សកម្មជនចលនាមាតាធម្មជាតិ៣នាក់ត្រូវសមត្ថកិច្ចឃាត់ខ្លួន ក្រោយខកខានមិនបានចូលទៅបំភ្លឺតាមការកោះហៅ
សកម្មជនចលនាមាតាធម្មជាតិម្នាក់ទៀតត្រូវបានឃាត់ខ្លួននៅរសៀលថ្ងៃទី១៧សីហានេះ។ ជាសរុប សកម្មជនចលនាមាតាធម្មជាតិចំនួន៣នាក់ ត្រូវបានសមត្ថកិច្ចឃាត់ខ្លួន នៅថ្ងៃចន្ទនេះ បន្ទាប់ពីពួកគេ ខកខានមិនបានចូលទៅបំភ្លឺតាមលិខិតកោះហៅរបស់អធិការដ្ឋាននគរបាលស្រុកបទុមសាគរ។ ការឃាត់ខ្លួនដោយមូលហេតុមិនច្បាស់លាស់ ត្រូវបានចលនាមាតាធម្មជាតិបរិហាថា ជាការគម្រាមកំហែងចំពោះសកម្មភាពរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
សកម្មជនចលនាមាតាធម្មជាតិទាំងបីរូប ដែលត្រូវបានសមត្ថកិច្ចឃាត់ខ្លួននៅព្រឹកថ្ងៃចន្ទ ទី១៧សីហានេះរួមមាន លោក ទ្រី សុវិគា លោក ស៊ិន សំណាង និងលោក សាន់ ម៉ាឡា នៅត្រង់ចំណុចភូមិធ្នង់ ឃុំអណ្ដូងទឹក ស្រុកបទុមសាគរ ខេត្តកោះកុង។ យុវជនទាំងបីនាក់ ត្រូវបានបញ្ជូនទៅកាន់ស្នងការនគរបាលខេត្តកោះកុង ដើម្បីធ្វើការសាកសួរ។ ការឃាត់ខ្លួនដោយមូលហេតុមិនច្បាស់លាស់ ត្រូវបានចលនាមាតាធម្មជាតិបរិហាថា ជាការគម្រាមកំហែងចំពោះសកម្មភាពរបស់ខ្លួន។
គួររំលឹកថា លោក ទ្រី សុវិគា លោក សាន់ ម៉ាឡា និងសកម្មជនចលនាមាតាធម្មជាតិម្នាក់ទៀត ត្រូវបានសមត្ថកិច្ចកោះហៅទៅសាកសួរ កាលពីថ្ងៃសុក្រសប្ដាហ៍មុន។ ការកោះហៅនោះ បើតាមលិខិតរបស់សមត្ថកិច្ច គឺធ្វើឡើងដើម្បីសាកសួរតាមពាក្យបណ្ដឹង។ ប៉ុន្តែជាការកត់សម្គាល់ យុវជនទាំង៣នាក់មិនបានចូលទៅបំភ្លឺតាមការកោះហៅរបស់សមត្ថកិច្ចនោះទេ។ ក្រុមយុវជនចាត់ទុកថា ការកោះហៅនោះ ជាការគម្រាមកំហែង បន្ទាប់ពីពួកគេធ្វើការតវ៉ាប្រឆាំងនឹងការបូមខ្សាច់របស់ក្រុមហ៊ុនឯកជន នៅព្រែកអណ្ដូងទឹក ស្រុកបទុមសាគរ ខេត្តកោះកុង កាលពីចុងខែកក្កដា។
មូលហេតុនៃការបណ្ដេញសាឡង់បូមខ្សាច់នេះ ត្រូវបានតំណាងចលនាមាតាធម្មជាតិអះអាងថា ធ្វើឡើងដោយសារតែសាឡង់នោះ បូមខ្សាច់ខុសទីតាំងដែលកំណត់ក្នុងអាជ្ញាបណ្ណ បណ្ដាលឲ្យបាក់ចាំង បាក់ព្រៃកោងកាង និងធ្វើឲ្យទឹកកខ្វក់ មិនអាចនេសាទបាន។ ប៉ុន្តែ អ្នកនាំពាក្យក្រសួងរ៉ែនិងថាមពល បញ្ជាក់ប្រាប់វិទ្យុបារាំងថា សាឡង់បូមខ្សាច់នៅស្រុកបទុមសាគរនោះ បានទទួលអាជ្ញាបណ្ណពីក្រសួង និងបានធ្វើការបូមខ្សាច់ត្រឹមត្រូវតាមទីតាំងកំណត់។
ទន្ទឹមគ្នានេះ អ្នកនាំពាក្យក្រសួងរ៉ែនិងថាមពល ក៏បានអំពាវនាវកុំឲ្យភាគីណាផ្សេង ធ្វើសកម្មភាពដើរតួជំនួសអាជ្ញាធរ នៅក្នុងការពិនិត្យនិងត្រួតពិនិត្យការងារបូមខ្សាច់។ បើតាមអ្នកនាំពាក្យដដែល ក្រសួងក៏ដូចជាក្រុមហ៊ុន នឹងចាត់វិធានការតាមផ្លូវច្បាប់ ប្រសិនបើការធ្វើសកម្មភាពនោះប៉ះពាល់ដល់ការវិនិយោគរបស់ក្រុមហ៊ុន ក៏ដូចជាការងាររបស់ក្រសួង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ