ថៃ អនុញ្ញាតច្បាប់ឲ្យប្រើប្រាស់ កញ្ឆា និង ក្ទម្ព សម្រាប់ការស្រាវជ្រាវនិងវិស័យពេទ្យ
រដ្ឋសភាថៃ ថ្ងៃពុធទី២៦ធ្នូ បានអនុម័តច្បាប់ថ្មីមួយ អនុញ្ញាតឲ្យប្រើប្រាស់ កញ្ឆា និង ក្ទម្ព សម្រាប់ព្យាបាលក្នុងវិស័យវេជ្ជសាស្ត្រ និងការស្រាវជ្រាវវិទ្យាសាស្ត្រ។ សូមជ្រាបថា រុក្ខជាតិទាំងពីរនេះ មានសារធាតុញៀន ដែលច្បាប់បានហាមឃាត់ជាយូរឆ្នាំមកហើយ។
ចុះផ្សាយនៅថ្ងៃ៖
ស្តាប់ - ០១:៥៥
ប្រធានគណៈកម្មាធិការជាតិកសិករថៃ Prapat Panyachartrak បានថ្លែងគាំទ្រច្បាប់ថ្មី ដោយប្រាប់ទីភ្នាក់ងារព័ត៌មានបារាំង ថា ការអនុម័តច្បាប់នេះ គឺនឹងជួយបង្កើនសេដ្ឋកិច្ចជាតិ និងជួយដល់កសិករថៃ ឲ្យធ្វើពិពិធកម្មផលិតកម្ម។ ក្នុងមួយឆ្នាំៗ ប្រទេសថៃសព្វថ្ងៃ អាចទទួលបានចំណូលប្រមាណ ១០០ ពាន់លានបាត គឺប្រហែលជាង ៣ពាន់លានដុល្លារ ពីវិស័យនេះ។ នេះបើតាមសមាគមកសិករថៃ។
បើទោះបីជាសមាជិកសភាថៃ បញ្ជាក់ថា នៅក្នុងច្បាប់ថ្មី ការប្រើប្រាស់រុក្ខជាតិញៀននេះ គឺសម្រាប់ស្ថិតក្នុងក្របខណ្ឌបញ្ជីពេទ្យនិងវិទ្យាសាស្ត្រ ហើយនិងហាមឃាត់ក្នុងការយកទៅជក់លេងកម្សាន្តក៏ដោយ ក៏ពលរដ្ឋថៃមួយចំនួន បានប្រើប្រាស់ ក្នុងជីវភាពប្រចាំថ្ងៃ ជាទម្លាប់រួចស្រេចទៅហើយ។
នៅពេលដែលមានច្បាប់អនុញ្ញាតឲ្យផលិតនិងធ្វើអាជីវកម្មយ៉ាងដូច្នេះ ការប្រើប្រាស់នឹងកាន់តែទូលំទូលាយ។ ពិសេសគឺការផលិត ចម្រាញ់ សម្រាប់លក់ និងនាំចេញទៅបរទេស។ ចំណែក សហគ្រាសឱសថ និងក្រុមហ៊ុនបរទេស ជាច្រើន បានត្រៀមខ្លួនបន្តកន្ទុយគ្នាដើម្បីដាក់ពាក្យសុំធ្វើអាជីវកម្មរួចជាស្រេច។
តាំងពីឆ្នាំ១៩៧០មកម្ល៉េះ ដែលច្បាប់ថៃ ហាមឃាត់ ដោយចាត់ទុក កញ្ឆា និងក្ទម្ព ថាជាប្រភេទគ្រឿងញឿន។ នៅពេលនេះ រដ្ឋសភាថៃ ដែលមានសុទ្ធសឹងសមាជិកតែងតាំងដោយរបបសឹក បានសម្រេចអនុម័តច្បាប់ដ៏ចម្រូងចម្រាស់។ ទោះយ៉ាងណាក្តីច្បាប់នេះ បានចេញផុតពីដៃរដ្ឋសភាជាតិរួចហើយ ហើយប្រសិនបើព្រះមហាយក្សថៃ លាយព្រះហស្ថលេខា សម្រេចឲ្យប្រើច្បាប់ថ្មីនេះមែន នោះប្រទេសថៃ នឹងក្លាយជារាជាណាចក្រទី១ នៅអាស៊ី ដែលអនុញ្ញាតឲ្យផលិតនិងប្រើ រុក្ខជាតិញៀន ដោយស្របច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ