ពលរដ្ឋរងគ្រោះដោយការឆបោកប្រាក់ស្នើសុំជួបនាយករដ្ឋមន្ត្រីដោយផ្ទាល់
ពលរដ្ឋមកពី២៥រាជធានី ខេត្ត បានប្រមូលផ្ដុំគ្នានៅថ្ងៃទី១៩ខែកុម្ភៈនេះ ក្នុងគោលបំណងសុំជួបលោកនាយករដ្ឋមន្ត្រី ហ៊ុន សែន ដោយផ្ទាល់ដើម្បីសុំឲ្យលោក ជួយអន្តរាគមន៍លើបញ្ហាដែលក្រុមហ៊ុនបរទេសបោកប្រាស់ យកប្រាក់រាប់លានដុល្លារពីពួកគាត់។ ការសុំអន្តរាគន៍នេះ ធ្វើឡើងបន្ទាប់ពីពួកគេបានចាញ់បោកក្រុមហ៊ុនបរទេសមួយឈ្មោះ EBC ដែលបានប្រមូលពួកគេរាប់លានដុល្លារ ហើយមិនមានការទទួលខុសត្រូវ។
ចុះផ្សាយនៅថ្ងៃ៖
ស្តាប់ - ០២:២៧
គិតមកដល់ឆ្នាំ២០១៨នេះ គឺមានរយៈពេលជាង៣ឆ្នាំដែលពលរដ្ឋប្រមាណជា៥ម៉ឺននាក់មិនទាន់ទទួលបានដំណោះស្រាយណាមួយពីស្ថាប័នរដ្ឋនៅឡើយទេ បន្ទាប់ពីពលរដ្ឋបានដាក់ពាក្យបណ្ដឹងជាង៧ពាន់ពាក្យបណ្ដឹងប្ដឹងទៅក្រុមហ៊ុន Empire Big Capital Limited (EBC) ដែលឆបោកប្រាក់ពួកគាត់អស់ទឹកប្រាក់៤០លានដុល្លារ។
លោក សូត្រ គឹមឈត ប្រជាពលរដ្ឋម្នាក់នៅខេត្តពោធិ៍សាត់ បានថ្លែងប្រាប់វិទ្យុបារាំងអន្តរជាតិនៅថ្ងៃទី១៩នេះថា កន្លងមកក្រសួងមហាផ្ទៃបានឲ្យមេធាវីចេញមុខដោះស្រាយលើរឿងនេះដែរ ប៉ុន្តែនៅតែគ្មានលទ្ធផល ហើយផ្ទុយទៅវិញស្ថាប័នមួយនេះបានតម្រូវឲ្យពលរដ្ឋធ្វើពាក្យបណ្ដឹងឡើងវិញ ។ ពាក្យបណ្ដឹងក៏បានដាក់ទៅវិញដែរ ប៉ុន្តែមិនទទួលបានដំណោះស្រាយមកដល់ឥលូវ។ ដូច្នេះទើបពលរដ្ឋគិតថា មានតែប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន ទេជួយពួកគេបាន។ ក្ដីរំពឹងបែបណានោះពួកគេនៅមិនទាន់ដឹងទេ ប៉ុន្តែជឿជាក់ថា លោកនាយករដ្ឋមន្ត្រីនឹងអើពើរឿងរ៉ាវរបស់រាស្ត្រ។ នេះបើតាម លោក សូត្រ គឹមឈត។
លោក គឹម ឈត បានចាញ់បោកប្រាក់អស់៣ម៉ឺនដុល្លារនោះបានគូសបញ្ជាក់ទៀតថា នៅក្នុងខេត្តពោធិ៍សាត់ពលរដ្ឋបានចំណាកស្រុកដើម្បីរកលុយមកដោះបំណុលធនាគារ តាមដែលអាចធ្វើទៅបាន ។ ព្រោះថា ពលរដ្ឋបានខ្ចីបុលធនាគារយកមកចូលហ៊ុនជាមួយក្រុមហ៊ុន និងអង្គការ រត់ចោលពូកគេនេះ។ ជាមធ្យមពលរដ្ឋម្នាក់បានចំណាយប្រាក់៨ពាន់ដុល្លារទៅឲ្យក្រុមហ៊ុន។
គួររម្លឹកឡើងវិញថាយ៉ាងហោចណាស់មានពលរដ្ឋជាង៧ពាន់នាក់បានចាញ់បោកក្រុមហ៊ុនEBCដែលបានដើរប្រមូលប្រាក់ពីប្រជាពលរដ្ឋក្រោមលេសយកទៅវិនិយោគលើគម្រោងនានាដើម្បីរកផលចំណេញ និងចែកភាគលាភជាការប្រាក់១០ភាគរយទៅឲ្យពលរដ្ឋវិញ។ ប៉ុន្តែផ្ទុយទៅវិញពលរដ្ឋមិនទទួលផលចំណេញអ្វីត្រឡប់មកវិញនោះទេក្នុងរយៈពេលជាច្រើនឆ្នាំ ខណៈដែលក្រុមហ៊ុននោះបានបិទទ្វារនិងបានរត់ចោលពលរដ្ឋ។
ករណីនេះគេទទួលស្គាល់ថា ជាករណីចាញ់បោកធំមិនធ្លាប់មាននៅក្នុងប្រទេសកម្ពុជា។ សម្រាប់អ្នកសេដ្ឋកិច្ចបានបន្ទោសទៅរដ្ឋាភិបាលមិនគួរណាផ្ដល់អាជ្ញាបណ្ណទៅក្រុមហ៊ុនEBC ដោយមិនបានធ្វើការសិក្សាឲ្យបានច្បាស់លាស់។ ស្របពេលជាមួយគ្នាដែរ ក៏មិនទាន់ឃើញស្ថាប័នរបស់រដ្ឋណាមួយចេញមុខមកពន្យល់បញ្ហាឲ្យបានច្បាស់លាស់ដែរ គ្រាន់តែថានៅពាក់កណ្ដាលខែមិថុនាឆ្នាំ២០១៧សមត្ថកិច្ចចាប់ខ្លួនមនុស្សពីរនាក់ធ្វើការនៅក្រុមហ៊ុនEBC បញ្ជូនទៅតុលាការក្រុងភ្នំពេញព្រោះអ្នកទាំងពីរបានជាប់ពាក់ព័ន្ធករណីឆបោកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ