ចិនឈានជើងចូលឆ្នំាថ្មី ២០១២ ឆ្នំារោង
ថ្ងៃចន្ទ ទី២៣ មករា ឆ្នំា ២០១២នេះ ប្រជាពលរដ្ឋចិនជាង ១ពាន់លាននាក់បាននំាគ្នាអបអរសាទរឆ្នំាថ្មី ២០១២ ដែលជាឆ្នំារោង។ ពិធីបុណ្យចូលឆ្នំាថ្មីដែលត្រូវបានគេប្រារព្ធឡើងយ៉ាងទ្រហឹងអឺងកងជាមួយនឹងការបាញ់ផាវ និងកាំជ្រួចនៅក្នុងទីក្រុងធំៗទូទំាងប្រទេស។
ចុះផ្សាយនៅថ្ងៃ៖
ស្តាប់ - ០១:៣៧
នៅយប់ថ្ងៃចូលឆ្នំាថ្មី សីតុណ្ហភាពក្នុងទីក្រុងប៉េកំាងបានធ្លាក់ចុះរហូតដល់ទៅ ១៧អង្សាក្រោមសូន្យ។ ក៏ប៉ុន្តែ ទោះបីជាមានធាតុអាកាសត្រជាក់ខ្លំាងយ៉ាងណាក្តី ក៏មិនអាចរារំាងពលរដ្ឋចិនក្នុងទីក្រុងប៉េកំាងឲ្យចេញក្រៅដើម្បីអបអរសាទរទទួលទេវតាឆ្នំាថ្មីទេ។ បន្ទាប់ពីការទទួលទានអាហារក្នុងគ្រួសារចប់រួចរាល់ភ្លាម ពលរដ្ឋចិនទំាងក្មេង ទំាងចាស់បានផ្តើមរៀបចំផាវ និងកំាជ្រួចចេញទៅបាញ់នៅតាមដងផ្លូវនានា។ ក្រៅពីស្នូរផាវ និងកំាជ្រួចយ៉ាងទ្រហឹងអឺងកង សំឡេងស៊ីហ្លេរថយន្តក៏ត្រូវបានបន្លឺឡើងក្នុងពេលជាមួយគ្នានោះដែរ។
ពេញមួយយប់ នៅតាមដងផ្លូវ គ្រប់ច្រកល្ហកក្នុងភូមិ ស្រុកនៃទីក្រុងប៉េកំាង គេឮសូរតែសំឡេងផាវ និងកំាជ្រួច។ ការបាញ់ផាវ និងកំាជ្រួចក្នុងពេលបុណ្យចូលឆ្នំាថ្មី គឺជាទំនៀមទម្លាប់ ប្រពៃណីរបស់ប្រជាពលរដ្ឋចិន ពីព្រោះដើម្បីបណ្តេញឧបទ្រពចង្រៃឆ្នំាចាស់ និងទទួលអំណរឆ្នំាថ្មី ២០១២ ឆ្នំារោង តែឆ្នំានេះ ជាសត្វនាគទឹក ដែលគេដឹងថាបានកើតឡើងរៀងរាល់ ៦០ឆ្នំាម្តង។ រូបសញ្ញាសត្វនាគឈរ ជាមួយនឹងការលាតក្រចកចេញមកក្រៅ ត្រូវបានក្រសួងទូរគមនាគមន៍យកមកធ្វើជាតែមប៉ុស្តិ៍សម្រាប់ឆ្នំា ២០១២។ ជារូបសញ្ញាដែលបញ្ជាក់ពីចិន ជាមហាអំណាចសេដ្ឋកិច្ចទី២ ក្នុងលោក និងពីស្ថានភាពសេដ្ឋកិច្ចកំពុងរីកលូតលាស់ដែលមិនអាចប្រកែកបាន។
សម្រាប់ក្រុមគ្រួសារចិនវិញ ឆ្នំាថ្មី ឆ្នំារោងដែលជាសត្វនាគទឹក គឺជាឆ្នំាដ៏មានមហិទ្ធិឫទ្ធិ ឆ្នំាដែលនឹងផ្តល់ជោគជ័យនៅគ្រប់កិច្ចការ ហើយបើអាចធ្វើទៅបាន រៀបចំបង្កើតកូនបន្ថែមនៅក្នុងឆ្នំានេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ