តុលាការថៃលើកពេលសវនាការលើបុរសខ្មែរម្តងទៀត ទៅថ្ងៃទី៦កញ្ញា
តុលាការថៃខេត្តស៊ីសាកេតរបស់ថៃបានប្រកាសលើកពេលសវនាការលើលោកអ៊ឹង គឹមថៃជាថ្មីម្តងទៀត បន្ទាប់ពីលោកអ៊ឹង គឹមថៃច្រានចោលការចោទប្រកាន់ និងបានទាមទារ តទល់ជាមួយក្រុមយោធាដែលចាប់ខ្លួនលោក។ សវនាការលើកក្រោយនឹងត្រូវធ្វើនៅថ្ងៃទី៦ខែកញ្ញា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
តុលាការថៃខេត្តស៊ីសាកេតបានប្រកាសចោទបុរសជនជាតិខ្មែរសាជាថ្មីពីបទប្រើប្រាស់គ្រឿងញៀន ដោយគ្មានភស្តុតាងដាក់បន្ទុក និងបទសង្ស័យធ្វើចារកម្មដោយបានបង្ហាញផែនទី និងរូបថតមួយចំនួនដែលយោធានិងប៉ូលិសថៃបានរកឃើញនៅពេលពួកគេចាប់ខ្លួន លោកអ៊ឹង គឹមថៃ។
ប៉ុន្តែលោកអ៊ឹង គឹមថៃនិងមេធាវីទាំង៤រូបរបស់លោកបានបដិសេធនិងច្រានចោលការបទចោទទាំងនេះ ហើយបានទាមទារទៅតុលាការដើម្បីខ្លួនបានតទល់ជាមួយក្រុមយោធា និងប៉ូលិសថៃអំពីរូបថត ដែលលោកអះអាងថា មិនមែនជារូបថតរបស់លោក។ ដោយសារតែមានការទាមទារពីលោកអ៊ឹង គឹមថៃយ៉ាងនេះ ទើបតុលាការសម្រេចលើកពេលសវនាការទៅថ្ងៃទី៦ខែកញ្ញាខាងមុខ។
លោកកុយ គួងអ្នកនាំពាក្យក្រសួងការបរទេសកម្ពុជាអត្ថាធិប្បាយថា ការលើកពេលម្តងហើយម្តងទៀតយ៉ាងដូច្នេះរបស់តុលាការថៃ គឺជាការស្វែងរកពេលដើម្បីប្រឌិតភស្តុតាងដាក់បន្ទុកលើលោកអ៊ឹង គឹមថៃ។ ប្រភពដដែលពីក្រសួងការបរទេសកម្ពុជាបន្តថា គេនៅតែមិនដឹងប្រាកដថា តើនៅថ្ងៃទី៦កញ្ញាខាងមុខនោះ តុលាការថៃនឹងរៀបចំអោយលោកអ៊ឹង គឹមថៃតទល់ជាមួយយោធា និងប៉ូលិសដែលបញ្ជូនរូបថតដែលពួកគេអះអាងថាបានរឹបអូសពីលោកអ៊ឹង គឹមថៃនោះ ឬយ៉ាងណានោះទេ? រូបថត និងផែនទីទាំងនោះ បង្ហាញអំពីតំបន់យោធាដែលលោកអ៊ឹង គឹមថៃត្រូវបានចាប់ខ្លួន។ ប៉ុន្តែលោកអ៊ឹង គឹមថៃបញ្ជាក់ថា លោកមិនបានស្គាល់រូបថតទាំងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ