បក្សនយោបាយ២ ប្ដឹងសុំរាប់សន្លឹកឆ្នោតឡើងវិញ
គណបក្សនយោបាយធំៗជាងគេទាំងពីរនៅស្រុកខ្មែរ គឺបក្សប្រជាជន និងបក្សសង្គ្រោះជាតិ បានប្ដឹងសុំរាប់សន្លឹកឆ្នោតឡើងវិញ។ នេះបើតាមសេចក្ដីប្រកាសព័ត៌មានរបស់ គណៈកម្មាធិការជាតិរៀបចំការបោះឆ្នោត គជប ចុះថ្ងៃទី៦ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
បណ្ដឹងសុំរាប់សន្លឹកឆ្នោតឡើងវិញ ដែល គជប ទទួលបាន មានយ៉ាងហោចណាស់២៨បណ្ដឹង។ ក្នុងនោះ ១៨បណ្ដឹងជារបស់គណបក្សប្រជាជនកម្ពុជា និង១០បណ្ដឹងជារបស់គណបក្សសង្គ្រោះជាតិ។ បើតាម គជប គណបក្សទាំងពីរនេះ ប្ដឹងសុំឲ្យរាប់សន្លឹកឆ្នោតឡើងវិញនៅតាមការិយាល័យចំនួន៤៧ នៅក្នុងខេត្តចំនួន៧។
ទាក់ទងនឹងបណ្ដឹងនេះ អ្នកនាំពាក្យ គជប លោក ហង្ស ពុទ្ធា ពន្យល់ថា ការរាប់សន្លឹកឆ្នោតឡើងវិញ អាចធ្វើទៅបាននៅពេលដែលមានអត្រាល្អៀងចាប់ពី ០,៥ភាគរយឡើងទៅ។ ក្រៅពីលក្ខខណ្ឌនេះ លោក ហង្ស ពុទ្ធា អះអាងថា គណៈកម្មការរៀបចំការបោះឆ្នោតឃុំសង្កាត់ និងខេត្តរាជធានី ក៏នឹងពិចារណាទៅលើករណីជាក់ស្ដែងនីមួយៗផងដែរ ដោយស្វែងរកហេតុផលនិងភស្តុតាងនានា ដើម្បីឈានទៅបើកកញ្ចប់សន្លឹកឆ្នោត និងរាប់សន្លឹកឆ្នោតឡើងវិញ។
គួរកត់សម្គាល់ថា បន្ថែមពីលើបណ្ដឹងសុំរាប់សន្លឹកឆ្នោតឡើងវិញ គជប ក៏បានទទួលបណ្ដឹងចំនួន៤៣ផ្សេងទៀតដែរ។ ជាបណ្ដឹងសុំឲ្យដាក់ពិន័យចំពោះអ្នកប្រព្រឹត្តល្មើសលើបទប្បញ្ញត្តិនៃជំពូកទី១៤នៃច្បាប់បោះឆ្នោតក្រុមប្រឹក្សាឃុំសង្កាត់។ ក្នុងចំណោមបណ្ដឹងទាំង៤៣នោះ មាន១៩បណ្ដឹងជារបស់គណបក្សប្រជាជនកម្ពុជា ២០បណ្ដឹងជារបស់គណបក្សសង្គ្រោះជាតិ និង៤បណ្ដឹងទៀតជារបស់ពលរដ្ឋ។
បើតាម គជប នៅក្នុងអំឡុងពេលដោះស្រាយបណ្ដឹងទាំងនេះ មិនទាន់មានទេ លទ្ធផលអំពីការបែងចែកអាសនៈក្រុមប្រឹក្សាឃុំសង្កាត់។ គជប នឹងផ្សាយពីចំនួនអាសនៈ និងឈ្មោះបេក្ខជនជាប់ឆ្នោត ដរាបណាការដោះស្រាយបណ្ដឹងបានចប់សព្វគ្រប់ជាស្ថាពរ។ ក្នុងន័យនេះ ស្ថាប័នរៀបចំការបោះឆ្នោតកំពូល បានបដិសេធចោលនូវលទ្ធផលការបែងចែកអាសនៈ ដែលត្រូវបានផ្សព្វផ្សាយកន្លងមកពីសំណាក់ប្រភពផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ