នាយសេនាធិការដ្ឋានអាហ្វហ្កានិស្តង់ទទួលប្រាក់ពីអៀរ៉ង់
លោកOumar Daudzaï ជានាយសេនាធិការដ្ឋានរបស់លោកប្រធានាធិបតីអាហ្វហ្កានិស្តង់ Hamid Karzaï ទទួលជារឿយៗប្រាក់ពីប្រទេសអៀរ៉ង់ដែលសាកល្បងពង្រឹងឥទ្ធិពលរបស់ខ្លួននៅក្នុងរង្វង់អ្នកជំនិតនៃវិមានប្រធានាធិបតី -នេះជាការបង្ហើបឱ្យដឹងរបស់ទិនានុប្បវត្តិ New York Times នៅល្ងាចថ្ងៃសៅរ៍ម្សិលមិញ២៣តុលា។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ប្រទេសអៀរ៉ង់ប្រើឥទ្ធិពលរបស់ខ្លួន ដើម្បីធ្វើឱ្យមានការបែកបាក់គ្នារវាងជនជាតិអាហ្វហ្កានិស្តង់និងសម្ព័ន្ធមិត្តអាមេរិកាំងនិងសម្ព័ន្ធមិត្តអូតង់របស់គេ -នេះជាការបង្ហើបឱ្យដឹងរបស់ទិនានុប្បវត្តិ New York Timesដែលយោងទៅលើសំដីរបស់ពួកអ្នកទទួលខុសត្រូវអាហ្វហ្កានិស្តង់និងលោកខាងលិចនៅទីក្រុងកាប៊ូល។
ស្របតាមពួកអ្នកទទួលខុសត្រូវទាំងនេះ ប្រាក់មានចំនួនរាប់លានដុល្លារបង់ទៅឱ្យមូលនិធិសម្ងាត់មួយដែលត្រូវលោកDaudzaïនិងលោកKarzaïប្រើប្រាស់ ដើម្បីបើកឱ្យពួកអ្នកតំណាងរាស្ត្រ ពួកមេកុលសម្ព័ន្ធ ក៏ព្រមទាំងពួកអ្នកទទួលខុសត្រូវតាលីបង់ទៀតផង ដើម្បីទទួលបានភក្តីភាពរបស់គេ។
អ្នកទទួលខុសត្រូវលោកខាងលិចម្នាក់បានអះអាងជាអាទិ៍ថា “ ដោយសរុប គឺជាហិបខ្មៅមួយរបស់លោកប្រធានាធិបតី“។ “បេសកកម្មរបស់លោកDaudzaïគឺធ្វើឱ្យចម្រើនជឿនលឿនទៅមុខ ផលប្រយោជន៍របស់អៀរ៉ង់“។
លោកប្រមុខរដ្ឋអាហ្វហ្កានិស្តង់Karzaïនិងនាយសេនាធិការដ្ឋានរបស់គាត់បានបដិសេធពុំព្រមឆ្លើយតបចំពោះសំនួរជាលាយល័ក្សអក្សរស្តីពីទំនាក់ទំនងរបស់ខ្លួនជាមួយប្រទេសអៀរ៉ង់។ស្របតាមកាសែតNew York Times ឩបការីម្នាក់របស់លោកDaudzaïបានចាត់ទុកអំណះអំណាងទាំងនេះថាជា” រឿងឥតខ្លឹមសារ ឥតបានការ“។
ចំណែកឯលោកFeda Hussein Malikaជាឯកអគ្គរដ្ឋទូតអៀរ៉ង់ប្រចាំនៅទីក្រុងកាប៊ូលវិញ ក៏ពុំព្រមឆ្លើយតបដែរចំពោះសំនួរទាំងនេះ។ អ្នកនាំពាក្យម្នាក់របស់លោកMalikiក៏បានចាត់ទុកដែរអំណះអំណាងទាំងនេះថាជា” សំដីរអេចរអូចសែនអាក្រក់លេចចេញមកពីមធ្យោបាយឃោសនាមហាជន នៅលោកខាងលិចនិងបរទេស“។
ស្របតាមកាសែតNew YorkTimes ដែលយោងទៅលើសំដីរបស់ឥស្សរជនផ្លូវការមិនបញ្ចេញឈ្មោះ ប្រាក់របស់អៀរ៉ង់ប្រើសំរាប់ទទួលបានភក្តីភាពរបស់លោកDaudzaïជាអតីតឯកអគ្គរដ្ឋទូតអាហ្វហ្កានិស្តង់ប្រចាំនៅអៀរ៉ង់ដែលជានិច្ចកាលការពារខ្សែបន្ទាត់នយោបាយប្រឆាំងនឹងលោកខាងលិច នៅអមលោកKarzaï។
កាសែតNew York Timesបញ្ជាក់ប្រាប់ទៀតថា នៅខែសីហាមុន បន្ទាប់ពីចប់ទស្សនកិច្ចរបស់លោកប្រធានាធិបតីអាហ្វហ្កានិស្តង់នៅអៀរ៉ង់មក លោកFeda Hussein Malikiបានឡើងទៅកាន់យន្តហោះរបស់លោកប្រធានាធិបតីអាហ្វហ្កានិស្តង់ ដោយពាំនាំស្បោងប្លាស្ទិកដ៏ធំមួយពេញណែនដោយប្រាក់អឺរ៉ូទាំងបាច់ៗដែលគាត់បានប្រគល់ជូនលោកKarzaï។
“ គឺជាប្រាក់របស់អៀរ៉ង់ “ -“ គ្នាយើងមួយចំនួនបានកត់សំគាល់ឃើញ “ -នេះជាការអះអាងរបស់ឥស្សរជនផ្លូវការអាហ្វហ្កានិស្តង់ម្នាក់ដែលកាសែតអាមេរិកាំងលើកយកមកចុះផ្សាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ