អ្នកឃ្លាំមើល៖ ការលើកពេលប្រជុំគណៈរដ្ឋមន្ត្រី ចំពេលប្រមុខរដ្ឋាភិបាលមានភាពស្ងាត់ស្ងៀម
កិច្ចប្រជុំគណៈរដ្ឋមន្ត្រីដែលគ្រោងរៀបចំនៅថ្ងៃសុក្រទី២៦ក្នុងសប្ដាហ៍នេះ ត្រូវលើកពេលដោយមិនកំណត់ថ្ងៃ។ មូលហេតុនៃការលើកពេលត្រូវបានអ្នកនាំពាក្យរដ្ឋាភិបាលអះអាងប្រាប់វិទ្យុបារាំងអន្តរជាតិRFIនៅថ្ងៃពុធនេះថា នៅមិនទាន់មានរបៀបវារៈគ្រប់គ្រាន់ក្នុងការរៀបចំកិច្ចប្រជុំ។ តែអ្នកឃ្លាំមើលសង្គមយល់ឃើញផ្សេងពីនេះថា មួយផ្នែកនៃការលើកពេលកិច្ចប្រជុំគណៈរដ្ឋមន្ត្រីទំនងជា លោកនាយករដ្ឋមន្ត្រី ហ៊ុន សែន ចង់រក្សាភាពស្ងៀមស្ងាត់មួយរយៈមិនថា ក្នុងវេទិកាសាធារណៈ ឬកិច្ចប្រជុំសម្ងាត់ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក ផៃ ស៊ីផាន អ្នកនាំពាក្យគណៈរដ្ឋមន្ត្រីបានគូសបញ្ជាក់ថា ការលើកពេលកិច្ចប្រជុំគណៈរដ្ឋមន្ត្រីមិនមែនដោយសារ បញ្ហាសុខភាពរបស់ប្រមុខរដ្ឋាភិបាល ឬហេតុផលនយោបាយ ឡើយ តែផ្ទុយទៅវិញអង្គប្រជុំមិនទាន់មានរបៀបវារៈគ្រប់គ្រាន់នៅក្នុងដៃ ខណៈរដ្ឋមន្ត្រីនៅតាមក្រសួងមួយចំនួនរវល់ចុះមូលដ្ឋាន។ ជាក់ស្ដែងរដ្ឋមន្ត្រីនៃក្រសួងពីរគឺក្រសួងសាធារណៈការ និងក្រសួងកសិកម្មកំពុងមមាញឹកចុះទៅមូលដ្ឋានត្រួតពិនិត្យស្ថានភាពផ្លូវ និងភាពគ្រោះរាំងស្ងួត។
តែទោះជាបែបនេះក្ដី លោក អ៊ូ ច័ន្ទរដ្ឋ អតីតតំណាងរាស្ត្រនៃអតីតគណបក្សសង្គ្រោះជាតិចាប់អារម្មណ៍ថា ការលើកពេលនៃកិច្ចប្រជុំគណៈរដ្ឋមន្ត្រី ជួនចំពេលប្រមុខរដ្ឋាភិបាលមានភាពស្ងៀមស្ងាត់នៅមួយរយៈពេលចុងក្រោយនេះមិនថា ក្នុងវេទិកាសាធារណៈ ឬកិច្ចប្រជុំសម្ងាត់ឡើយ។ បើតាមលោក អ៊ូ ច័ន្ទរដ្ឋ ភាពស្ងៀមស្ងាត់របស់លោកនាយករដ្ឋមន្ត្រី ហ៊ុន សែន ទំនងជាបក្សកាន់អំណាច ប្ដូរយុទ្ធសាស្ត្រប្រើប្រាស់សំឡេងលោកនាយករដ្ឋមន្ត្រី ស ខេង ជំនួស ដើម្បីសម្រួលស្ថានការណ៍នយោបាយនាពេលបច្ចុប្បន្ន។ ស្ថានការណ៍នយោបាយបច្ចុប្បន្នដែលសហគមន៍អន្តរជាតិចង់ឲ្យមានការដោះលែងលោក កឹម សុខា ជាថ្នូរនឹងការរក្សាប្រព័ន្ធអនុគ្រោះពន្ធEBA។ នេះជាការមើលឃើញរបស់លោក អ៊ូ ច័ន្ទរដ្ឋ។
ចំណែក លោក ឡៅ ម៉ុងហៃ អ្នកវិភាគនិងតាមដានបញ្ហានយោបាយកត់សម្គាល់ដែរថា រៀងរាល់ពេលនៃបទបង្ហាញលើវេទិកាសាធារណៈ របស់ប្រមុខរដ្ឋាភិបាលដែលជ្រុលសម្តី តែមានការសម្របសម្រួលវិញពី លោកឧបនាយករដ្ឋមន្ត្រី ស ខេង ទោះពេលខ្លះលោក ស ខេង មិនថ្លែងឲ្យចំតែជារូបភាព និងខ្លឹមសារទំនងជាចង់ប៉ះប៉ូវ ដើម្បីសម្រួលស្ថានការជាមួយមជ្ឈដ្ឋានក្រៅប្រទេស។ នេះបើតាមលោក ឡៅ ម៉ុងហៃ។
ប៉ុន្តែយ៉ាងណាក៏ដោយអ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា គេមិនត្រូវទាញភ្ជាប់ការលើកពេលកិច្ចប្រជុំគណៈរដ្ឋមន្ត្រីជាមួយរឿងរ៉ាវឯទៀតឡើយ។ ម្យ៉ាងការងារនៅក្នុងជួររដ្ឋាភិបាល តែងមានការបែងចែកកិច្ចការងារគ្នាបំពេញរវាងប្រមុខរដ្ឋាភិបាលលោកនាយរដ្ឋមន្រ្តី ហ៊ុន សែន និងលោកឧបនាយករដ្ឋមន្ត្រី ស ខេង ជារឿងធម្មតា។ ដូច្នេះគ្មានការប្ដូរយុទ្ធសាស្ត្រ ឬប្ដូរសំឡេងពីនាយករដ្ឋមន្ត្រីមកឧបនាយករដ្ឋមន្ត្រីដើម្បីប្ដូរស្ថានការណ៍អ្វីឡើយ។ នេះបើតាមលោក សុខ ឥសាន។
បើទោះជាប្រមុខរដ្ឋាភិបាលហាក់ដូចមានភាពស្ងៀមស្ងាត់នៅក្នុងការថ្លែងសារជាសាធារណៈដូចគ្រាមុនក៏ដោយ តែលោកបានប្រើប្រាស់សំណេរជំនួសឲ្យការប្រើពាក្យសម្ដី។ ជាក់ស្ដែងថ្មីៗនេះ លោក ហ៊ុន សែន បានបញ្ជាក់ពីការចុះហត្ថលេខាលើឯកសារមួយចំនួនរួមនឹងប្រតិកម្មជាសំណេរចំពោះការចោទថា កម្ពុជាបានផ្ដល់ទីតាំងយោធាដល់ចិន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ