ONGនិងសហរដ្ឋអាមេរិកទាមទារដោះលែងបុព្វជិតកាតូលិក Ngugen Van Ly
សមាគមន៍ការពារសិទ្ធិមនុស្សមួយចំនួន បានចូលរួមជាមួយសហរដ្ឋអាមេរិក នៅថ្ងៃពុធ ២៧កក្កដានេះ ក្នុងការអំពាវនាវរដ្ឋាភិបាលវៀតណាមឲ្យដោះលែងបុព្វជិតគ្រិស្តសាសនា កាតូលិកមួយរូបដែលទើ់បត្រូវបានអាជ្ញាធរ ចាប់ខ្លួននៅថ្ងៃចន្ទមុននេះមួយឆ្នាំ បន្ទាប់ពីត្រូវបានដោះលែងជាបណ្តោះអាសន្នដោយបញ្ហាសុខភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
« យើងអំពាវនាវរដ្ឋាភិបាលវៀតណាម ឲ្យដោះលែងបុព្វជិត Ngugen Van Ly ជាបន្ទាន់ » នេះ ជាសេចក្តីថ្លែងរបស់ លោក Heide Bronke Fulton អ្នកនាំពាក្យម្នាក់នៃក្រសួងការបរទេសអាមេរិកនៅថ្ងៃពុធ២៧កក្កដានេះ។
លោក Heide Bronke Fulton បានថ្លែងបន្ថែមទៀតថា « គេមិនដែលចាប់មនុស្សយកទៅដាក់ឃុំឃាំងដោយគ្រាន់តែបានបញ្ចេញមតិផ្ទាល់ខ្លួនរបស់គេនោះទេ » ។ មិនតែប៉ុណ្ណោះ អ្នកនាំពាក្យនៃក្រសួងការបរទេសអាមេរិកាំង បានជំរុញឲ្យអាជ្ញាធរវៀតណាម ដោះលែងបុព្វជិត Ngugen Van Ly ឲ្យមានសេរីភាពវិញ ដើម្បីអាចឲ្យគាត់ទៅព្យាបាលរោគដុំពកខួរក្បាលរបស់គាត់។
បុព្វជិតកាតូលិក Ngugen Van Ly ត្រូវបានអាជ្ញាធរវៀតណាមផ្តន្ទាទោសតាំងពីឆ្នាំ ២០០៧ ដាក់គុក៨ ឆ្នាំ ពីបទ ឃោសនាប្រឆាំងរដ្ឋាភិបាល វៀតណាម ជាពិសេសពីបទបានបង្កើតចលនាមួយមាននិន្នាការប្រជាធិបតេយ្យនៅថ្ងៃទី៨មេសាឆ្នាំ២០០៦ និងបានអំពាវនាវឲ្យមានពហុបក្សនៅក្នុងប្រទេស។ វៀតណាមដែលបច្ចុប្បន្នមានបក្សកុម្មុយនិស្តតែមួយគត់កាន់កាប់អំណាចនៅក្នុងប្រទេស។ គួរំលឹកថានៅខែមីនា ២០១០ តុលាការវៀតណាម បានសម្រេចដោះលែងឲ្យបុព្វជិតកាតូលិកនេះឲ្យនៅក្រៅឃុំបណ្តោះអាសន្នចំនួនមួយឆ្នាំដើម្បីអាចឲ្យគាត់ទៅព្យាបាលរោគរបស់គាត់។
រីឯអង្គការការពារសិទ្ធមនុស្ស Human Rights Watchវិញ បានអត្ថាធិប្បាយនៅថ្ងៃពុធនេះថា”ការចាប់បញ្ជូន បុព្វជិត Ngugen Van Ly យកទៅដាក់ក្នុងគុគវិញ គឺរឹតតែបង្កើនទោសគាត់ឲ្យកាន់តែធ្ងន់ធ្ងរជាងមុននិងរឹតតែអយុត្តិធម៌ទៀត ពីព្រោះ គាត់ ត្រូវជាប់គុក៥ឆ្នាំថែមទៀតនិង ៥ឆ្នាំទៀតជាប់ឃុំឃាំងនៅក្នុងលំនៅឋាន។
សំរាប់ Human Rights Watch បុព្វជិត Ngugen Van Ly ជាអ្នកទោសមនសិការម្នាក់ដែលជាប់គុកដោយសារតែការងារមួយមុខគត់របស់គាត់គឺដើម្បីសន្តិភាពនិងប្រជាធិបតេយ្យប៉ុណ្ណោះ ដែលមិនត្រូវជាប់ទោសទាល់តែសោះ។
ចំណែក លោក Leonard Leo ប្រធានគណកម្មការអាមេរិកាំងដើម្បីសេរីភាពសាសនាអន្តរជាតិដែលជាអង្គការផ្តល់ឱវាទដល់រដ្ឋាភិបាលអាមេរិកាំង បានរិះគន់ថា ទីក្រុងវ៉ាស៊ីនតោន ថ្មីៗនេះ បានជួយទីក្រុងហាណូយ នៅក្នុងជម្លោះជាមួយប៉េកាំងលើបញ្ហាដែនសមុទ្រចិនខាងត្បូង។ ផ្ទុយទៅវិញ វៀតណាមបែរជាចាប់ បុព្វជិតកាតូលិកម្នាក់ដែលមានសុខភាពទ្រុធទ្រោម។ ទង្វើនេះ ជាការ រមិលគុណ ចំពោះសហរដ្ឋអាមេរិក។
គួររំលឹថា សហរដ្ឋអាមេរិកនិងវៀតណាម អតីតសត្រូវទាំងពីរនេះ បានចាប់មានទំនាក់ទំនងផ្លូវទូតជាមួយគ្នាឡើងវិញ នៅឆ្នាំ១៩៩៥ និង តាំងពីនោះមក កាន់តែបង្កើនកម្មវិធីសហប្រតិបត្តិការជាមួយគ្នារួមទាំងនៅលើវិស័យយោធាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ