អ្នកជំនាញ៖ នៅពេលនេះ នៅមិនទាន់មានមនុស្សពេញវ័យស្លាប់ដោយសារតែវីរុសហ្ស៊ីកានៅឡើយទេ
រហូតមកទល់នឹងបច្ចុប្បន្ននេះ អង្គការសុខភាពពិភពលោក WHO នៅមិនទាន់រកឃើញភស្តុតាងណាមួយ ដែលបញ្ជាក់ថាមានមនុស្សពេញវ័យស្លាប់ បន្ទាប់ពីបានឆ្លងវីរុសហ្ស៊ីកា។ នេះបើតាមការបញ្ជាក់របស់លោកវេជ្ជបណ្ឌិត លី សុវណ្ណ ប្រធានមជ្ឈមណ្ឌលប្រយុទ្ធប្រឆាំងនឹងជំងឺឆ្លងរបស់ក្រសួងសុខភាព នៅក្នុងឱកាសសិក្ខាសាលាផ្សព្វផ្សាយស្តីពីជំងឺហ្ស៊ីកា (ZIKA) ជូនដល់ប្រព័ន្ធផ្សព្វផ្សាយ នៅព្រឹកថ្ងៃទី ១៨កុម្ភៈនេះ នៅឯវិទ្យាស្ថានសុខភាពសាធារណៈ ក្នុងទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៩
លោកវេជ្ជបណ្ឌិតលី សុវណ្ណ បានឲ្យដឹងថា ជំងឺហ្ស៊ីកា បង្កឡើងដោយវីរុសហ្ស៊ីកា ឆ្លងតាមរយៈមូសខ្លាខាំ។ ហើយអ្នកដែលមានជំងឺហ្ស៊ីកាជាធម្មតាមានគ្រុនក្តៅតិចតួច មានកន្ទួលក្រហមលើស្បែក ក្រហមភ្នែកជាដើម។ ហើយរោគសញ្ញាទាំងនេះ នឹងជាវិញក្នុងរយៈពេលពីពីរថ្ងៃ ទៅដល់៧ថ្ងៃ។ លោកបានបន្តឲ្យដឹងទៀតថា បច្ចុប្បន្ននេះ គ្មានវ៉ាក់សាំង ឬការព្យាបាលជាក់លាក់ណាមួយសំរាប់ជំងឺហ្ស៊ីកានេះ។ ហើយវិធីបង្កាដែលល្អបំផុតគឺកុំឲ្យមូសខាំ។
វិធីបង្កាកុំឲ្យមូសខាំបានគឺប្រើថ្នាំសម្លាប់សត្វល្អិតឬថ្នាំមូស ការស្លៀកសម្លៀកបំពាក់មានព័ណភ្លឺ ដែលគ្របដណ្តប់ភាគច្រើននៃរាងកាយដែលអាចធ្វើទៅបាន។ ឬក៏អាចប្រើឧបករណ៍ដូចជាសំណាញ់បិទបង្អួច ឬក៏ដេកក្នុងមុងជាដើម។ ហើយចំណុចសំខាន់មួយទៀតគឺត្រូវលាងសំអាតរបស់ដែលអាចទុកទឹកបាន ដូចជាធុង ផើងផ្កា ឬសំបកកង់ឡាន ដែលជាកន្លែងសត្វមូសអាចពងបាន។
នៅពេលនេះអង្គការសុខភាពពិភពលោកបានកំពុងតែចំណាយថវិកាយ៉ាងច្រើនប្រមាណជា ៥៦ លានដុល្លារអាមេរិក ដើម្បីស្រាវជ្រាវ និងរិះរកវិធីការពារ និងបង្កើតថ្នាំវ៉ាក់សាំង។
សូមបញ្ជាក់ថាវីរុសហ្ស៊ីកាបានកើតមានដំបូងនៅលើសត្វស្វាអ៊ូហ្គង់ដា នៅឆ្នាំ១៩៤៧ ហើយបន្តដល់សត្វមូសនៅក្នុងឆ្នាំ១៩៤៨ ។ នៅក្នុងឆ្នាំ១៩៥២ វីវុសនេះបានឆ្លងដល់មនុស្សតាមរយៈមូសខ្លាខាំ នៅក្នុងទ្វីបអាហ្វ្រិក អាស៊ីខាងត្បូង និងអាស៊ីអាគ្នេយ៍។ នៅឆ្នាំ១៩៧៧ ដល់ ១៩៧៨ មេរោគនេះបានបន្តរីករាលដាលដល់ប្រទេសប៉ាគីស្ថាន ប្រទេសម៉ាឡេស៊ី និងឥណ្ឌូនេស៊ី។ នៅឆ្នាំ២០០៧ មេរោគនេះបានបង្កផលប៉ះពាល់ដល់មនុស្សប្រមាណជា ៧៣% នៅលើកោះយ៉ាប់ (YAP) មីក្រូណេស៊ី ក្នុងតំបន់សមុទ្រប៉ាស៊ីហ្វិកភាគខាងលិច។ នៅក្នុងឆ្នាំ២០១៤ មានមនុស្ស៥ម៉ឺន ៥ពាន់នាក់ឆ្លងនៅក្នុងប្រទេសបារាំង ប៉ុន្តែមិនធ្ងន់ធ្ងរនោះទេ។ ដោយឡែកនៅក្នុងឆ្នាំ២០១៥វិញ មានមនុស្សឆ្លងជំងឺនេះ ចំនួន១លាន៥សែននាក់ នៅអាមេរិកឡាទីន និងប្រទេសប្រេស៊ីល។ ហើយនៅក្នុងឆ្នាំ២០១៦ នេះវិញ មេរោគនេះ កំពុងតែគម្រាមកំហែងប្រទេសចំនួន២០ នៅក្នុងពិភពលោកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ