កាតាឡូញ៉ា៖ Puigdemont ថានឹងមិនសុំសិទ្ធិជ្រកក្រោននៅ បែលហ្ស៊ិក ទេ
លោក កាលឡេស ពុយដេម៉ុង (Carles Puigdemont) អតីតប្រមុខដឹកនាំផ្តាច់ទឹកដីកាតាឡូញ៉ា បានតាមធ្វើដំណើរស្ងាត់ៗ ទៅដល់ទីក្រុង ព្រុចសែល ដែលជាហេតុធ្វើឲ្យគេសង្ស័យថា លោកអាចទៅសុំសិទ្ធិជ្រកកោននយោបាយ នៅទីនោះ។ ក៏ប៉ុន្តែ នៅក្នុងសន្នីសីទកាសែតពីរសៀលថ្ងៃទី៣១តុលា លោកបានប្រកាសថា លោកនឹងមិនសុំសិទ្ធិជ្រកក្រោននៅ បែលហ្ស៊ិក នោះទេ។ ចំពោះអនាគតរបស់រដ្ឋអំណាចតំបន់កាតាឡូញ៉ាវិញ លោក Puigdemont ថាលោកនឹងគោរពតាមឆន្ទៈរបស់ពលរដ្ឋកាតាឡូញ៉ា ដែលត្រូវបោះឆ្នោត នៅថ្ងៃទី២១ធ្នូ។
ចុះផ្សាយនៅថ្ងៃ៖
ស្តាប់ - ០២:០៦
ក្នុងសន្នីសីទកាសែត លោក Carles Puigdemont បាននិយាយជាបីភាសា អេស្ប៉ាញ់ អង់គ្លេស និងបារាំង ដោយពន្យល់ពីការដែលរូបលោកមានវត្តមាន នៅប្រទេសបែលហ្ស៊ិក។ លោកថា មូលហេតុដែលលោកចាកចេញពីតំបន់កាតាឡូញ៉ា គឺព្រោះតែរដ្ឋាភិបាលអេស្ប៉ាញរបស់លោក Mariano Rajoy មិនព្រមទទួលយកការចរចា ដោយស្ងប់ស្ងាត់ និងតាមផ្លូវការទូត។ ដូច្នេះលោកត្រូវសម្រេចចិត្តចេញមកកាន់ទីក្រុងព្រុចសែល ជាទីដែលលោកចាត់ទុកថា ជារដ្ឋធានីនៃសហភាពអឺរ៉ុប។
អតីតប្រមុខដឹកនាំផ្តាច់ទឹកដីកាតាឡូញ៉ា បានអះអាងទៀតថាលោកនឹងមិនសុំសិទ្ធជ្រកក្រោននយោបាយនៅព្រុយសែលនោះទេ។ តែទោះយ៉ាងនេះក្តី លោកថាអាចនឹងបន្តស្នាក់នៅប្រទេសបែលហ្សិកមួយរយៈទៀតសិន។
សូមបញ្ជាក់ថា រដ្ឋាភិបាលអេស្ប៉ាញ បានប្តឹងទៅតុលាការ ចំពោះរូបលោក Puigdemont ពីបទបំបះបំបោរផ្តាច់ទឹកដី ប្រកាសឯករាជ្យខុសរដ្ឋធម្មនុញ្ញ ហើយដែលលោកអាចប្រឈមមុខនឹងការជាប់ពន្ធនាគារ ពី១៥ ទៅ៣០ឆ្នាំ។ នៅក្នុងសន្នីសីទកាសែតនៅក្រុងព្រុចសែល ថ្ងៃទី៣១តុលា លោក Puigdemont ថា លោកនឹងប្រឈមមុខទទួលខុសត្រូវចំពោះប្រព័ន្ធតុលាការអេស្ប៉ាញ ប្រសិនបើនីតិវិធីជំនុះជម្រះនោះ មានភាពសុចរិតយុត្តិធម៌។
នៅតំបន់កាតាឡូញ៉ាឯណោះវិញ ពីម្សិលមិញនេះដែរ តុលាការកំពូលអេស្ប៉ាញ បានចេញដីកាកោះហៅ លោកស្រី Carme Forcadell អតីតប្រធានរដ្ឋសភាកាតាឡូញ៉ា និងបក្សពួកដែលជាថ្នាក់ដឹកនាំតំបន់ចំនួន៥នាក់ផ្សេងទៀត ដើម្បីឲ្យចូលសវនាជំនុំជម្រះ នៅថ្ងៃទី២និងទី៣វិច្ឆិកានេះ ដោយមានមេធាវីទៅជាមួយផង។
សូមរម្លឹកថា កាលពីថ្ងៃទី២៧តុលា ភ្លាមៗក្រោយសភានិងរដ្ឋបាលតំបន់កាតាឡូញ៉ា ប្រកាសឯករាជ្យ រដ្ឋាភិបាលអេស្ប៉ាញ បានសម្រេចរំលាយសភា និងរដ្ឋបាលតំបន់កាតាឡូញ៉ាចោល ដោយអនុលោមតាមមាត្រា១៥៥ នៃរដ្ឋធម្មនុញ្ញអេស្ប៉ាញ។ មាត្រានោះចែងថា រដ្ឋាភិបាលក្រុងម៉ាឌ្រីដ មានសិទ្ធិព្យូរស្វយ័តភាពតំបន់ ណាមួយ ក្នុងករណីមានវិបត្តិ។ ដូច្នេះ លោក Carles Puigdemont ប្រមុខដឹកនាំតំបន់កាតាឡូញ៉ា បានត្រូវដកហូតពីតំណែង ហើយការបោះឆ្នោតមុនអាណត្តិ គឺនឹងត្រូវរៀបចំ នៅថ្ងៃទី២១ ខែធ្នូ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ