វេទិកាសេដ្ឋកិច្ចពិភពលោកស្តីពីអាស៊ាន៖ ជាឱកាសបង្ហាញខ្លួនរបស់កម្ពុជា លើឆាកអន្តរជាតិ
ចាប់ពីថ្ងៃទី ១០ ដល់ថ្ងៃទី ១២ ឧសភា កម្ពុជាបានធ្វើជាម្ចាស់ផ្ទះរៀបចំវេទិកាសេដ្ឋកិច្ចពិភពលោកស្តីពីអាស៊ានក្នុងទីក្រុងភ្នំពេញ។ នេះគឺជាលើកទី ១ហើយ សម្រាប់កម្ពុជា ដែលបានរៀបចំវេទិកានេះ។ ប្រធានគណៈកម្មាធិការរៀបចំវេទិកាសេដ្ឋកិច្ចពិភពលោកស្តីពីអាស៊ានបានលើកឡើងថាវេទិកានេះ ជាឱកាសមាសដ៏មានតម្លៃសម្រាប់កម្ពុជាក្នុងការបង្ហាញខ្លួននៅលើឆាកអន្តរជាតិ។
ចុះផ្សាយនៅថ្ងៃ៖
ស្តាប់ - ០២:១៣
វេទិកាសេដ្ឋកិច្ចពិភពលោកស្តីពីអាស៊ាន ឆ្នាំ ២០១៧ ក្រោមប្រធានបទ៖ “យុវជន បច្ចេកវិទ្យា និងកំណើន ” នឹងមានការចូលរួមពីមនុស្សច្រើនជាង ៧០០នាក់ មកពី ៤០ប្រទេសលើពិភពលោក។ បុគ្គលសំខាន់ៗ ដែលនឹងចូលរួមក្នុងវេទិកានេះ រួមមានលោកហ៊ុន សែន នាយករដ្ឋមន្ត្រីកម្ពុជា លោកថងលួង ស៊ីស៊ូលីត (Thongloun Sisoulith) នាយករដ្ឋមន្ត្រីឡាវ លោក រ៉ូឌ្រីហ្គោ ឌូទែតេ (Rodrigo Duterte) ប្រធានាធិបតីហ្វីលីពីន និងលោក ង្វៀន ស៊ុងហ៊្វុក (Nguyen Xuan Phuc) នាយករដ្ឋមន្ត្រីវៀតណាម។ ក្រៅពីនេះក៏មានម្ចាស់ក្រុមហ៊ុនធំមកពី ១៥វិស័យចូលរួមដែរ។
វេទិកាដែលធ្វើឡើងរយៈពេល ៣ថ្ងៃនៅទីក្រុងភ្នំពេញ នៅឆ្នាំ ២០១៧នេះ ក៏ចំពេលដែលសមាគមអាស៊ានប្រារព្ធខួបទី ៥០ឆ្នាំ ហើយក៏ជាពេលល្អបំផុត ដែលអាស៊ានត្រូវក្រឡេកមើលពីស្នាដៃរបស់ខ្លួនកន្លងមក និងបង្កើតគំនិតថ្មី ដើម្បីនាំយកអាស៊ានឆ្ពោះទៅកាន់អនាគត។ នេះបើតាមការលើកឡើងរបស់លោក Justin Wood ប្រធានប្រចាំតំបន់អាស៊ីប៉ាស៊ីហ្វិក និងជាសមាជិកគណៈកម្មការប្រតិបត្តិនៃវេទិកាសេដ្ឋកិច្ចពិភពលោក។
កាលពីពេលថ្មីៗនេះ លោកស៊ុន ចាន់ថុល ក្នុងតួនាទីជាប្រធានគណៈកម្មាធិការរៀបចំវេទិកាសេដ្ឋកិច្ចពិភពលោកស្តីពីអាស៊ានលើកឡើងថា នេះជាឱកាសមាសដ៏មានតម្លៃសម្រាប់កម្ពុជាក្នុងការបង្ហាញខ្លួននៅលើឆាកអន្តរជាតិ ហើយក៏ជាវេទិកាមួយអាចទាក់ទាញវិនិយោគិនបរទេសជាច្រើនបន្ថែមទៀតមកវិនិយោគនៅកម្ពុជាផងដែរ។
លោកស៊ុន ចាន់ថុលកាលពីថ្ងៃទី ៨ ឧសភា បានលើកឡើងថា កម្ពុជាមានកិត្ដិយស និងកិត្យានុភាពដែលត្រូវបានជ្រើសរើសឱ្យធ្វើជាម្ចាស់ផ្ទះក្នុងការរៀបចំវេទិកាសេដ្ឋកិច្ចពិភពលោក និងបានឆ្លុះបញ្ចាំងអំពីការរីកចម្រើនរបស់កម្ពុជាដែលបានធ្វើជាម្ចាស់ផ្ទះសម្រាប់ព្រឹត្តិការណ៍សកលមួយនេះ។
បើតាមសេចក្តីសង្ខេបព័ត៌មានឲ្យដឹងថាកម្មវិធីសំខាន់ៗ ក្នុងវេទិការួមមានការជជែកគ្នាលើសសរស្តម្ភចំនួន ៣ ដែលមានដូចជា អាស៊ាននៅក្នុងបរិបទថ្មីនៃពិភពលោក អាស៊ាន និងការភ្ជាប់ទំនាក់ទំនង និងអាស៊ាន និងយុវជន។
នៅក្នុងវេទិកាសេដ្ឋកិច្ចពិភពលោកស្តីពីអាស៊ាន ក៏មានវេទិកាមួយទៀតដែលនឹងជជែកពីបញ្ហាសន្តិសុខស្បៀង ដែលមេដឹកនាំសំខាន់ៗប្រមាណ ១២០នាក់ ពីសមាគមអាស៊ាន ពិភពលោក វិស័យឯកជន សង្គមស៊ីវិល និងតំណាងកសិករ ស្វែងរកដំណោះស្រាយ និងចាត់វិធានការជួយពង្រឹង រួមទាំងរក្សាស្ថិរភាពនៃប្រព័ន្ធស្បៀងអាហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ