បាតុកម្មវៀតណាមប្រឆាំងចិន កំពុងរុញច្រានជម្លោះមានស្រាប់ឱ្យកាន់ធ្ងន់ធ្ងរ
បាតុកម្មប្រឆាំងនឹង ចិនដែលបានដាក់ពង្រាយឧបករណ៍ខួងយកប្រេង នៅក្នុងតំបន់ដែនទឹកជាប់ជម្លោះជាមួយវៀតណាម បានរាលដាលជាអំពើហិង្សា។ រោងចក្រឧស្សាហកម្មបរទេសជាង១០ត្រូវដុតបំផ្លាញ មនុស្សជាង៥រយនាក់ ត្រូវប៉ូលិសចាប់ខ្លួន។ តៃវ៉ាន់ សិង្ហបុរី ទាមទារឱ្យរដ្ឋាភិបាលវៀតណាម ចាត់វិធានការសមស្របចំពោះហេតុការណ៍ហិង្សានេះ ឯចិនវិញបានបញ្ចេញប្រតិកម្មខ្លាំង និងកាចជាងគេ ព្រមទាំងបានណែនាំឱ្យប្រជាជនចិនស្នាក់នៅក្នុងប្រទេសវៀតណាម រក្សាការប្រុងប្រយ័ត្នសុវត្ថិភាព។
ចុះផ្សាយនៅថ្ងៃ៖
ប្រមូលផ្តុំគ្នាជិតពីរម៉ឺននាក់ កម្មករវៀតណាមបាននាំគ្នាធ្វើបាតុកម្មប្រឆាំងនឹងសកម្មភាពចិនក្នុងសមុទ្ទចិនខាងត្បូង នៅថ្ងៃអង្គារម្សិលមិញ ប៉ុន្តែអណ្តាតភ្លើងកំហឹងបាតុកម្ម ទៅជាជះដុតបំផ្លាញរោងចក្រដែលមានថៅកែ ឬអ្នកដឹកនាំជាជនជាតិចិន និងបានអំពាវនាវឱ្យកម្មករផ្សេងទៀតនាំគ្នាងើបធ្វើកូដកម្មប្រឆាំង។ អ្នកទទួលខុសត្រូវ តែវ៉ាន់ ជប៉ុន កូរ៉េខាងត្បូង នៃតំបន់ឧស្សាហកម្ម ដែលរងគ្រោះ បានសម្រេចបិទរោងចក្រនៅថ្ងៃពុធនេះ ខ្លាចក្រែងមានការរីករាលដាលកាន់តែធំ។
បាតុកម្មជាសកម្មភាពដ៏កម្រក្នុងប្រទេសវៀតណាម ! យូរៗម្តងអាជ្ញាធរហាណូយធ្មេញភ្នែករៀបចំបាតុកម្ម ក្នុងកម្មវត្ថុតែមួយគឺដើម្បីប្រឆាំងនឹងចិន។ ហេតុដូច្នេះហើយបានជា ប៉េកាំងបានបញ្ចេញប្រតិកម្ម យ៉ាងខ្លាំងក្លា ជាផ្លូវការ នៅថ្ងៃនេះ ចោទប្រកាន់ហាណូយជាអ្នកបង្កហេតុ និងបានទាមទារឱ្យអាជ្ញាធរវៀតណាម ចាត់វិធានការ បិទបញ្ចប់ទង្វើ "ឧក្រិដ្ឋ” ព្រមទាំងដាក់ទោសជនដៃដល់។ ជាមួយនឹងការអំពាវនាវឱ្យបណ្តាជនចិននៅវៀតណាមធ្វើការប្រុងប្រយ័ត្ន និងការដាក់យន្តការបន្ទាន់សម្រាប់ធានាសន្តិសុខដល់ក្រុមហ៊ុនចិននៅវៀតណាម ប៉េកាំងបានប្រកាសព្រមានវៀតណាមឱ្យចេះគោរពបូរណភាពដែនដីចិន និងប្រកាសបង្កើនវត្តមានទាហានជើងទឹកការពារគម្រោងខួងប្រេងក្នុងសមុទ្ទចិនខាងត្បូងកំពុងជាប់ជម្លោះ។
ចិន វៀតណាម ប្រទេសកុម្មុយនិស្តជិតខាងជាប់របងគ្នាទាំងពីរ មានជម្លោះដែនដី តាំងពីយូរយារមក ដណ្តើមប្រជុំកោះ ស្ព្រាតលី និងប៉ារ៉ាសែល ដែលល្បីថាសម្បូរដោយធនធានធម្មជាតិក្រោមដី និងជាច្រកគមនាគមន៍ដែនសមុទ្ទយ៉ាងសំខាន់។ តាំងពីដើមខែឧសភាមក សម្ពាធបានឡើងតានតឹងកាន់តែខ្លាំង ដ្បិតចិនបានដាក់ដំឡើងគ្រឿងចក្រសម្រាប់បូមប្រេង ក្នុងតំបន់ទឹកជ្រៅនៃសមុទ្ទចិនខាងត្បូង។ ចិនក៏មានជម្លោះជាមួយប្រទេសក្នុងតំបន់ផ្សេងទៀតដែរ ជាក់ស្តែងហ្វីលីពីន ដែលក្នុងពេលទន្ទឹមគ្នានេះ បានសម្តែងការសង្ស័យថាប៉េកាំងទំនងជាចង់បង្កើតចំណតយន្តហោះមួយនៅក្បែរប្រជុំកោះស្ព្រាតលីផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ