សួន សេរីរដ្ឋា ថាមេដឹកនាំបក្សសង្គ្រោះជាតិ គ្មានសមត្ថភាព ពេលមកដល់ភ្នំពេញភ្លាម!
លោកសួន សេរីរដ្ឋា ប្រធានគណបក្សអំណាចខ្មែរ ដែលធ្លាប់រងការចោទប្រកាន់រឿងក្បត់ជាតិ និងប៉ុនប៉ងផ្តួលរលំរដ្ឋាភិបាល បានត្រឡប់មកដល់ប្រទេសកម្ពុជាជាលើកដំបូង នៅព្រឹកថ្ងៃទី ០១ខែតុលានេះ។ លើកដំបូង ក្រោយពីលោកបានចាកចេញ អស់រយៈពេល ៨ឆ្នាំ និង ៩ខែ។ គ្រាន់តែដាក់ជើងដល់ព្រលានយន្តហោះអន្តរជាតិភ្នំពេញភ្លាម លោកសួន សេរីរដ្ឋា បានឆ្លៀតប្រាប់អ្នកកាសែតថា មេដឹកនាំគណបក្សសង្គ្រោះជាតិ គ្មានសមត្ថភាព ដូច្នេះទើបលោក បង្កើតវត្តមានគណបក្សអំណាចខ្មែរ ក្នុងឆាកនយោបាយ។ ក្រៅពីនោះ លោកក៏បានបរិហារ ពីប្រព័ន្ធតុលាការ និងនយោបាយ នៅកម្ពុជាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
លោកសួន សេរីរដ្ឋា៖ «មេដឹកនាំគណបក្សសង្គ្រោះជាតិ គឺមេដឹកនាំ ដែលគ្មានសមត្ថភាព។ បើសិនជាខ្ញុំមើលឃើញថា គេជាមេដឹកនាំនយោបាយ មានសមត្ថភាព ហើយខ្ញុំអាចរួបរួម ជាមួយគេបាន ខ្ញុំមិនចាំបាច់បង្កើតគណបក្សថ្មីមួយនេះទេ។ ដូច្នេះ ខ្ញុំអត់ចាប់អារម្មណ៍ទាំងអស់ អំពីការអំពាវនាវរបស់ពួកគេ ពីព្រោះការអំពាវនាវរបស់ពួកគេ វាគ្មានតម្លៃសម្រាប់យើងយកមកពិចារណា។ បើសិនជាពួកគេមាន គេហៅថារបៀបវារៈនយោបាយត្រឹមត្រូវ ក្នុងនាមជាស្ថាប័នគណបក្ស គេត្រូវតែអញ្ចើញដោយផ្លូវការ »។
នេះគឺជាការឆ្លើយតបទៅកាន់អ្នកសារព័ត៌មាន របស់លោកសួន សេរីរដ្ឋា ប្រធានគណបក្សអំណាចខ្មែរ បន្ទាប់ពីលោកបានមកដល់ព្រលានយន្តហោះអន្តរជាតិភ្នំពេញ។ ជាដំណើរមកដល់ ដោយមានការទទួលស្វាគមន៍ពីអ្នកគាំទ្រប្រមាណ ៣០០នាក់។ ក្រៅពីនិយាយរិះគន់មេដឹកនាំគណបក្សសង្គ្រោះជាតិហើយ លោកសួន សេរីរដ្ឋា ក៏បញ្ជាក់ថា លោកនឹងបន្តរិះគន់រដ្ឋាភិបាលដែរ ប្រសិនបើរដ្ឋាភិបាលកម្ពុជា នៅតែបន្តធ្វើខុស។
ក្នុងនោះ លោកសួន សេរីរដ្ឋា បានឆ្លៀតបរិហារថា តុលាការខ្មែរ មិនមានយុត្តិធម៌នោះទេ។ លោកថាប្រព័ន្ធតុលាការនៅក្នុងប្រទេសកម្ពុជា មិនមានលទ្ធភាពផ្តល់យុត្តិធម៌ ដល់ប្រជាពលរដ្ឋនោះទេ។ លោកសួន សេរីរដ្ឋា បានបន្ថែមថា នេះគឺជាវប្បធម៌នយោបាយ ដែលសូម្បីតែមេដឹកនាំបក្សប្រឆាំង ក៏ធ្លាប់ឆ្លងកាត់ដែរ។ លោក បានបញ្ជាក់ទៀតថា «ចុងក្រោយ អ្នកដែលប្តឹងលោក គឺជាអ្នកដែលលើកលែងទោសឱ្យលោក ដែលប្រៀបបាននឹងនៅលើឆាកល្ខោនមួយ ដែលអ្នកសម្តែងតួកាច តួយក្ស តួស្លូត គឺជាមនុស្សតែម្នាក់»។
ជុំវិញឱកាសមកស្រុកខ្មែរនេះដែរ លោកសួន សេរីរដ្ឋា បានបង្ហើបថា គណបក្សអំណាចខ្មែរ ចង់ស្វែងរកការចងសម្ព័ន្ធគោលនយោបាយរួម ជាមួយនឹងគណបក្សដទៃ។ ការចងសម្ព័ន្ធគោលនយោបាយរួម ដែលលោកពន្យល់ថា មិនមែនជាការបង្រួបបង្រួមជាមួយគណបក្សដទៃនោះទេ។ ហើយការចងសម្ព័ន្ធនេះ ត្រូវមាន៥ចំណុចជាគោល ដែលត្រូវពិភាក្សា រួមមាន ទី១ គ.ជ.ប ត្រូវឯករាជ្យ កុំយកកូតាគណបក្ស ទៅចែកឲ្យគណបក្សដទៃទៀត។ ទី២ ត្រូវលុបឈ្មោះជនជាតិវៀតណាម ដែលគ្មានសញ្ជាតិខ្មែរ ចេញពីបញ្ជីឈ្មោះបោះឆ្នោត។ ទី៣ ទាមទារឲ្យពលរដ្ឋខ្មែរនៅបរទេស មានសិទ្ធបោះឆ្នោត។ ទី៤ ត្រូវមានច្បាប់សម្រាប់អ្នកចង់ឈរឈ្មោះជាតំណាងរាស្ត្រ ឬនាយករដ្ឋមន្ត្រី។ និងទី៥ ត្រូវកំណត់អណត្តិបេក្ខជនឈរឈ្មោះបោះឆ្នោត។
គួររម្លឹកជូនថា លោក សួន សេរីរដ្ឋា ត្រូវបានតុលាការកម្ពុជា កាត់ទោសកំបាំងមុខឲ្យជាប់ពន្ធនាគាររយៈពេល ៧ឆ្នាំ ពីបទញុះញុងផ្តួលរលំ រាជរដ្ឋាភិបាល និងរួមគំនិតក្បត់ជាតិ។ ហើយលោកបានរស់នៅសហរដ្ឋអាមេរិក អស់រយៈពេល ៨ឆ្នាំ និង ៩ខែ។ ប៉ុន្តែលោក ត្រូវបានព្រះមហាក្សត្រ ចេញព្រះរាជក្រិតលើកលែងទោសវិញ បន្ទាប់ពីមានសំណើរ ពីលោកនាយករដ្ឋមន្ត្រីហ៊ុន សែន កាលពីថ្ងៃទី ១០ខែកក្កដា ឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ