គណៈមេធាវីបើកកិច្ចប្រជុំពិចារណាករណីមេធាវីជូង ជូងីកោសក់
ក្រុមប្រឹក្សានៃគណៈមេធាវីនឹងបើកកិច្ចប្រជុំមួយ នៅព្រឹកថ្ងៃសុក្រទី៦មករា ដើម្បីជជែកអំពីករណីរបស់មេធាវីជូង ជូងី កោសក់តាំងសីលអំពាវនាវអោយមានយុត្តិធម៌ក្នុងស្ថាប័នយុត្តិធម៌។ លោកជូង ជូងី មេធាវីរបស់គណបក្សសមរង្ស៊ី រៀបចំពិធីកោសក់ នៅថ្ងៃព្រហស្បតិ៍នេះ ហើយមានគម្រោងធ្វើវិបស្សនានៅមុខស្ថាប័នយុត្តិធម៌ជាច្រើន រួមមានគណៈមេធាវីផង។
ចុះផ្សាយនៅថ្ងៃ៖
ស្តាប់ - ០១:២៩
ខណៈដែលលោកមេធាវីជូង ជូងី រៀបចំពិធីកោសក់កាន់សីល៨ ក្នុងគោលបំណងដែលមេធាវីរូបនេះបានបញ្ជាក់កន្លងមកថា ដើម្បីអំពាវនាវអោយស្ថានប័នយុត្តិធម៌ទាំងអស់អនុវត្តការផ្តល់យុត្តិធម៌ គណៈមេធាវីក៏បានកោះប្រជុំក្រុមប្រឹក្សារបស់ខ្លួន នៅព្រឹកថ្ងៃសុក្រទី៦មករាដែរ។
ប្រធានគណៈមេធាវីកម្ពុជា លោកជីវ សុងហាក់ បានថ្លែងប្រាប់វិទ្យុបារាំងអន្តជាតិ នៅរសៀលថ្ងៃព្រហស្បតិ៍នេះថា ក្រុមប្រឹក្សានៃគណៈមេធាវីនឹងពិចារណាអំពីសកម្មភាពរបស់មេធាវីជូង ជូងី។ ប្រធានគណៈមេធាវីបញ្ជាក់ថា ក្រុមប្រឹក្សាគណៈមេធាវីនឹងសម្រេចថា តើសកម្មភាពរបស់លោកជូង ជូងី ជាសកម្មភាពត្រឹមត្រូវ ឬខុសឆ្គង។
លោកជូង ជូងី មេធាវីប្រចាំគណបក្សសម រង្ស៊ី បានរៀបចំពិធីកោសក់កាន់សីល៨ តាមការគ្រោងទុក នៅព្រឹកថ្ងៃទី៥មករានេះ។ ពិធីនេះត្រូវបានរៀបចំនៅក្នុងទីស្នាក់ការកណ្តាលរបស់គណបក្សសម រង្ស៊ីទៅវិញ។
លោកជូង ជូងី ក្នុងនាមជាអ្នកតាំងសីល មិនបាននិយាយជាមួយអ្នកកាសែត ដែលសួរលោកអំពីគោលបំណងនៃការកោរសក់នេះឡើយនៅថ្ងៃនេះ។ ប៉ុន្តែនៅក្នុងសន្និសីទកាសែតកន្លងទៅថ្មីៗនេះ ក្រោយពីការរត់គេចពីការចាប់ខ្លួន នៅក្នុងសំណុំរឿងក្តីក្តាំមួយនោះ មេធាវីរូបនេះបានប្រាប់អោយដឹងថា លោកនឹងសំណាក់ធម៌នៅមុខស្ថាប័នយុត្តិធម៌មួយចំនួន ដើម្បីអំពាវនាវអោយស្ថាប័នទាំងនោះអនុវត្តគោលការណ៍យុត្តិធម៌។ ស្ថាប័នទាំងនោះរួមមានសាលាដំបូងខេត្តកណ្តាល ដែលបានប្តឹងលោក សាលាឧទ្ធរណ៍ តុលាការកំពូល ក្រសួងយុត្តិធម៌ និងចុងក្រោយ គឺគណៈមេធាវី។ គណៈមេធាវីដែលកំពុងពិចារណាលើសកម្មភាពរបស់មេធាវីជូង ជូងី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ