អ្នកនាំពាក្យ៖ គ្មានវត្តមានជនសង្ស័យបំផ្ទុះគ្រាប់បែកនៅបាងកក ក្នុងទឹកដីកម្ពុជានោះទេ
ប៉ូលិសថៃជឿថា ជនសង្ស័យបំផ្ទុះគ្រាប់បែកនៅចំកណ្តាលក្រុងបាងកក ពីរនាក់ កំពុងតែលាក់ខ្លួននៅក្នុងប្រទេសកម្ពុជា។ នេះបើយោងតាមគេហទំព័របាងកកប៉ុស្តិ៍ ចុះផ្សាយនៅថ្ងៃទី១ កញ្ញានេះ។ ប៉ុន្តែអ្នកនាំពាក្យអគ្គស្នងការនគរបាលជាតិកម្ពុជា បានបញ្ជាក់ថា រហូតមកទល់នឹងពេលនេះ គ្មានវត្តមានជនសង្ស័យបំផ្ទុះគ្រាប់បែកណាមួយនៅកម្ពុជានោះទេ ហើយក៏មិនទាន់ទទួលបានការសុំសហការពីខាងអាជ្ញាធរថៃផងដែរ។
ចុះផ្សាយនៅថ្ងៃ៖
ស្តាប់ - ០១:៣០
លោក គៀត ចន្ទថារិទ្ធ អ្នកនាំពាក្យអគ្គស្នងការនគរបាលជាតិ បានបញ្ជាក់ប្រាប់វិទ្យុបារាំងថា រហូតមកទល់នឹងពេលនេះ កម្ពុជាមិនទាន់ទទួលបានព័ត៌មានថាមានជនសង្ស័យបំផ្ទុះគ្រាប់បែកនៅថៃ ចូលមកក្នុងទឹកដីកម្ពុជានោះទេ ហើយកម្ពុជាផ្ទាល់ក៏មិនទាន់ទទួលបានការសុំសហការពីខាងភាគីថៃដែរ។ ការបញ្ជាក់យ៉ាងដូច្នេះត្រូវបានធ្វើឡើង ខណៈសារព័ត៌មានអនឡាញ បាងកកប៉ុស្តិ៍របស់ថៃ បានចុះផ្សាយថា ប៉ូលិសថៃជឿថា ជនសង្ស័យទាំងពីរនាក់នោះ កំពុងតែលាក់ខ្លួននៅកម្ពុជា។
គេហទំព័របាងកកប៉ុស្តិ៍ បានបញ្ជាក់ថា ការសង្ស័យរបស់ប៉ូលិសថៃត្រូវបានធ្វើឡើងបន្ទាប់ពី ការិយាល័យអន្តោប្រវេសន៍បានរកឃើញថា ជនសង្ស័យទាំងពីរនាក់នោះ បានចូលមកក្នុងប្រទេសកម្ពុជាតាមច្រកទ្វារអន្តរជាតិប៉ោយប៉ែត។
យ៉ាងណាក៏ដោយលោកខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់ប្រព័ន្ធផ្សព្វផ្សាយ ក្នុងស្រុកថា កម្ពុជារីករាយនឹងសហការជាមួយនឹងប៉ូលិសថៃ ប្រសិនបើកម្ពុជាទទួលបានការស្នើសុំជាផ្លូវការនោះ។ លោកបន្តថា ការតាមស្វែងរកចាប់ខ្លួនភេរវករ ការប្រឆាំងជាមួយភេរវកម្ម ជាកាតព្វកិច្ចរបស់បណ្តាប្រទេសទាំងអស់នៅលើពិភពលោក ហើយកម្ពុជាផ្ទាល់ក៏មានគោលនយោបាយប្រឆាំងនឹងភេរវកម្មរួមជាមួយនឹងបណ្តាប្រទេសផ្សេងៗនៅលើពិភពលោកដែរ។
សូមបញ្ជាក់ថា កាលពីថ្ងៃទី១៧ សីហា មនុស្ស២០នាក់ បានស្លាប់ និងរបួសជាច្រើនទៀត ក្នុងហេតុការណ៍ផ្ទុះគ្រាប់បែកកណ្តាលទីក្រុងបាងកក។ រដ្ឋាភិបាលថៃប្រកាសផ្តល់ប្រាក់រង្វាន់ចំនួន៣លានបាតដែលមានប្រមាណជាង៨ម៉ឺន ៣ពាន់ដុល្លាអាមេរិកចំពោះប៉ូលិសថៃណាដែលអាចចាប់ជនសង្ស័យក្នុងសំណុំរឿងបំផ្ទុះគ្រាប់បែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ