ទាហានថៃនៅតែមិនព្រមដកចេញពីភ្នំទ្រព្យ
អស់រយៈពេលបីថ្ងៃមកហើយដែលទាហានថៃមួយក្រុមបានចូលមកបោះទីតាំង នៅលើភ្នំទ្រព្យ ក្បែរប្រាសាទព្រះវិហារ ហើយមិនព្រមដកចេញទៅវិញឡើយ បើទោះបីជាទាហានខ្មែរបានព្យាយាមបណ្តេញពួកគេយ៉ាងណាក៏ដោយ។ រហូតមកទល់នឹងថ្ងៃអាទិត្យនេះ ការចរចា នៅតែបន្ត ប៉ុន្តែនៅមិនទាន់មានលទ្ធផលនៅឡើយទេ។ ប្រភពពីក្រសួងការពារជាតិឲ្យដឹងថា មេទ័ពជួរមុខកំពុងដោះស្រាយបញ្ហាក្នុងដំណាក់កាលដំបូង មុននឹងបញ្ជូនសំណុំរឿងមកកាន់ថ្នាក់ជាតិ។
ចុះផ្សាយនៅថ្ងៃ៖
បុណ្យចូលឆ្នាំថ្មី រយៈពេលបីថ្ងៃបានចប់ទៅហើយ ប៉ុន្តែ បញ្ហានៅតាមជាយដែនខ្មែរថៃនៅមិនទាន់ចប់នៅឡើយទេ។ ទាហានថៃមួយក្រុមដែលបានរុលចូលមកបោះទីតាំងលើដីខ្មែរ ក្នុងតំបន់ភ្នំទ្រព្យ កាលពីថ្ងៃ១៦មេសា នៅមិនទាន់ដកថយទៅវិញនៅឡើយទេ។
លោកឈុំ សុជាតិ អ្នកនាំពាក្យក្រសួងការពារជាតិបានឲ្យដឹង នៅថ្ងៃនេះថា មេទ័ពដែលឈរជើង នៅសមរភូមិមុខកំពុងបន្តការចរចាជាមួយទាហានថៃដើម្បីឲ្យពួកគេដកចេញ ពីតំបន់ភ្នំទ្រព្យដែលជាទឹកដីរបស់ខ្មែរ។ ប៉ុន្តែ រហូតមកទល់នឹងរសៀលថ្ងៃអាទិត្យនេះ នៅមិនទាន់មានលទ្ធផលនៅឡើយទេ។ បើយោងតាមប្រសាសន៍របស់អ្នកនាំពាក្យ ក្រសួងការពារជាតិ ទាហានថៃបានអះអាងថា នឹងដកចេញពីភ្នំទ្រព្យ ប៉ុន្តែ ពួកគេនៅរង់ចាំបទបញ្ជាពីថ្នាក់លើដែលតែងតែឆ្លើយដាក់គ្នាទៅវិញ ទៅមក មិនដឹងអ្នកណាជាអ្នកទទួលខុសត្រូវពិតប្រាកដ។
គួររំលឹកថា ក្នុងខណៈដែលកម្ពុជាកំពុងប្រារព្ធពិធីឆ្លងឆ្នាំថ្មីដែលជាថ្ងៃ ចុងក្រោយនៃពិធីបុណ្យចូលឆ្នាំថ្មីដែលមានរយៈពេលបីថ្ងៃ ទាហានថៃមួយក្រុមដែលមានគ្នា ប្រមាណជាពី១២ ទៅ១៤នាក់បានឆ្លៀតឱកាសនាំគ្នា ចូលមកបោះទីតាំងក្នុងតំបន់ភ្នំ ទ្រព្យតែម្តង។ បើទោះបីជាទាហានខ្មែរដែលឈរជើង នៅទីនោះបានព្យាយាមបណ្តេញពួកគេយ៉ាងណាក៏ដោយ ក៏ទាហានថៃទាំងនោះមិនព្រមដកថយដែរ។ យ៉ាងណាក៏ដោយ កិច្ចចរចានៅតែបន្តធ្វើដើម្បីដោះស្រាយបញ្ហា។
នៅឯតំបន់ អូរស្មាច់ ខេត្តឧត្តរមានជ័យឯណោះវិញ ស្ថានការណ៍បានធូរស្រាលវិញហើយ បន្ទាប់ពីការប្រយុទ្ធគ្នាពីរលើក កាលពីថ្ងៃសៅរ៍ម្សិលមិញ។ ប្រភពពីសមរភូមិឲ្យដឹងថា គេបានរឹបអូសសម្ភារៈសឹកមួយចំនួននៅកន្លែងកើតហេតុ ដូចជា វិទ្យុទាក់ទង មួកដែក ការពារគ្រាប់ និងគ្រាប់រំសេវមួយចំនួនផង។ សម្ភារៈសឹកទាំងនោះដែលមានប្រឡាក់ឈាមជាសញ្ញាប្រាប់ថា ទាហានថៃពិតជាត្រូវរបួសមួយចំនួនក្នុងសមរភូមិ។
ក្រសួងការពារ ជាតិក៏ដូចជារដ្ឋាភិបាលកម្ពុជាដែរបានប្រកាន់យកវិធានការពីរ ដំណាក់កាលក្នុងការដោះស្រាយបញ្ហាជាមួយថៃ។ ដំណាក់កាលទី១ គឺការចរចានៅនឹងកន្លែងរវាងភាគីខ្មែរ និងថៃដែលមានទំនាស់។ ដំណាក់កាលទី២ គឺការបញ្ជូនសំណុំរឿងទៅថ្នាក់លើដើម្បីដោះស្រាយក្នុងករណីដែលការចរចា ក្នុងដំណាក់កាលដំបូងមិនសម្រេចបានលទ្ធផល។ ករណីភ្នំទ្រព្យកំពុងស្ថិតក្នុងការចរចាក្នុងដំណាក់កាលទី១។ នេះបើយោងតាមការឲ្យដឹងរបស់លោកឈុំ សុជាតិ អ្នកនាំពាក្យក្រសួងការពារជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ