
ក្តីបារម្ភអំពីវិបត្តិប្រាក់បំណុលនៅក្នុងតំបន់អឺរ៉ូកំពុងតែកើនឡើង ពីមួយថ្ងៃ ទៅមួយថ្ងៃ។ នៅថ្ងៃនេះ ប្រធានគណៈកម្មការអឺរ៉ុប និងរដ្ឋមន្រ្តីក្រសួងហិរញ្ញវត្ថុ ប៉ូឡូញ ដែលជាប្រធានសហភាពអឺរ៉ុបបានព្រមានថា វិបត្តិប្រាក់បំណុលក្នុងតំបន់អឺរ៉ូអាចនឹងធ្វើឲ្យសហភាពអឺរ៉ុបទាំងមូលត្រូវដួលរលំ ហើយជម្លោះនិងសង្រ្គាមអាចនឹងវិលត្រឡប់មកអឺរ៉ុបវិញជាថ្មីម្តងទៀត។
នៅថ្ងៃពុធនេះ ប្រមុខដឹកនាំបារាំង អាល្លឺម៉ង់ និងក្រិក នឹងពិភាក្សាគ្នាតាមទូរស័ព្ទ ដើម្បីរិះរកដំណោះស្រាយទប់ស្កាត់កុំឲ្យក្រិកក្ស័យធន។ កន្លងមក អឺរ៉ុបបានព្រមព្រៀងគ្នារួចហើយ ទៅលើកញ្ចប់ថវិកា ដើម្បីជួយក្រិក ក៏ប៉ុន្តែ អឺរ៉ុបទាមទារឲ្យក្រិកបំពេញនូវលក្ខខណ្ឌមួយចំនួនជាមុនសិន ទើបអាចដកលុយយកទៅចាយបាន។
នៅក្នុងពេលកំពុងប្រឈមមុខនឹងវិបត្តិដ៏ធ្ងន់ធ្ងរបែបនេះ ប្រទេសក្នុងតំបន់អឺរ៉ូកំពុងតែសម្លឹងមើលទៅរកជំនួយពីប្រទេសចិន ដែលជាប្រទេសសម្បូរលុយ។ កន្លងមក ចិនធ្លាប់បានសន្យារួចហើយថា នឹងធ្វើការវិនិយោគលើមូលបត្របំណុលរបស់ក្រិក ព័រទុយហ្កាល់ និងអេស្ប៉ាញ។
នៅថ្ងៃពុធនេះ លោកវេន ជៀប៉ាវ បានសន្យាថា នឹងបង្កើនការវិនិយោគបន្ថែមទៀត នៅអឺរ៉ុប ក៏ប៉ុន្តែ ជាថ្នូរមកវិញ អឺរ៉ុបគួរតែបើកចំហទីផ្សារបន្ថែមទៀតដល់ផលិតផលចិន។ គួររំឭកថា ចិនបានទាមទារបែបនេះជាច្រើនឆ្នាំមកហើយ ក៏ប៉ុន្តែ អឺរ៉ុបបដិសេធ ដោយលើកហេតុផលថា រដ្ឋាភិបាលចិនលូកដៃចូលធ្វើអន្តរាគមន៍ច្រើនពេក ក្នុងបញ្ហាជំនួញ (ក្រុមហ៊ុនធំៗភាគច្រើនរបស់ចិន គឺជាក្រុមហ៊ុនរដ្ឋ ហើយមេដឹកនាំក្រុមហ៊ុនតែងតាំងដោយរដ្ឋាភិបាល) ដែលផ្ទុយពីគោលការណ៍សេដ្ឋកិច្ចសេរី និងការប្រកួតប្រជែងដោយស្មើភាព។
នៅថ្ងៃពុធនេះ លោកវេន ជៀប៉ាវ ក៏បានជំរុញផងដែរឲ្យគ្រប់ប្រទេសមហាអំណាចសេដ្ឋកិច្ចទាំងអស់អភិវឌ្ឍសេដ្ឋកិច្ចរបស់ខ្លួនប្រកបដោយការទទួលខុសត្រូវ ដាក់ចេញនូវនយោបាយរូបិយវត្ថុដែលមានប្រសិទ្ធិភាព ចាត់ចែងដោះស្រាយបញ្ហាប្រាក់បំណុល និងធានាសុវត្ថិភាពដល់ការធ្វើវិនិយោគ។
ក្នុងពេលជាមួយគ្នា នាយករដ្ឋមន្រ្តីចិនក៏បានសន្យាផងដែរថា ចិននឹងដាក់ចេញនូវយុទ្ធសាស្រ្ត ដើម្បីបង្កើនតម្រូវការទីផ្សារក្នុងស្រុក ត្រៀមខ្លួនបោះជំហានចូលក្នុងដំណាក់កាលថ្មី នៃការអភិវឌ្ឍសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ