ភ្នំពេញផ្ញើកំណត់ទូតទៅហាណូយតវ៉ាពីការរំលោភបំពានតាមបន្ទាត់ព្រំដែន
ក្រសួងការបរទេសកម្ពុជាកាលពីម្សិលមិញបានផ្ញើកំណត់ទូតតវ៉ាមួយទៅប្រទេសវៀតណាម ពាក់ព័ន្ធនឹងការរំលោភបំពានរបស់វៀតណាមនៅតាមបណ្ដោយព្រំដែន។ កំណត់ទូតដែលមានកម្រាស់៤ទំព័រ ទាញការចាប់អារម្មណ៍ទៅទីតាំងសំខាន់ៗនៅក្នុងខេត្តខ្មែរចំនួន៥ ដែលវៀតណាមរំលោភបំពាន និងដែលក្រសួងការបរទេសកម្ពុជាបញ្ជាក់ថា ធ្លាប់បានធ្វើកំណត់ទូតចំនួន២២ និងលិខិតចំនួន១ទៅវៀតណាមរួចមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
តាមកំណត់ទូតចុះថ្ងៃទី១៨សីហា ការរំលោភបំពានរបស់វៀតណាមនៅក្នុងខេត្តខ្មែរទាំង៥រួមមាន៖ ទី១ ការជីកស្រះចំនួន៩ និងការសង់អគារព្រមទាំងផ្លូវបេតុងនៅខេត្តរតនៈគិរី។ ទី២ ការធ្វើផ្លូវនិងប៉ុស្តិ៍រដ្ឋបាលនៅតំបន់ដាក់ដាង ដាក់ហ៊ូត ក្នុងខេត្តមណ្ឌលគិរី។ ទី៣ ការធ្វើផ្លូវនៅក្នុងស្រុកចន្ទ្រា និងស្រុកកំពង់រោទិ៍ ខេត្តស្វាយរៀង។ ទី៤ ការសាងសង់ប៉ុស្តិ៍យោធានៅស្រុកកោះធំ ខេត្តកណ្ដាល។ និងទី៥ ការធ្វើប៉ុស្តិ៍នៅច្រកទ្វារវិញហួយដុង ជាប់បង្គោលព្រំដែនលេខ២៦០ ទល់មុខច្រកទ្វារទ្វេភាគីកំពង់ក្រសាំង ស្រុកបូរីជលសារ ខេត្តតាកែវ។
ក្រសួងបរទេសកម្ពុជាបញ្ជាក់ថា ខណៈដែលគណៈកម្មការចម្រុះព្រំដែននៃប្រទេសទាំងពីរ នៅមិនទាន់បញ្ចប់ការខណ្ឌសីមាជាស្ថាពរនៅឡើយ តំបន់ដូចបានរៀបរាប់ខាងដើមនេះ គឺស្ថិតនៅក្រោមការគ្រប់គ្រងរបស់កម្ពុជា។ ហើយតាមរយៈកំណត់ទូតចុងក្រោយនេះ ទីក្រុងភ្នំពេញបានស្នើឲ្យក្រុងហាណូយ បញ្ឈប់សកម្មភាពសាងសង់ទាំងអស់ជាបន្ទាន់ និងធ្វើឲ្យស្ថានភាពនៅតំបន់ទាំងនោះមានសភាពដូចដើមវិញ ព្រមទាំងចាត់វិធានាការរារាំងកុំឲ្យពលរដ្ឋវៀតណាមចូលមកដាំដុះឬធ្វើសកម្មភាពនៅតំបន់ព្រំដែនទាំងឡាយណាដែលមិនទាន់បញ្ចប់ខណ្ឌសីហា និងបោះបង្គោលព្រំដែន។
គួរជម្រាបជូនថា គិតត្រឹមកំណត់ទូតចុងក្រោយនេះ កម្ពុជាបានផ្ញើកំណត់ទូតចំនួន២៣ និងលិខិតចំនួន១ទៅកាន់វៀតណាម ដើម្បីតវ៉ាអំពីការរំលោភបំពានតាមបន្ទាត់ព្រំដែនកម្ពុជា-វៀតណាម។ ប៉ុន្តែអ្នកវិភាគបញ្ហាសង្គមនិងនយោបាយមើលឃើញថា កំណត់ទូតទាំងអស់នេះ មានឥទ្ធិពលតិចតួចណាស់ទៅលើវៀតណាម ព្រោះកន្លងមក របបកុំម្មុយនីសក្រុងហាណូយ នៅតែគគ្លើនបន្តសកម្មភាពបំពាននៅតាមព្រំដែនខ្មែរឥតល្ហែល្ហើយ។
ប៉ុន្តែយ៉ាងណាក៏ដោយ រដ្ឋាភិបាលកម្ពុជាបានអះអាងថា ខ្លួនមិនបានព្រងើយកន្តើយទេ ដោយអះអាងថា នឹងរៀបចំកិច្ចប្រជុំចង្អៀតរវាងគណៈកម្មការចម្រុះព្រំដែននៃប្រទេសទាំងពីរ នៅថ្ងៃទី២៩សីហាខាងមុខក្នុងទីក្រុងភ្នំពេញ ដើម្បីចរចាដោះស្រាយបញ្ហាទាំងនេះ។ បន្ថែមពីលើនេះ ភាគីទាំងពីរក៏គ្រោងពិភាក្សាលើសំណើសុំទៅប្រទេសបារាំង ឲ្យផ្ដល់អ្នកជំនាញខាងបច្ចេកទេសផែនទី មកចម្លងខ្សែព្រំដែនពីផែនទីបោន ខ្នាត១លើ១រយពាន់ ទៅលើផែនទី UTM ខ្នាត១លើ៥០ពាន់ ត្រង់ចំណុចបង្គោលព្រំដែនលេខ៣០-៤០ និង១៣៨-១៤៧ ព្រមទាំងជួយដៅខ្សែព្រំដែននៅលើដីជាក់ស្ដែង។
លោក វ៉ា គឹមហុង ប្រធានគណៈកម្មការកិច្ចការព្រំដែនកម្ពុជា បានពន្យល់ថា ការចរចានីមួយៗនឹងមិនអាចផ្ដល់ផលបានភ្លាមៗទេ ព្រោះភាគីទាំងសងខាងសុទ្ធតែចង់ការពារប្រយោជន៍ប្រទេសរៀងៗខ្លួន។ ប៉ុន្តែលោកមានសុទិដ្ឋិនិយមថា បញ្ហាទាំងអស់នឹងត្រូវដោះស្រាយតាមផ្លូវចរចា។
ប៉ុន្តែសម្រាប់លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិដែលធ្លាប់តវ៉ាប្រឆាំងខ្លាំងចំពោះការរំលោភព្រំដែនរបស់វៀតណាម យល់ឃើញថា ការចរចា និងកំណត់ទូតតវ៉ា គឺជាជំហានដំបូង។ ប៉ុន្តែប្រសិនបើវាមិនមានប្រសិទ្ធិភាពគ្រប់គ្រាន់ទេ លោក រៀល ខេមរិន្ទ្រ ស្នើឲ្យបង្កើតគណៈកម្មការចម្រុះមួយ ដោយមានសមាសភាពសង្គមស៊ីវិលនិងបក្សប្រឆាំងផង ដើម្បីពិនិត្យនិងពិភាក្សា ឈានទៅដោះស្រាយបញ្ហាព្រំដែននេះ ស្របតាមច្បាប់អន្ដរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ