រដ្ឋាភិបាលចិនចោទសកម្មជនទីបេថាបំផ្លើសការពិតជុំវិញរឿងបង្រ្កាបបាតុកម្មទីបេ
កាលពីថ្ងៃចន្ទ ម្សិលមិញនេះ បាតុកម្មរបស់ជនជាតិទីបេ នៅក្នុងខេត្តស៊ីឈ័ន (Sichuan) ត្រូវទទួលរងនូវការបង្រ្កាបពីសំណាក់ប៉ូលិសចិន។ រដ្ឋាភិបាលនិរទេសទីបេ និងអង្គការសិទ្ធិមនុស្សខ្លះបានអះអាងថា បាតុករ ៦នាក់ បានបាត់បង់ជីវិតក្នុងការបង្រ្កាបបាតុកម្មនេះ។ ក៏ប៉ុន្តែ នៅថ្ងៃអង្គារនេះ រដ្ឋាភិបាលចិនបានធ្វើការបំភ្លឺថា ការអះអាងខាងលើនេះ គឺជាការបំផ្លើសការពិត ក្នុងគោលដៅបង្ខូចឈ្មោះអាជ្ញាធរចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ទីភ្នាក់ងារព័ត៌មានចិនស៊ីនហួ បានចុះផ្សាយ នៅថ្ងៃអង្គារនេះ ដោយដកស្រង់សម្តីរបស់អ្នកនាំពាក្យក្រសួងការបរទេសចិន ដែលបានលើកឡើងថា ការប៉ុនប៉ងបង្ខូចឈ្មោះរដ្ឋាភិបាលចិន ពីសំណាក់ក្រុមសកម្មជនទាមទារបំបែកទឹកដីទីបេ នឹងមិនអាចទទួលបានជោគជ័យនោះទេ។
ក្រុមអង្គការការពារសិទ្ធិមនុស្សបានអះអាងផ្សេងៗគ្នា អំពីចំនួនអ្នកស្លាប់ ក្នុងការបង្រ្កាបបាតុកម្ម កាលពីម្សិលមិញ។ ចំណែករដ្ឋាភិបាលនិរទេសទីបេ ដែលមានទីតាំងនៅក្នុងប្រទេសឥណ្ឌា បានអះអាងថា បាតុករដែលស្លាប់ មានចំនួន ៦នាក់។
អ្នកនាំពាក្យក្រសួងការបរទេសចិនវិញបានអះអាងថា មានបាតុករស្លាប់តែម្នាក់ប៉ុណ្ណោះ។ ចំណែកអ្នករបួស គឺមាន ៩នាក់ ក្នុងនោះ ក៏មានប៉ូលិស ៥នាក់ផងដែរ។ ហើយអ្នករបួសទាំងអស់នេះសុទ្ធតែទទួលបាននូវការព្យាបាលត្រឹមត្រូវ។
គួរបញ្ជាក់ថា ហេតុការណ៍ កាលពីម្សិលមិញនេះ បានកើតឡើង នៅក្នុងខេត្តស៊ីឈ័ន ជាប់នឹងព្រំដែនតំបន់ស្វយ័តទីបេ។ គឺជាតំបន់ដែលសម្បូរទៅដោយជនជាតិទីបេរស់នៅ។
យោងតាមក្រុមអង្គការការពារសិទ្ធិមនុស្ស បាតុករទីបេ ដែលរួមមានទាំងព្រះសង្ឃផង បាននាំគ្នាចេញតវ៉ាទាមទារឲ្យដោះលែងសកម្មជនទីបេ ដែលអាជ្ញាធរចាប់ខ្លួន ជុំវិញការបាចខិត្តប័ណ្ណទាមទារសិទ្ធិសេរីភាពក្នុងតំបន់ទីបេ។
រដ្ឋាភិបាលចិនវិញបានអះអាងថា អ្នកដែលបង្កហេតុ ម្សិលមិញនេះ មិនមែនជាក្រុមបាតុករទាមទារសិទ្ធិសេរីភាពនោះទេ ប៉ុន្តែ គឺជាក្រុមជនពាល ដែលប្រដាប់ដោយកាំបិត ហើយនាំគ្នាគប់ដុំថ្មទៅលើប៉ូលិស ព្រមទាំងបានបំផ្លិចបំផ្លាញឡានប៉ូលិស និងឡានសង្រ្គោះបន្ទាន់ជាច្រើនគ្រឿងទៀតផង។
ក៏ប៉ុន្តែ មិនមានប្រភពឯករាជ្យណាមួយអាចបញ្ជាក់អំពីព័ត៌មាន ជុំវិញហេតុការណ៍ កាលពីម្សិលមិញនេះបានទេ។ អ្នកកាសែតបរទេសក៏មិនអាចចូលទៅយកព័ត៌មាននៅទីនោះបានដែរ ព្រោះអាជ្ញាធរចិនដាក់បម្រាមមិនឲ្យអ្នកកាសែតបរទេសធ្វើដំណើរទៅកាន់តំបន់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ