ជនរងគ្រោះ ព្រោះបាតុកម្មនៅផ្លូវវេងស្រេងកាលពីឆ្នាំមុន រម្លឹកខួបឈឺចាប់ និងដង្ហោយរកយុត្តិធម៌
នៅព្រឹកថ្ងៃសៅរ៍នេះ ក្រុមអង្គការសង្គមស៊ីវិល សកម្មជនការពារសិទ្ធិមនុស្ស សកម្មជនដីធ្លី ព្រះសង្ឈ សាច់ញាតិជនគ្រោះ និង ជនរងគ្រោះផ្ទាល់ដោយសារការបង្ក្រាបបាតុកម្មនៅផ្លូវវេងស្រេង កាលពីអំឡុងដើមខែមករាឆ្នាំ២០១៤ បានមកជួបជុំគ្នារម្លឹកខួបនៃការកើតមានអំពើហិង្សានោះ។ ក្រុមសាច់ញាតិជនរងគ្រោះដែលបានស្លាប់ និងជនរងគ្រោះផ្ទាល់ បានលើកឡើងពីការឈឺចាប់រៀងៗខ្លួន និង បានដង្ហោយរកយុត្តិធម៌។ អាជ្ញាធររដ្ឋាភិបាល អះអាងថា ការស៊ើបអង្កេតករណីហិង្សានោះ បានបិទបញ្ចប់ ហើយសំណុំរឿងនោះកំពុងស្ថិតក្នុងដៃតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
គឺនៅក្នុងពិធីប្រារព្ធខួបមួយឆ្នាំនៃការបង្ក្រាបបាតុកម្មទាមទារដំឡើងប្រាក់ខែរបស់កម្មកររោងចក្រនៅផ្លូវវេងស្រេង ក្បែរសួនឧស្សាហកម្មកាណាឌីយ៉ាកាលពីដើមឆ្នាំមុន នៅថ្ងៃនេះក្រុមសាច់ញាតិរបស់ជនរងគ្រោះដែលបានស្លាប់ និងជនរងគ្រោះផ្ទាល់ដោយសារការបង្ក្រាបនោះ បានមកជួបជុំគ្នារំលឹកឡើងវិញនូវក្តីឈឺចាប់របស់ពួកគេព្រោះតែរងការបង្ក្រាបគ្មានត្រាប្រណីពីសំណាក់កងកម្លាំងរដ្ឋាភិបាល។ នៅចំពោះមុខជនរងគ្រោះផ្សេងទៀត រួមទាំងសកម្មជនការពារសិទ្ធិមនុស្ស សកម្មជនដីធ្លី ជាច្រើននាក់ លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធដែលជាជនរងគ្រោះមួយរូបក្នុងអំពើបង្ក្រាបដោយហិង្សាកាលពីឆ្នាំមុននោះ បានថ្លែងថា ថ្ងៃនេះគឺជាថ្ងៃដែលសមត្ថកិច្ចបាញ់ប្រហារយ៉ាងព្រៃផ្សៃមកលើកម្មករដែលគ្រាន់តែទាមទារដំឡើងប្រាក់ខែ។
សូមរម្លឹកថា នៅថ្ងៃនេះកាលពីឆ្នាំមុន ក្រុមកម្មកររោងចក្រកាត់ដេរនៅសួនឧស្សាហកម្មកាណាឌីយ៉ា ផ្លូវវេងស្រេងនិងរោងចក្រមួយចំនួនទៀត បានធ្វើបាតុកម្មទាមទារដំឡើងប្រាក់ឈ្នួល១៦០ ដុល្លារក្នុងមួយខែ ។ ការតវ៉ានោះ ត្រូវបានឆ្លើយតបដោយការបង្ក្រាបដោយហិង្សាពីសំណាក់កងកម្លាំងរដ្ឋាភិបាល ដែលបានធ្វើអោយបាតុករយ៉ាងហោចណាស់៤នាក់បានស្លាប់ និងមួយចំនួនទៀតបានរងរបួសដោយសារគ្រាប់កាំភ្លើង។ ជាមួយគ្នានោះ កម្មករ និងសកម្មជនការពារសិទ្ធិមនុស្សចំនួន២៣ នាក់ក៏ត្រូវបានចាប់ខ្លួនផងដែរ។ ចំពោះហេតុការណ៍នេះ អង្គការការពារសិទ្ធិមនុស្សនៅកម្ពុជា និងជនរងគ្រោះផ្ទាល់ បានដាក់កំហុសលើអាជ្ញាធររដ្ឋាភិបាលដែលបានធ្វើឲ្យមានមនុស្សស្លាប់ និងរងរបួសទាំងនោះ។
ក៏ប៉ុន្តែ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានចាត់ទុកព្រឹត្តិការណ៍បង្ក្រាបបាតុកម្ម នោះថាជាការប្រើប្រាស់វិធានការស្របច្បាប់ ដើម្បីគ្រប់គ្រងស្ថានការណ៍សង្គមឲ្យវិលមករកស្ថិរភាព សន្តិសុខ និងសុវត្ថិភាពឡើងវិញប៉ុណ្ណោះ។
យ៉ាងណាក៏ដោយ សាច់ញាតិជនរងគ្រោះដែលស្លាប់ និងជនរងគ្រោះផ្ទាល់ បានទាមទារឲ្យរដ្ឋាភិបាលស្វែងរកយុត្តិធម៌ជូនពួកគេ ដោយវែកមុខជនដៃដល់ដែលបានបាញ់ប្រហារលើបាតុករនោះ មកផ្តន្ទាទោសតាមច្បាប់។ ប៉ុន្តែអង្គការការពារសិទ្ធិមនុស្ស បានលើកឡើងថា រដ្ឋាភិបាលមិនមានបំណងក្នុងការស្វែងរកយុត្តិធម៌ជូនជនរងគ្រោះនោះឡើយ។ លោកនី ចរិយា ប្រធានក្រុមស៊ើបអង្កេតនៃសមាគមការពារសិទ្ធិមនុស្សអាដហុក យល់ថា ប្រសិនបើរដ្ឋាភិបាលមានឆន្ទៈក្នុងការស្វែងយុត្តិធម៌ជូនជនរងគ្រោះពិតប្រាដកមែននោះ រឿងនេះមិនចាំបាច់ស៊ើបអង្កេតយូរបែបនេះនោះទេ ព្រោះថាមានភស្តុតាងគ្រប់គ្រាន់ក្នុងវែកមុខអ្នកប្រព្រឹត្តមកលើក្រុមបាតុករ។
លោកខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងប្រាប់វិទ្យុបារាំងអន្តរជាតិថា សមត្ថកិច្ចបានបិទបញ្ចប់ការស៊ើបអង្កេតលើហេតុការណ៍ហិង្សានោះហើយ។ លោកបន្តថា នៅពេលនេះសំណុំរឿងនោះ ស្ថិតនៅក្នុងដៃតុលាការ។ យ៉ាងណាក៏ដោយ ក្រុមអង្គការការពារសិទ្ធិ ជនរងគ្រោះ និង សាច់ញាតិជនរងគ្រោះ បន្ទាប់ពីបញ្ចប់ពិធីរំលឹកខួបនៅផ្លូវវេងស្រេងនេះ ក៏បានដង្ហែរញត្តិដាក់ទៅរដ្ឋសភាជាតិថែមទៀត ដើម្បីស្នើឲ្យរដ្ឋសភាកោះហៅរដ្ឋមន្ត្រីក្រសួងមហាផ្ទៃលោក ស ខេង បំភ្លឺរឿងហេតុការណ៍ហិង្សាដែលបង្កឲ្យមានមនុស្សស្លាប់ និងរបួស នៅផ្លូវវេងស្រេងកាលពីដើមឆ្នាំមុន។ ប៉ុន្តែការដង្ហែក្បួននោះ ត្រូវបានរារាំងដោយអាជ្ញាធរ ក្រុងភ្នំពេញ ក្រោមហេតុផលថា ការជួបជុំ និងដង្ហែរក្បួននេះ មិនមានច្បាប់អនុញ្ញាតពីសាលាក្រុងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ