GDPរបស់កម្ពុជា កើនឡើង៧ដងពីឆ្នាំ១៩៩៣-២០១៥
លោកនាយករដ្ឋមន្ត្រី ហ៊ុនសែន នៅថ្ងៃចន្ទទី៧ មីនា នេះបានថ្លែងនៅក្នុងពិធីបើកសន្និសីទចក្ខុវិស័យប្រទេសកម្ពុជា ឆ្នាំ២០១៦ថា កំណើនផលិតផលក្នុងស្រុកបានកើនឡើង៧ដងចាប់ពីឆ្នាំ១៩៩៣ ដល់ឆ្នាំ២០១៥។ ជាកំណើនដែលបានកើនឡើងពី២ពាន់៥រយលានដុល្លារ ទៅដល់ជាង១៨ពាន់លានដុល្លារអាមេរិក។ ជាមួយកំណើនដែលប្រមុខរដ្ឋាភិបាលកម្ពុជាបានប្រកាសនេះ កម្ពុជាក៏កំពុងជំពាក់បំណុលបរទេសយ៉ាងច្រើនពាន់លានដុល្លារផងដែរ។
ចុះផ្សាយនៅថ្ងៃ៖
ស្តាប់ - ០២:២១
ក្នុងរយៈពេល២២ឆ្នាំ ផលិតក្នុងស្រុកសរុបរបស់កម្ពុជាបានកើនឡើងចំនួន៧ដង ពីឆ្នាំ១៩៩៣ ដល់ឆ្នាំ២០១៥។ ជាកំណើនដែលប្រមុខរដ្ឋាភិបាលបានលើកឡើងជាផលដែលហូរចេញយុទ្ធសាស្ត្ររបស់រដ្ឋាភិបាលដែលបានដាក់ចេញនៅយុទ្ធសាស្ត្រឈ្នះឈ្នះ ដើម្បីបញ្ចប់សង្គ្រាមទាំងស្រុងនៅកម្ពុជា ការផ្តោតទៅលើការកសាងហេដ្ឋារចនាសម្ព័ន្ធ។ នេះគឺជាការបញ្ជាក់ពីលោកនាយករដ្ឋមន្ត្រីហ៊ុន សែន ដែលបានថ្លែងនៅក្នុងពិធី បើកសន្និសីទចក្ខុវិស័យប្រទេសកម្ពុជា ឆ្នាំ២០១៦ នៅថ្ងៃទី៧ មីនានេះ។
សម្លេងលោកនាយករដ្ឋមន្ត្រី៖
ប្រមុខរដ្ឋាភិបាលរូបនេះបានបន្តទៀតថា សម្រាប់ចក្ខុវិស័យរបស់ប្រទេសកម្ពុជាសម្រាប់ឆ្នាំ២០១៦នេះ រដ្ឋាភិបាលកម្ពុជាបានដាក់ចេញនូវយុទ្ធសាស្ត្រអភិវឌ្ឍន៍ឧស្សាហកម្មឆ្នាំ២០១៥ ដល់ឆ្នាំ២០២៥ ដើម្បីជួយជំរុញសេដ្ឋកិច្ចកម្ពុជាដែលកំពុងមានសន្ទុះស្រាប់។ កម្ពុជាដែលមានសន្ទុះប្រមាណជា៧ភាគរយក្នុងរយៈពេលមួយឆ្នាំ។
សម្រាប់កម្ពុជាការបន្តយុទ្ធសាស្ត្រកសាង និងគ្រប់គ្រងហេដ្ឋារចនាសម្ព័ន្ធផ្លូវថ្នល់ដែលប្រទាក់ក្រឡាគ្នានិងការបញ្ចុះតម្លៃអគ្គីសនី រួមទាំងការពង្រឹងចំណេះជំនាញរបស់ប្រជាពលរដ្ឋ នោះគឺជាកត្តាជំរុញទឹកចិត្តដល់អ្នកវិនិយោគទន់និងជាការវិនិយោគទន់។ សម្រាប់លោកនាយករដ្ឋមន្ត្រី កំណើនសេដ្ឋកិច្ចនេះ ក៏មិនអាចកាត់ផ្តាច់ចេញពីការអនុគ្រោះ និងអំណោយផលទៅលើទីតាំងភូមិសាស្ត្ររបស់ប្រទេសកម្ពុជា និងការបង្កើនភាពសហការគ្នារវាងប្រទេសក្នុងអាស៊ាន និងអាស៊ានជាមួយអន្តរជាតិផងដែរ។
យ៉ាងណាក៏ដោយ ដើម្បីឱ្យកម្ពុជាអាចបន្តរក្សាកំណើននោះ កម្ពុជាត្រូវការបន្តពង្រីកបន្ថែមផ្លូវជាតិ និងអន្តរជាតិ រួមទាំងផ្លូវជនបទដែលតភ្ជាប់ពីទីក្រុងទៅជនបទ ក្រៅពីនោះ លំហូរចរាចរណ៍តាមផ្លូវទឹកក៏ដើរតួនាទីចាំបាច់ដែលមិនអាចកាត់ថ្លៃបាន។ ក្រៅពីនេះ ការតភ្ជាប់ផ្លូវដែកពីទីក្រុងធំៗក្នុងប្រទេស និងការតភ្ជាប់ពីប្រទេសកម្ពុជា ទៅកាន់ប្រទេសក្នុងតំបន់ផងដែរ។
ទន្ទឹមនឹងការប្រកាសពីវឌ្ឍនភាពស្តីពីកំណើនផលិតផលក្នុងស្រុកសរុបនេះ កម្ពុជាក៏កំពុងជំពាក់បំណុលបរទេសប្រមាណជាង៤ពាន់លានដុល្លារ ដែលស្មើប្រមាណ៤៥ភាគរយនៃផលិតផលទុនក្នុងស្រុកសរុបផងដែរ។ ដែលនេះអ្នកវិភាគសេដ្ឋកិច្ចកម្ពុជា បានស្នើឱ្យរដ្ឋាភិបាលត្រូវប្រយ័ត្នប្រយែងចំពោះការចាយវាយ និងគ្រប់គ្រងឱ្យបានល្អ និងតម្លាភាពបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ