អុំទូក៖ អ្នកភ្នំពេញសម្រុកចេញទៅកំសាន្តនៅខេត្ត និងខ្លះទៀតចេញទៅក្រៅប្រទេស
អ្នកជំនាញផ្នែកទេសចរណ៍បានកត់សម្គាល់ថា នៅក្នុងឱកាសនៃព្រះរាជពិធីបុណ្យអុំទូកពលរដ្ឋរស់នៅភ្នំពេញ បានសម្រុកនាំគ្នាចេញទៅដើរលេងនៅតាមបណ្ដាខេត្តនៃតំបន់ទេសចរណ៍សំខាន់របស់ប្រទេសកម្ពុជា។ ទន្ទឹមនឹងនេះ អ្នកភ្នំពេញខ្លះទៀតក៏បានឆ្លៀតពេលនេះចេញទៅលេងនៅក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:០០
អ្នកភ្នំពេញចេញទៅលេងខេត្ត រីឯអ្នកខេត្តឡើងមកលេងនៅភ្នំពេញវិញ នៅក្នុងឱកាសនៃព្រះរាជពិធីបុណ្យទូក។ ការសម្រុកចេញទៅលេងនៅតាមបណ្ដាខេត្តនៃតំបន់ទេសចរណ៍សំខាន់ៗរបស់ប្រទេសកម្ពុជា ក៏ដោយសារពេលវេលាឈប់សម្រាកគឺមានរយៈពេលយូររហូតដល់ទៅ៤ឬ៥ថ្ងៃឯណោះ។ នេះគឺជាការកត់សម្គាល់របស់លោក ហូរ វណ្ឌី ទីប្រឹក្សាសមាគមន៍ទីភ្នាក់ងារទេសចរណ៍កម្ពុជា។
លោក ហូរ វណ្ឌី បន្ថែមថា តំបន់ទេសចរណ៍ដែលទទួលបានការចាប់អារម្មណ៍ពីពលរដ្ឋ តំបន់ឆ្នេរនាខេត្តព្រះសីហនុគឺមានភាពមមាញឹកខ្លាំងដោយសារពលរដ្ឋសម្រុកនាំគ្នាទៅលេងនៅទីនោះ។ ក្រៅពីតំបន់ឆ្នេរ តំបន់ទេសចរណ៍នៅភូមិភាគឥសានវិញក៏មិនស្ងាត់ដែរ។ ចំណែកគោលដៅចុងក្រោយនៃដំណើរកំសាន្តរបស់ពួកគាត់ ពលរដ្ឋបាននាំគ្នាទៅលេងរមណីយដ្ឋានអង្គរក្នុងខេត្តសៀមរាប។ ចេញពីអង្គរពួកគេភាគច្រើនហួសទៅលេងនៅបឹងទន្លេសាប។
លោក ង៉ូវ សេងកាត់ ប្រធានមន្ទីរទេសចរណ៍ប្រចាំខេត្តសៀមរាបបានឲ្យដឹងដែរថា តំបន់ទេសចរណ៍សំខាន់ៗរួមមានៈទឹកធ្លាក់ភ្នំគូលេន ភូមិវប្បធម៌ បឹងទន្លេសាប និងបារាយទឹកថ្លាជាដើម គឺផ្ទុកមនុស្សពេញទាំងអស់។ ជាមួយនឹងចំនួនមនុស្សដ៏ច្រើនចេញទៅលេងសៀមរាប លោក ង៉ូវ សេងកាក់ បង្ហាញពីភាពជោគជ័យដែរសៀមរាបទទួលភ្ញៀវបានល្អតាមរយៈការគ្រប់គ្រងបាននៅតម្លៃស្នាក់នៅរួមនឹងតម្លៃម្ហូបអាហារជាដើម។ ក្ដីរំពឹងចំពោះខេត្តសៀមរាបបីថ្ងៃនៃពិធីបុណ្យអុំទូកនឹងទទួលបានភ្ញៀវទេសចរជាតិ និងអន្តរជាតិចន្លោះ២០ទៅ២៥ម៉ឺននាក់ដែរ។
ក្រៅពីដំណើរកំសាន្តក្នុងស្រុកពលរដ្ឋខ្មែរ ក៏និយមចេញទៅលេងនៅក្រៅប្រទេសដែរ។និន្នាការនិយមចេញទៅលេងក្រៅប្រទេសក៏ដោយសារកម្រិតជាជីវភាពមានភាពល្អប្រសើរជាងមុន។ ក្នុងនោះប្រទេសនៅក្នុងតំបន់អាស៊ានគឺជាគោលដៅសំខាន់នៃដំណើរកំសាន្តរបស់ពលរដ្ឋខ្មែរ។ តាមការអង្កេតរបស់លោក ហូរ វណ្ឌី ទៀតនោះយុវវ័យដែលចង់បានសេរីភាពផ្ទាល់ខ្លួនក៏មានចំនួនច្រើនចេញទៅលេងនៅក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ