មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយទាមទាររកយុត្តិធម៌ឲ្យអ្នកកាសែតមាគ៌ាកម្ពុជា ដែលត្រូវបានសម្លាប់
មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ឬហៅថា CCIM នៅថ្ងៃទី០៣មករានេះ បានចេញសេចក្តីប្រកាសព័ត៌មានមួយ ទាមទារឲ្យមានការរកយុត្តិធម៌ពិតប្រាកដ ដល់អ្នកកាសែត មាគ៌ាកម្ពុជា នៅក្នុងខេត្តកំពង់ឆ្នាំង ដែលបានស្លាប់ កាលពីថ្ងៃទី០១កុម្ភៈ ដោយសារតែមានការព្រួតវាយសម្លាប់ កាលពីថ្ងៃទី ៣១មករា ហើយបានស្លាប់បាត់បង់ជីវិត ពេលបញ្ជូនទៅកាន់មន្ទីរពេទ្យ។ CCIM បាននិយាយថា នេះគឺជាករណីទាក់ទងនឹងវិជ្ជាជីវៈ ប៉ុន្តែក្លឹបអ្នកកាសែតកម្ពុជា បាននិយាយថា នេះគឺជារឿងគំនុំផ្ទាល់ខ្លួនច្រើនជាង។
ចុះផ្សាយនៅថ្ងៃ៖
ស្តាប់ - ០២:០០
បន្ទាប់ពី អ្នកយកព័ត៌មាន កាសែតមាគ៌ាកម្ពុជា ដែលមានទីតាំងក្នុងខេត្តកំពង់ឆ្នាំង លោក សួន ចាន់ បានស្លាប់ ដោយសារការព្រួតវាយសម្លាប់រួចមក មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ឬហៅថា CCIM បានចេញសេចក្តីប្រកាសព័ត៌មានមួយនៅថ្ងៃពុធនេះ ទាមទារឲ្យអាជ្ញាធរ ត្រូវតែបើកការស៊ើបអង្កេត រកយុត្តិធម៌ ដល់អ្នកកាសែតរូបនេះ។
ការទាមទារបែបនេះ បន្ទាប់ពី CCIM បានអះអាងថា អាជ្ញាធរ ហាក់មិនសូវបានអើពើចំពោះករណីឃាតករអ្នកកាសែត។ នៅក្នុងសេចក្តីថ្លែងការណ៍របស់ខ្លួន CCIM
បាននិយាយថា ការសម្លាប់ លោក សួន ចាន់ វ័យ៤៤នេះ គឺទាក់ទងនឹងបញ្ហាវិជ្ជាជីវៈ ដែលផ្តើមចេញពីរឿងគំនុំ ដោយសារតែក្នុងរយៈពេលកន្លងទៅ ឈ្មោះសួន ចាន់ បានចុះទៅថតសកម្មភាពឆក់ត្រី និងសកម្មភាពប្រព្រឹត្តបទល្មើសនេសាទផ្សេងៗទៀត យកមកចុះផ្សាយ នៅលើទំព័រកាសែតរបស់ខ្លួន និង បានបញ្ជូនរូបភាពពីសកម្មភាពនេះ ទៅអោយកាសែតក្នុងស្រុកមួយចំនួន ចុះផ្សាយទៀតផង។
ប៉ុន្តែបើតាម លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានឲ្យដឹងថា ករណីនេះ អាចជារឿងជម្លោះផ្ទាល់ខ្លួន ច្រើនជាងរឿងវិជ្ជាជីវៈ។ លោកបានបន្តថា មកដល់ពេលនេះ ក្លឹបអ្នកកាសែត នៅពុំទាន់ទទួលបានរបាយការណ៏ពាក្យបណ្តឹងពីក្រុមគ្រួសារជនរងគ្រោះនៅឡើយទេ ព្រោះថាអ្នកកាសែត ដែលជាជនរងគ្រោះរូបនេះ មិនមែនជាសមាជិក របស់ក្លឹបអ្នកកាសែតកម្ពុជា។ យ៉ាងណាក៏ដោយ មន្ត្រីនៃក្លឹបអ្នកកាសែត កំពុងតែតាមដាន ពីរឿងនេះយ៉ាងលម្អិត។ លោក ប៉ែន សមិទ្ធ ក៏បានស្នើសុំឲ្យអាជ្ញាធរ ត្រូវតែរកយុត្តិធម៌ និងចាប់ខ្លួនជនដៃដល់ មកផ្តន្ទទោសតាមផ្លូវច្បាប់ដូចគ្នាដែរ។
បើតាមមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ នេះគឺជាឃាតកម្មអ្នកកាសែត ករណីទី១២ហើយ ក្នុងរយៈពេល ២០ឆ្នាំ ចុងក្រោយនេះ។ ប៉ុន្តែពុំមានករណី ណាមួយ ដែលអាជ្ញាធរ អាចចាប់ខ្លួន ឃាតករបានឡើយ។ លោក ប៉ា ងួនទៀង ប្រធានមជ្ឃមណ្ឌលកម្ពុជា ដើម្បីប្រព័ន្ធផ្សព្វផ្សាយ បាននិយាយនៅក្នុងសេចក្តីប្រកាសព័ត៌មានថា វប្បធម៌ទិទណ្ឌភាព ដោយការខ្វះការស៊ើបអង្កេត នៅកម្ពុជា គួរតែត្រូវបំបាត់ចោល ដើម្បីឲ្យកម្ពុជា អាចក្លាយជាប្រទេសមួយ មានសិទ្ធក្នុងការបញ្ចេញមតិ ឲ្យបានពេញលេញ និង គ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ