សង្គមស៊ីវិល៖ មានច្បាប់ទើបបញ្ជៀសពលរដ្ឋពីហានិភ័យនៃគ្រឿងស្រវឹងបាន
នៅថ្ងៃនេះ លោកនាយករដ្ឋមន្ត្រីហ៊ុន សែន បានរិះគន់អ្នកផលិត ស្រា ស ដែលបានធ្វើខុសបច្ចេកទេសដើម្បីកេងចំណេញប្រាក់កាន់តែច្រើន ប៉ុន្តែមិនបានគិតពីសុវត្ថិភាព របស់អ្នកទទួលទាន។ ការរិះគន់នេះ ធ្វើឡើងមួយថ្ងៃ ក្រោយ ក្រសួងសុខាភិបាលចេញសេចក្តីប្រកាសព័ត៌មានមួយ ដែលស្នើអោយអាជ្ញាធរមូលដ្ឋាន បិទកន្លែងផលិតស្រា ស នៅខេត្តក្រចេះ។ ប៉ុន្តែសង្គមស៊ីវិលបានលើកឡើងថា ទង្វើទាំងនេះ នៅពុំទាន់គ្រប់គ្រាន់នៅឡើយទេ ក្នុងការ បញ្ជៀសពលរដ្ឋពីហានិភ័យនៃគ្រឿងស្រវឹងបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
បន្ទាប់ពីលោកនាយករដ្ឋមន្ត្រីហ៊ុន សែន អំពាវនាវ អោយប្រជាពលរដ្ឋគិតពីសុខភាពរបស់ខ្លួនពេលទទួលទានគ្រឿងស្រវឹង និងបន្ទាប់ពីក្រសួងសុខាភិបាល ស្នើអោយអាជ្ញាធរ បិទកន្លែងផលិតស្រា ស នៅខេត្តក្រចេះ សង្គមស៊ីវិលបានលើកឡើងថា ទង្វើទាំងនេះ នៅពុំទាន់គ្រប់គ្រាន់នៅឡើយទេ។ សង្គមស៊ីវិលបន្តថា កម្ពុជាត្រូវតែមានច្បាប់ស្តីពីការគ្រប់គ្រងគ្រឿងស្រវឹងព្រោះច្បាប់នេះនឹងជួយពលរដ្ឋកម្ពុជាអោយចៀសឆ្ងាយពីហានិភ័យនៃគ្រឿងស្រវឹងបាន។
កញ្ញា ម៉ក់ ទេវិន្ទ ប្រធានគម្រោងនៃអង្គការចលនាដើម្បីសុខភាពកម្ពុជានិយាយថាបើទោះជាកន្លែងផលិតគ្រឿងស្រវឹងខ្លះត្រូវបានបិទ ក៏គ្រឿងស្រវឹងដែលកំពុងចរាចរណ៍ផ្សេងទៀត បាននឹងកំពុងបំផ្លាញសុខភាពប្រជាពលរដ្ឋជារៀងរាល់ថ្ងៃ។
ដោយដកស្រង់របាយការណ៍របស់អង្គការសុខភាពពិភពលោក កញ្ញាបន្តថា ទោះបីជាគ្រឿងស្រវឹងខ្លះ មិនមានជាតិពុលភ្លាមៗក៏ដោយ ក៏គ្រឿងស្រវឹងទាំងនោះអាចធ្វើអោយអ្នកទទួលទាន មានជំងឺប្រហែល ២០០មុខ ហើយអាចបង្កបញ្ហាសង្គមផ្សេងៗដូចជា អំពើហិង្សាក្នុងគ្រួសារ គ្រោះថ្នាក់ចរាចរណ៍ ជាដើម។
ដូចគ្នានេះដែរ លោក យង់ គឹមអេង ប្រធានមជ្ឈមណ្ឌល ប្រជាពលរដ្ឋដើម្បីអភិវឌ្ឍន៍ និង សន្តិភាព លើកឡើងថា ឥទ្ធិពលរបស់គ្រឿងស្រវឹង បានប៉ះពាល់យ៉ាងធ្ងន់ធ្ងរដល់សេដ្ឋកិច្ចជាតិ។ លោក គឹមអេង បន្តថា ការមានច្បាប់ស្តីពីការគ្រប់គ្រងគ្រឿងស្រវឹង នឹងអាចទប់ស្កាត់ប្រជាពលរដ្ឋមិនអោយផលិតស្រា និងលក់ស្រាខុសច្បាប់ បញ្ជៀសការពុលស្រា និង ជួយកាត់បន្ថយភាពក្រីក្រផងដែរ។
យោងតាមការស្រាវជ្រាវរបស់សកលវិទ្យាល័យភូមិន្ទភ្នំពេញចុងឆ្នាំ ២០១៤ បានអោយដឹងថា ប្រជាពលរដ្ឋ៩៦ភាគរយ គាំទ្រអោយរដ្ឋាភិបាលចាត់វិធានការត្រួតពិនិត្យផលិតផលគ្រឿងស្រវឹង ដោយស្នើសុំអោយរដ្ឋាភិបាលហាមឃាត់ការផ្សាយពាណិជ្ជកម្មគ្រឿងស្រវឹង កម្រិតអាយុអ្នកប្រើប្រាស់គ្រឿងស្រវឹង ដំឡើងពន្ធលើផលិតផលគ្រឿងស្រវឹង និង កំណត់ពេលវេលា និងទីតាំងលក់គ្រឿងស្រវឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ