ប្រជាជនកម្ពុជានៅតែមិនដាច់អាល័យពីមុខវាំង នាថ្ងៃបុណ្យអុំទូក
នៅថ្ងៃទី២ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែនាឆ្នាំ២០១៥នេះ កម្មវិធីពិសេស២ ដែលមិនធ្លាប់មាន នឹងត្រូវប្រារព្ធធ្វើឡើងនៅមុខវាំង និងវត្តភ្នំ នោះគឺការបណ្តែតគោម និងការបង្ហាញអំពីដាល់អំបុក។ ចំពោះទិដ្ឋភាពទូទៅរយៈពេល២ថ្ងៃ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែនាឆ្នាំ២០១៥នេះ បើសង្កេតនៅលើដងមហាវិថីនានានៅភ្នំពេញ មានសភាពស្ងប់ស្ងាត់ល្អណាស់។ ផ្ទុយទៅវិញ នៅតាមភោជនីយដ្ឋាន រមណីយដ្ឋានវត្តភ្នំ និងនៅមុខព្រះបរមរាជវាំង មានភាពអ៊ូអរល្អគ្រាន់បើ។
ចុះផ្សាយនៅថ្ងៃ៖
ស្តាប់ - ០២:៣១
នាព្រឹកថ្ងៃទី25 ខែវិច្ឆិកានេះ នៅវត្តភ្នំក្រុមការងាររបស់សាលារាជធានីភ្នំពេញកំពុងតែញាប់ដៃញាប់ជើងដើម្បីរៀបចំរណ្តាប់ក្រុងពាលី មុននឹងចាប់ផ្តើមកម្មវិធីបង្ហាញអំពីការដាល់អំបុកដែលត្រូវចាប់ផ្តើមនាម៉ោង3ល្ងាច។ នៅវត្តភ្នំនាព្រឹកនេះមានមនុស្សម្នាគួរសម ក្រៅតែអ្នកទេសចរជាតិក៏មានដែរអ្នកទេសចរអន្តជាតិ។
ចំណែកនៅលើដងវិថីនានាវិញ មានសភាពស្ងប់ស្ងាត់ជាងធម្មតា ក៏ប៉ុន្តែនៅពេលដែលយើងទៅដល់មុខព្រះបរមរាជវាំងវិញ នាព្រឹកនេះមានការកកស្ទះចរាចរណ៍បន្តិចដោយសារតែមាន ប្រជាជនខ្មែរមួយចំនួននៅតែនាំកូនចៅទៅកំសាន្តនៅខាងមុខព្រះបរមរាជវាំង។ នៅខាងមុខព្រះបរមរាជវាំងនៅម៉ោង៦ល្ងាច ថ្ងៃទី២នៃព្រះរាជពិធីបុណ្យអុំទូកនេះរួមមានការបណ្តែតគោម ចំនួន៥០០ នៅលើទន្លេចតុមុខ។
ជាការបណ្តែតគោមលើកដំបូងនៅរាជធានីភ្នំពេញនៅក្នុងឱកាសព្រះរាជពិធីបុណ្យឆ្នាំនេះ។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ថា គោមចំនួន៥០០ ដែលរៀបចំដោយក្រុមការងារសាលារាជធានីភ្នំពេញនឹងចែកជូនឥតគិតថ្លៃដល់អ្នកទេសចរ។ អ្នកនាំពាក្យរូបនេះក៏បានថ្លែងស្វាគមន៍ចំពោះបងប្អូនប្រជាពលរដ្ឋ ធ្វើគោមបណ្តែត ដើម្បីយកមកចូលរួមនៅក្នុងកម្មវិធីល្ងាចនេះទាំងអស់គ្នា។
រីឯនៅកោះពេជ្រវិញ នាព្រឹកថ្ងៃទី២៥វិច្ឆិកានេះ សកម្មភាពលក់ដូរក៏ល្អប្រសើរដែរ។ មានស្តង់ខ្លះពេញហៀរដោយអតិថិជន តែស្តង់ខ្លះមានអ្នកទិញមួយៗ។ ហាងទំនិញមួយចំនួនដែលមានលើដងមហាវិថី ក៏បានបើកទ្វារទទួលស្វាគមន៍អតិថិជនដែរ គឺមិនដូចថ្ងៃបុណ្យធំៗដូចជាចូលឆ្នាំ បុណ្យភ្ជុំបិណ្ឌទេ ដែលហាងទំនិញទាំងអស់បានបិទទ្វារខណៈពលរដ្ឋនៅភ្នំពេញចេញទៅជួបជុំគ្រួសារនៅស្រុកកំណើត។
កាលពីយប់ថ្ងៃទី២៣ ខែវិច្ឆិកាម្សិលមិញ ដែលជាថ្ងៃទី១នៃព្រះរាជពិធីបុណ្យអុំទូក បើទោះបីជាមិនពពាក់ពពូនដូចរាល់ដង ក៏ប៉ុន្តែនៅមុខវាំងមិនស្ងាត់ជ្រងំនោះទេ គឺអ្នកទេសចរជាច្រើនបានទៅទស្សនាការបាញ់កាំជ្រួចនៅមុខវាំង ទៅមើលស្តង់ពិព័រណ៍លក់ទំនិញ និងឆាកសំដែងសិល្បៈដែលត្រូវបានរៀបចំយ៉ាងហឹកហ៊ាក់នៅឯមុខវត្តបុទុមវត្តី និងកោះពេជ្រ នៅវត្តភ្នំ និងទីលានប្រជាធិបតេយ្យផងដែរ។
សូមបញ្ជាក់ថា ដោយសារតែនៅឆ្នាំ២០១៥នេះទឹកទន្លេរាក់ រដ្ឋាភិបាលបានសម្រេចមិនរៀបចំ ការបណ្តែតប្រទីប និងការប្រណាំងទូកដ៏មានប្រជាប្រិយនោះទេ។ គួបផ្សំនឹងផ្អាកព្រះរាជពិធីបុណ្យអុំទូក ជាបន្តបន្ទាប់នាប៉ុន្មានឆ្នាំចុងក្រោយនេះ ដោយសារតែឧបទ្ទហេតុនៅកោះពេជ្រ ការសោយទីវង្គតនៃអង្គសម្តេចឳ និងគ្រោះមហន្តរាយធម្មជាតិ ដូច្នេះហើយទើបធ្វើចំនួនអ្នកមកលេងបុណ្យអុំទូក ដែលមានចំនួនច្រើនលើសលប់ ចេះតែថយចុះជាលំដាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ