ភ្ជុំបិណ្ឌឆ្នាំនេះ គ្រោះថ្នាក់ចរាចរណ៍ថយចុះជាងឆ្នាំមុន!
នៅក្នុងរយៈពេល៤ថ្ងៃនៃពិធីបុណ្យភ្ជុំបិណ្ឌ ចាប់ពីថ្ងៃទី២៩កញ្ញា ដល់ថ្ងៃទី២តុលានេះ គ្រោះថ្នាក់ចរាចណ៍នៅទូទាំងប្រទេសកម្ពុជា បានកើតឡើង៦៦លើក ផ្ដាច់ជីវិតមនុស្សចំនួន២៦នាក់ និងរងរបួសធ្ងន់ស្រាលចំនួន១៣៨នាក់។ ចំនួននេះ ថយចុះគួរឲ្យកត់សម្គាល់ បើប្រៀបធៀបទៅនឹងឆ្នាំកន្លងទៅ។ នេះបើតាមរបាយការណ៍គ្រោះថ្នាក់ចរាចរណ៍នៅក្នុងពិធីបុណ្យភ្ជុំបិណ្ឌរបស់នាយកដ្ឋាននគរបាលចរាចរណ៍និងសណ្ដាប់ធ្នាប់សាធារណៈ ដែលបានចេញផ្សាយនៅថ្ងៃទី២តុលានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ចំនួនអ្នកស្លាប់២៦នាក់នេះ គឺថយចុះចំនួន១១នាក់ បើប្រៀបធៀបនឹងរយៈពេល៤ថ្ងៃដូចគ្នាកាលពីឆ្នាំ២០១៥កន្លងទៅ ដែលមានចំនួនអ្នកស្លាប់ដល់ទៅ៣៧នាក់។ ចំណែកអ្នករងរបួសសរុបចំនួន១៣៨នាក់វិញ គឺរបួសស្រាលមានចំនួន៥២នាក់ និងរបួសធ្ងន់ចំនួន៨៦នាក់។ អ្នករងរបួស បើប្រៀបធៀបនឹងឆ្នាំមុន គឺថយចុះចំនួន២២នាក់ ដែលកាលពីឆ្នាំមុនមានចំនួន១៦០នាក់។ ចំពោះករណីគ្រោះថ្នាក់ចរាចរណ៍សរុបនៅក្នុងរយៈពេលបួនថ្ងៃកន្លងទៅនេះ គឺបានកើតឡើង៦៦លើកនៅទូទាំងប្រទេស។ ចំនួននេះ គឺថយចុះ១៦លើក ស្មើនឹង២០ភាគរយ បើធៀបនឹងឆ្នាំកន្លងទៅ។
បើគិតត្រឹមល្ងាចថ្ងៃទី២តុលា គ្រោះថ្នាក់ចរាចរណ៍បានសម្លាប់ជីវិតមនុស្សចំនួន៧នាក់ ក្នុងនោះមានស្រីម្នាក់។ រីឯអ្នករបួសធ្ងន់មានចំនួន៤៣នាក់ និងរបួសស្រាលមានចំនួន២៩នាក់។ មូលហេតុចម្បងនៃគ្រោះថ្នាក់ចរាចរណ៍ទាំងនេះ គឺបណ្ដាលមកពីការបើកលើសល្បឿនកំណត់ ការបើកបរក្រោមឥទ្ធិពលស្រវឹង ការបើកបរពេលងងុយ ការបត់ក្នុងស្ថានភាពគ្រោះថ្នាក់ ការប្រជែង ការមិនគោរពសិទ្ធិគ្នា និងមិនប្រកាន់ស្ដាំជាដើម។
ដោយឡែក ខេត្តដែលមានគ្រោះថ្នាក់ចរាចរណ៍កើតមានច្រើនជាងគេក្នុងរយៈពេលបួនថ្ងៃនេះ គឺខេត្តព្រៃវែង។ នៅខេត្តព្រៃវែង គ្រោះថ្នាក់ចរាចរណ៍បានកើតឡើងចំនួន៥លើក សម្លាប់មនុស្ស៥នាក់ និងធ្វើឲ្យរបួសចំនួន៥នាក់។ បន្ទាប់មកគឺខេត្តបន្ទាយមានជ័យ ដែលមានគ្រោះថ្នាក់ចរាចរណ៍កើតឡើង២ករណីប៉ុណ្ណោះ ប៉ុន្តែវាបានឆក់យកជីវិតមនុស្សចំនួន៣នាក់ និងធ្វើឲ្យរបួស២នាក់។ ដោយឡែក គ្រោះថ្នាក់ចរាចរណ៍នៅខេត្តកំពង់ចាម តាកែវ កណ្ដាល និងព្រះវិហារ មានស្លាប់មួយខេត្ត២នាក់។ ក្រៅពីនោះ ខេត្តព្រះសីហនុ ស្វាយរៀង សៀមរាប ក្រចេះ កំពង់ធំ និងកំពង់ស្ពឺ សុទ្ធតែស្លាប់ម្នាក់ដូចគ្នាដោយសារគ្រោះថ្នាក់ចរាចរណ៍។
លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍និងសណ្ដាប់ធ្នាប់សាធារណៈ បានចាត់ទុកការថយចុះនៃចំនួនគ្រោះថ្នាក់ចរាចរណ៍និងចំនួនអ្នកស្លាប់ក្នុងរដូវភ្ជុំបិណ្ឌឆ្នាំនេះ ថាជាសញ្ញាណល្អ ដែលឆ្លុះបញ្ចាំងឲ្យឃើញពីប្រសិទ្ធភាពនៃការងាររឹតបន្តឹងច្បាប់ចរាចរណ៍របស់សមត្ថកិច្ច។ សមត្ថកិច្ច ដែលបើតាម លោក រុន រ័ត្នវាសនា គឺបានបើកយុទ្ធនាការអប់រំផ្សព្វផ្សាយច្បាប់ចរាចរណ៍ផ្លូវគោកនៅតាមគោលដៅដើមទីសំខាន់ៗនៅទូទាំង ជាពិសេសនៅតាមចំណតរថយន្តធំ។
ការដាក់ពង្រាយក្រុមត្រួតពិនិត្យការអនុវត្តច្បាប់ចរាចរណ៍នៅគ្រប់ផ្លូវជាតិទាំងអស់ ដើម្បីរឹតបន្តឹងនិងដាក់ពិន័យអ្នកបើកបរដែលមិនគោរពច្បាប់ ព្រមទាំងការរួមចំណែករបស់ប្រជាពលរដ្ឋ ក៏ជាបច្ច័យដែលធ្វើឲ្យចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងរដូវភ្ជុំឆ្នាំនេះ ថយចុះផងដែរ។ នេះបើតាមលោក រុន រ័ត្នវាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ